Debati “McGonigal”, Edi Rama hodhi mikun e FBI si Sajme Qorrin e Arben Tigrin! Dhe, iku…

Mocion me debat për “Skandalin McGonigal” ishte arsyeja pse Kryeministri Edi Rama u shfaq në seancë plenare por jo se ju përgjigj detyrimeve kushtetuese. Nuk mohoi aktakuzën amerikane dhe mediat që raportuan për Zyrtarin e lartë të FBI, Chares McGonigal, skenare këto të përsëritura si me Ministrin e Brendshëm, Saimir Tahiri, për kanabizimin e vendit ashtu dhe Ministrin e Financave, Arben Ahmetajn, për inceneratorët, por, gjithçka që flitej në 14 rastet ku citohej emri i tij, e banalizoj, ironizoi dhe shfajësoi, ndryshe nga sa u mendua!

Fjalën e tij e nisi me një fjalor shumë të varfër dhe nuk ka se si të jetë ndryshe kur shoqërohet me Taulant Ballën, madje Konicën nuk e ka më as mirazh kur rrinë me Ulsi Manjën.

“Prej javësh ka shpërthyer një kanal ujërash të zeza në përpjekje për të shfrytëzuar politikisht një proces gjyqësor në SHBA që s’ka asnjë lidhje me Shqipërinë, qeverinë dhe mua personalisht. Çfarë ka ndodhur konkretisht? Një ish zyrtar i lartë i FBI, ish shefi i kundër inteligjencës amerikane në Nju Jork akuzohet për një bashkëpunim të paligjshëm me oligarkun rus Deripaska.

Gjatë hetimeve prokurorët kanë konstatuar edhe një sërë shkeljesh që lidhen me udhëtimet e McGonigal ku akt akuza shënon se ka vizituar Shqipërinë dhe është takuar me mua. Akt akuza nënvizon se ka marrë para borxh nga personi A. Në rreshtat e akt akuzës përmendet edhe hetimi amerikan i parave ruse të PD-së ku shënohet edhe që personi A ka marrë një material nga zyra ime për këtë çështje. Akt akuza flet edhe për një person B këshilltar i jashtëm i imi disa vite më parë. Procesi nuk ka asnjë të akuzuar tjetër përveç McGonigal.

Pavarësisht se pas një hetimi të gjatë për të cilin kam marrë vesh vetëm kur jam pyetur nga një gazetar amerikan i Insider, në të gjithë rreshtat e akt akuzës nuk ka asnjë akuzë dhe asnjë të dhënë tjetër përveç raportimit korrekt të takimeve të mia me zyrtarin e lartë amerikan, apo faktin e vërtetë se ai ka folur me mua për rrezikun rus.

Dihen, njihen dhe shquhen botërisht për nisma të kësaj natyre ata që më akuzojnë mua në këtë sallë. Janë po ata që kur ishin në pushtet i kanë bërë të gjitha të zezat dhe jo vetëm s’ka nevojë për shumë shpjegime rreth tyre, por unë skam ardhur sot dhe s’do të vijë më për ta. Këtu do vijë sa herë të jetë nevoja për respekt të zgjedhësve që përfaqësoj dhe në respekt të deputetëve të shumicës që s’mund t’i lija vetëm,” tha Edi Rama duke cilësuar opozitën si jashtëqitje masive të kombit të ndarë përgjysmë ndërsa sa seriozisht e kishte marrë kë mocion me debat tregon dhe ironia që bëri me humbjen e madhe të PS më 14 Maj jo vetëm në Durrës, Tiranë, Elbasan, por dhe Washingtonin.

“E kam menduar prej kohës, e kam thënë, përpara se të niste kjo zallamahi se s’do e furnizoj më me energjinë time zjarrin e politikë së përplasjes dhe zhurmës. Nuk kam më dëshirë që të armatosem përditë me fjalorin ulës. Janë ca dhe cika që përsërisin vetveten. Fatkeqësisht jam përfshirë me zell dhe me zjarr për ditë dhe për shumë vite në këtë palo luftë. Jam bërë pjesë e asaj mase të errët, erë e keqe dhe ndjellë keqe që i ka errësuar njerëzit e politikës. duke bërë që të mendohet se jemi thjesht një jashtëqitje e kombit e ndarë përgjysmë. Mjaft më se ka shumë gjëra të tjera për të bërë. thërrisni, bërtisni, hidhuni përjetë sa të doni, por s’keni për të pasur më këtë nder. Mbushini mendjen njëri tjetrit se jam fshehur dhe jam tretur. Po të doni mos u shkulni më kurrë nga revolucioni iluzionist, por mua s’do më keni më palë.

