Dhuna ndaj Bato Dalipajt, Berisha: Akt i rëndë, dëshmi e makinerisë shtetërore të dhunës

Pas kallëzimit në policinë e Fierit të punonjësit të ndërmarrjes së komunales në Bashkinë Patos, Bato Dalipaj për dhunën e drejtuar ndaj nga shefi sepse nuk pranoi të firmosë një formular për votat e anëtarëve të familjes për Partinë Socialiste, ka reaguar Kryetari i Partisë Demokratike, Sali Berisha, duke cilësuar si një akt të rëndë dhe dëshmi flagrante e përdorimit të makinerisë shtetërore të dhunës

“Falangat e krimit elektoral të administratës së narkoshtetit kanë dhunuar fizikisht, keqtrajtuar kafshërisht qytetarin Bato Dalipaj sepse kanë dashur t’i imponojnë me detyrim, paraqitjen e listës së votuesve, të cilët ai duhet të komprometonte për PS-në.

Dënoj me ashpërsinë më të madhe krimin e shëmtuar të drejtorit të ndërmarrjes komunale të Bashkisë Patos, ndaj punonjësit Bato Dalipaj.

Ky është një akt i rëndë, një dëshmi flagrante e përdorimit të makinerisë shtetërore si makineri dhune, terrori ndaj qytetarëve dhe votës së tyre të lirë.

Nga ana tjetër, jam këtu për t’i shprehur nderimin më të thellë, solidaritetin më të madh, zotit Bato Dalipaj, një hero i votës së lirë, për qëndresën e tij të pamposhtur ndaj gangsterëve të pushtetit, ndaj kriminelëve elektoralë të pushtetit.

Garantoj Baton se akti i tij është një akt frymëzues për të gjithë qytetarët shqiptarë, për t’i treguar vendin armiqve të votës së lirë, falangave të Edi Ramës.

U bëj thirrje qytetarëve të denoncojnë në portalin e Transparencës së PD, sikundër edhe si qytetarë dixhitalë, çdo akt apo presion nga kriminelët elektoralë, duke filluar nga krye-kryekrimineli Edi Rama.
I garantoj se opozita shqiptare dhe PD do bëjnë gjithçka që këta kriminelë elektoralë të marrin ndëshkimin e merituar,” tha Sali Berisha duke i ftuar njëkohësisht të mbajnë parasysh se entuziazmi, se elektrizimi i krijuar sot në shoqërinë shqiptare nga kandidaturat e primareve, ka kallur tmerr shpirtëror, si tek kandidatët e bodrumit të mafias, ashtu edhe te vetë Edi Rama, i cili në një akt të paprecedent në historinë 32-vjeçare të zgjedhjeve, me vetëdijen se kandidatët e tij janë njerëzit më të diskredituar të shoqërisë, ka pushtuar vetë të gjitha hapësirat komerciale të reklamave, vetëm e vetëm që t’i vendosë në errësirë ata.

“Ai e di se dalja e fytyrës së Erion Veliajt në Tiranë, u kujton qytetarëve të Tiranës, sipas polleve serioze, tre tipare fatale: hajdutin, gënjeshtarin, fallsin.

Për herë të parë në 32 vite, qytetarët shpallin falls një politikan më shumë se 65 përqind e tyre.
Të njëjtin politikan e shpallin vjedhës, të korruptuar, 67 përqind të tyre. E shpallin gënjeshtar, 64 përqind e tyre.

Edi Rama duke e ditur se votohet për të dhe jo për Ramën, zë hapësirat e reklamave me shpresë se do mund të largojë këto mendime nga qytetarët,” tha lideri i opozitës ndërsa i bëri thirrje medieve, të mos pranojnë në studio asnjë kandidat për qeveritar vendor që refuzon ballafaqimin me kundërshtarin.

“Ballafaqimi me kundërshtarin është detyrim madhor moral përpara qytetarëve.

Ky ballafaqim, jo që nuk ka njohur zhvillime pozitive, por është zhdukur nga ekranet tona.

Njeriu që vrau ballafaqimin është Edi Rama. Atij nuk ia mban të ballafaqohet me Sali Berishën, se e di se si del nga ai ballafaqim.

Atij nuk ia mban të vijë në studio dhe t’ia rreshtoj një nga një veprat e rënda penale.

Atij nuk ia mban të vijë në studio dhe t’ia numëroj gjobat e tmerrshme në arbitrazh që mund të arrijnë në 1.6 miliardë euro.

Atij nuk ia mbën të vijë në studio dhe t’ia numëroj të gjithë tenderat e familjes së tij, të vëllait, thjeshtrës dhe baxhanakut të tij.

U bëj thirrje medieve të mos pranojnë asnjë njeri në studio që nuk është i gatshëm për ballafaqim.

Unë e kuptoj se kjo do ketë ndikim në aktivitetin e studiove, por kjo do i nderojë studiot dhe do i lartësojë ato shumë më tepër.

Sikundër kërkoj nga kandidatët e PD-së, që të jenë të hapur ndaj medieve, cilitdo që do të ndjekë veprimtarinë e tyre elektorale.

Ftoj kandidatët e PD-së të përgatiten për debate, qoftë në sheshet e qyteteve, qoftë në sallat e qyteteve, qoftë në studio televizive me rivalët e tyre. Ftoj shoqërinë civile të ndikojë me të gjithë potencialin e saj në inkurajimin e debateve mes rivalëve.

Edi Rama, të duket se është në lojën e fundit të tij politike dhe ka mbyllur çdo lloj transparence. E pret fundi që meriton.”

Në fund, i pashmangshëm ishte posteri i shumëdebatuar i kandidatit të Koalicionit “Bashkë Fitojmë”, Belind Këlliçit i cili korrupsionit i ofron gishtin e mesit, për Kryetarin e Partisë Demokratike është shumë pak ndërsa dënoj ndërhyrjen e Sorosit dhe mafiozëve që hiqen si myftinj.

“Ata që vjedhin qytetarët, meritojnë jo gishtin, por shumë herë më tepër.

Ata që vjedhin qytetarët, meritojnë çdo formë diskreditimi.

Ata që vjedhin qytetarët dhe mbrohen nga Edi Rama dhe drejtësia e tij, atë e kanë pak.

Meritojnë çdo gjë tjetër.

Çdo njeri duhet të marrë parasysh, një njeri ka imagjinatën e vet dhe shprehjen e vet.

Po të isha unë, ku e di ç’mund të zgjidhja unë.

Ajo më duket pak bile, të them të vërtetën.

Dënoj me ashpërsinë më të madhe manipulimin mediatik të atyre mafiozëve që flasin në emër të myftive, anonimë.

Dënoj ndërhyrjen e George Soros dhe parave të tij në fushatë, sepse rrjeti i organizatave të Sorosit, pasi e sheh se Erion Veliaj po përfundon aty ku e meriton, po hiqet si i revoltuar.

Erion Veliaj është i përfunduar.

Përdorimi i parave të Sorosit nga këto organizata, nga ndërhyrja e tyre kriminale në fushatë elektorale, është e dënueshme,” tha Kryetari i Partisë Demokratike, Sali Berisha, duke përfudnuar:

“Ku ishin këta kur Edi Rama përdori fjalorin më të paimagjinueshëm në parlamentin shqiptar ndaj grave?

E tëra është një zhurmë e turpshme elektorale. Ata që vjedhin qytetarët, meritojnë më shumë se aq.”