Kosova sot në agjendë për anëtarësim në Këshill të Evropës

Aplikimi i Kosovës për anëtarësim në Këshillin e Evropës është në agjendën e takimit të Komitetit të Ministrave të Jashtëm.

Kështu ka bërë të ditur këshilltarja e presidentes Vjosa Osmani, Rejhan Vuniqi, përmes rrjetit social Twitter duke shpresuar që sot në takimin e ministrave të Jashtëm të këtij komiteti do të ketë hapa pozitivë në drejtim të integrimit evropian.

“Kërkesa e Kosovës për anëtarësimin në Këshillin e Evropës është në agjendën e takimit të Komitetit të Ministrave të së hënës. Le të shpresojmë për zhvillime pozitive në këtë hap të rëndësishëm drejt integrimit evropian,” u shpreh Vuniqi përmes rrjetit social Twitter.

Kosova ka aplikuar për anëtarësim në KiE më 12 maj të vitit 2022.

Aplikacionin fillimisht e shqyrton Komiteti i Ministrave dhe pastaj, fjalën përfundimtare e jep Asambleja Parlamentare, e cila përbëhet nga përfaqësuesit kombëtarë të shteteve anëtare. Pranimi bëhet me votat e 2/3 të shumicës.

Këshilli i Evropës është një organizatë ndërkombëtare për të drejtat e njeriut, demokracinë dhe sundimin e ligjit në Evropë, me seli në Strasburg të Francës. Është themeluar më 1949.

Vendet anëtare të Këshillit të Evropës janë: Shqipëria, Andorra, Armenia, Austria, Azerbajxhani, Belgjika, Bosnje-Hercegovina, Bullgaria, Kroacia, Qiproja, Republika Çeke, Danimarka, Estonia, Finlanda, Franca, Gjeorgjia, Gjermania, Greqia, Hungaria, Islanda, Irlanda, Italia, Letonia, Lihtenshtajni, Lituania, Luksemburgu, Malta, Monako, Mali i Zi, Holanda, Maqedonia e Veriut, Norvegjia, Polonia, Portugalia, Moldavia, Rumania, San Marino, Serbia, Sllovakia, Sllovenia, Spanja, Suedia, Zvicra, Turqia, Ukraina, Mbretëria e Bashkuar.

Vende vëzhguese janë: Kanadaja, Izraeli, Japonia, Selia e Shenjtë, Meksika dhe Shtetet e Bashkuara.