Ju jeni në rregull, keni hyrë në vitin e 10 kur me keni mundur çdo vit. Keni mbledhur mbi 120 mijë njerëz mhi 120 herë në Bulevard dhe të themi të gjitha siç janë, më keni mundur në të gjitha zgjedhjet dhe ky vit do jetë humbja më e madhe e të gjitha dekadave. Në 14 maj, ku përveç Tiranës dhe Durrësit e Elbasanit që siç na keni informuar, do merrni dhe Vlorën dhe Uashingtonit. Ndaj ju hap rrugë. Dua t’u them të gjithë shqiptarëve atë që më gërryen brenda meje, që s’kam bërë aq sa duhet kundër mjerimit në politikë, ku gëlon fukarallëku dhe maskarallëku.”

Edhe sot kur del se është prorusi më i zellshëm në Shqipëri, Rama akuzoi opozitën se është marrë me paratë ruse ndërsa i dha fund kërkesës së opozitës për ngritjen e një Komisioni Hetimor.

“Gëlon shënjtan budallëku, pisllëku dhe maskarallëku. Foltore më foltore, kanal më kanal rrjet më rrejt e filxhan më filxhan e kanë mokolepsur tërë shoqërinë. Kjo nuk është politika, por versioni i turpshëm. Politika është diçka tjetër, e lartë dhe e dobishme. Mbase unë do ta kem të pamundur të mos i kap drutë siç i do mushka në fushatat e elektorale për ju. Më  e keqja rrallë e për mall se do të jem shumë i angazhuar. Rikthehem tek personi A, B,C e me radhë, përsëritet ditë natë kryeministri përsëritet 14 herë në aktakuzë. Por aktakuza vetë çfarë thotë? Personi B operonte si këshilltar jo zyrtar i kryeministrit.

Dorian Duçka ishte si këshilltar i jashtëm në ato vite. Po krimi apo komprometimi ku është ? Ish-shefi i kundër-inteligjencë në New York më ka thënë të jemi të kujdesshëm lidhur me shoqërinë ruse, por ku është komprometimi apo krimi në këtë fakt? Dhuratat simbolike shkëmbehen rëndom kur bëhen vizita. Në rastin në fjalë drejtori më dhuroi një kapele e kam edhe sot në zyrë. Unë vetë lexoj aktakuzën dhe citoj të gjitha 14 herë ku sipas jush. E kam thënë kur e kam pyetur muaj më parë, ku është krimi apo komprometim për të mbajtur një marrëdhënie me shefin e kundër-inteligjencës së FBI-së. Ai është takuar me mua në Shqipëri, krimi dhe komprometimi ku është? Aktakuza nuk flet për asnjë bisedë, por thotë këto që po lexoj unë. Bisedat imagjinare pastaj janë një gjë tjetër. Në nëntor , se mbaj mend por në 20 nëntor m McGonigal u takua me kryeministrin e Shqipërisë., thuhet.

E vërteta është se Shefi i FBI nuk më ka thënë kurrë dhe nuk ia kam kërkuar, se e di mirë kufirin etik mes pozicionin të kryeministrit dhe zyrtarëve të lartë të shteteve të tjera. Por pyetja që unë shtroj ku është kompromenti. Pra është një narrativë sa halucinante aq edhe qesharake për mënyrën se si funksionojnë shtetet.

Në parlamentin e shtetit është një byrektore që gjizën e merr nga unë, brumin nga Sorosi, dru për furrën nga persona me nga Tropoja dhe pasi sekretari i Shtetit i jep zjarr, byreku piqet dhe helmon noçkën e vizionit opozitar. Si mundet të imagjinojë njeriu, SHBA-në si një byrektore!?

Tek Lana e marrëzisë do të mbytesh, të zezat e tua janë të zezat e të gjithëve dhe përpiqesh me tërbim të bëhesh litar në qafën e tyre. Kërkon të bëjë revolucion për të shpëtuar Amerikën. Keni 2 muaj që kërkoni , ke je ku je?

Jemi tek hera e 9 pika e 37  faqa 8. Në Shqipëri e ftoja unë atë, dhe në New York më ftonte ai mua, dhe ku është këtu kompromentimi? Këtu flitet për të akuzuarit që nuk ka bërë sipas tyre detyrën e tij, po ku hyn këtu krimi dhe kompromentimi im? Ta dini ju sa takoj unë nëpër restorante kur shkoj jashtë shtetit duhet të bëni Komision javë për javë. Bëni dhe një Komision për Rudën se në restorant e kam takuar.

Nuk kishit asgjë tjetër lidhur me këtë përveç informacioneve të dala në media, po ti kishim si do i mbanim të fshehura? Luli nuk i merrte vetë paratë ruse, por ia merrte tutori. Po të kisha informacion, do t’i kisha përcjellë kudo që të mundja. Problem për vendin do të ishte sikur unë të kisha informacion se rusët hidhnin para për birra dhe çadra për të rrëzuar qeverinë dhe të mos reagoja.

Dëgjova që artistin Lulzim kërkonte të vërtetën. Cilën të vërtetë doni? Rusët i kam shpikur përmes një informacioni dezinformuar, që nga zyra ime i është një persona A, nga Tropoja. Ju doni që shqiptarët të ngrihen në revolucion duke besuar tërë këtë përrallë të fuqisë time penetruesë në sistemin amerikan duke i barë ata barkderra të lëviznin. Ju qofshi, zoti i ndihmoftë ata që ju vijnë. Apo thoni dhe një tjetër: Kam tradhtuar kombin sepse desha të eliminoj këta që eliminohen vetë çdo ditë ka 10 vite,” tha Kryeministri duke u shfajësuar me faktin se nuk ka se çfarë të eliminoj thuajse se opozita është Lulzim Basha ndërsa iu tha goja edhe për ujë.

Duke lexuar 14 paragrafët ku emri i tij përmendet në aktakuzën amerikane për Charles McGonigal, ai e hodhi poshtë dhe mikun e FBI duke shtuar se vetë nuk ishte i akuzuar në këtë histori.

“Zoti i ndihmoftë rrugë humburit që vijnë pas jush me kuaj flokë kaltër dhe me autobuzë që paguhen nga puna e ndershme e personit Z, e personit Y, e personit ML dhe e disa personave të tjerë të lidhur me ta përmes ruletave që mbikëqyr Europol.

Dolët ju nga Lana që zbuluat se një farë Amerikë e blinte Edvin Kristaq Rama nga Surreli, një Goni Goni nga Tropoja, dhe e dyllos një Dori Duçka, poliagjent që banon te kthesa e TEG. Pika kush e ka qeverisur Shqipërinë.

E kam lexuar shumë herë akt akuzën për Deripaskan nuk thotë asgjë asgjëkund. Te Lana po, aty Deripaska është duke korruptuar Lalin për të kapur ujrat e zeza, përmes një personi ZH i cili i lidhur me një person Z kanë gjetur rrugën për të shkuar te Lali që është personi E.V. Këtu tani rrugët ndahen më shumë dhe më qartë se asnjëherë tjetër, unë në punët e mia si kryeministër, ju në rrugën e revolucionit,” tha Kryteministri Edi Rama në shfaqjen e tij të radhës nga foltorja e parlamentit duke përfunduar:

“Ju presim në 14 maj, suksese në jetë dhe deri atëherë kujdes se byrektorja vazhdon punën, gjiza ka arritur dhe okllaia po shtron brumin tjetër për tavën që pret të hyjë në punën e rindezur”.

Dhe, pas 45 minutave, kur përcaktoi fillimin dhe fundin e mocionit me debat, Kryeministri Edi Rama iku pasi dha sqarimet që ai i pa të arsyeshme ndërsa deputetëve të opozitës me pyetje të përgatitura u ngeli vetëm ti lexojnë sepse ai që Kushtetuta e detyron tha se nuk do të merrej më me sqarime të tilla për opozitën!