Alternativat e opozitës, Berisha: Pushtuan mendjen, zemrën dhe vatrat e familjeve shqiptare

Duke i bërë një rezyme fushatës zgjedhore deri në ditën e sotme, Kryetari i Partisë Demokratike, Sali Berisha, tha sot se alternativat e opozitës kanë pushtuar mendjen, zemrën dhe vatrat e familjeve shqiptare ndërsa i bëri thirrje sërish Edi Ramën për një debat kur premtoj se do të publikoj jo vetëm vjedhjet e tij, por edhe të familjarëve.

Në konferencën e përjavshme, Kryetari i Partisë Demokratike akuzoi Kryeministrin Edi Rama dhe për deklaratën në mediat italiane se anëtarësimi i Shqipërisë në Bashkimin Europian pa Serbinë është i pakuptimtë.

“Fushata elektorale e opozitës ka elektrizuar anëkënd vendin. Flamuri i fushatës është në duart e opozitës.
Alternativat e saj janë alternativat që kanë pushtuar mendjen, zemrën e shqiptarëve, vatrat e tyre familjare.
Civiliteti i fushatës së opozitës është shembullor. Projektet, programet e qeveritarëve vendorë të ardhshëm janë një garanci e madhe për ndryshimin e shpejtë të gjendjes dramatike të bashkive tona.

Por janë njëkohësisht rivendosje pluralizmi politik në qeverisjen vendore në Shqipëri.

Të gjitha këto kanë një kontrast të madh me krahun tjetër. Siç e shihni, bota pa censurë, që është bota dixhitale, zien e tëra për opozitën.

Para se të vija këtu, në një votim prej 12 mijë vetësh në portalin e studentëve, 69 përqind votonin për Belind Këlliçin. Rinia e tëra pas tij, ndërkohë po nga bota dixhitale, javën që kaloi, Lal Fallci e mbylli me indeksin më të lartë të neverisë në mediat sociale.

Indeks, i cili ishte 20 herë ose dhe më shumë, i lartë se rivali i tij.

Pra, ajo që çka shpreh mendimin real të qytetarëve, faktohet si një triumf i padiskutueshëm i opozitës,” tha Sali Berisha sot në konferencën e përjavshme duke ftuar edhe sërish Edi Ramën në debat ndërsa rreshtoj jo vetëm vjedhjet e tij, por edhe të familjarëve.

“Edhe njëherë, dënoj me forcën më të madhe refuzimin e ballafaqimit të kandidatëve nga Edi Rama si një akt të papërgjegjshëm ndaj qytetarëve shqiptarë.

Rama nuk i nxjerr kandidatët sepse mbi ta rëndojnë fatura dhjetëra milionë euro vjedhjesh nga më të ndryshme.

U bëj thirrje medieve të vendosin në studio dy karrige dhe të ftojnë kandidatët për debat dhe të lënë bosh karrigen e kandidatit që nuk paraqitet.

Sikundër përsëris ftesën ndaj Edi Ramës, të vijë në debat, të paraqesë para shqiptarëve gjithçka ai e konsideron se i shërben interesit të pushtetit të tij.

Nuk vjen dot.

Unë e bëj këtë, por unë jam i bindur se ai nuk mund të vijë në debat. Rëndojnë afera të tmerrshme mbi shpatullat e tij. Dhe unë ia nxjerr dokumentet një nga një përpara shqiptarëve.

Unë do i rreshtoj jo vetëm vjedhjet e tij, por edhe me familjarët e tij në tendera.

Pra, Edi Rama nga njëra anë i fsheh kandidatët e tij, dhe vetëm pas denoncimeve të përsëritura të mia, nxori fytyrën e Lal Fallcit, se edhe atë e kishte zhdukur, nga ana tjetër nuk pranon debatet.

Kjo është një fyerje e madhe për qytetarët.

U bëj thirrje qytetarëve të kërkojnë nga kandidatët të debatojnë, qoftë edhe në sheshet e qytetit.

Nga ana tjetër, u bëj thirrje gazetarëve të verifikojnë çdo pretendim, çdo pseudosukses që numërojnë sot sekti i rilindjes, sekti i vjedhjes.

Rilindje do të thotë vjedhje sot për shqiptarët.

A mund të imagjinoni një kryebashkiak që zhduk 520 mijë metër katror gjelbërim dhe mashtron e thotë se kam mbjellë 1 milion pemë.

Këtë mashtrim e bën për të justifikuar vjedhjen e miliona eurove që ka faturuar me 1 milion fidanë.

Një njeri që u thotë qytetarëve që kam ndërtuar 40 shkolla dhe fillon e numëron 5, 8 apo 15. Se nuk i ka,: lideri i opozitës duke akuzuar Erion Veliajn se po përdor drejtorët për të vjedhur ndërsa Edi Rama përdor baxhanakun dhe thjeshtrën.

“Erion Veliaj është bërë, siç e thashë më sipër në rrjetet sociale, simboli i neverisë së kryeqytetit.

Ndaj dhe lutja ime për gazetarët është, mos harxhoni kohë me këtë njeri, i cili nuk takon qytetarët, bën fushatë vetëm me drejtorët e bashkisë.

Një skandal i madh ka shpërthyer këto ditë.

Është gjetur se drejtorët e tij, Mariglen Qato, Elizabeta Cjapi e të tjerë, janë hajdutë të paskrupullt në tendera.

Kanë fituar në kundërshtim me ligjet me familjarët e tyre, 29 tendera. Kanë fituar 25 milionë euro tendera.

Se kështu fiton edhe baxhanaku i Edi Ramës. Edhe Veliaj thotë, Rama përdor baxhanakun për të vjedhur, unë përdor drejtorët për të vjedhur.

Se mos kujtoni se janë të drejtorëve këto, ato janë të Veliajt.

Thjeshtra është bërë famoze, po shkatërron të gjithë kompanitë e projektimit se fiton çdo tender në mënyrë të pamerituar.

Këtu kam ndërtesat që ndërton Veliaj me emrat e drejtorëve. Se nuk ka mundësi kurrë që një kryetar bashkie të shkelmojë ligjin e konfliktit të interesit, e shkelmon kur është vetë pronar, kur është vetë ndërtues.

Problemi është se ka edhe hotel 15 milionë euro, pastaj kompanitë shkojnë i regjistrojnë në emrin e një punëtori të vjehrrit. Se shteti nuk ekziston.

Ky është një superskandal, ndaj Erion Veliaj e ka të qartë se me datë 14 merr valixhet dhe shkon në SKAP.
Se dosjet i ka aty. Ka dosje të tmerrshme, edhe për djegësin e Tiranës,” tha Berisha duke folur dhe për aferën tjetër superskandaloze, atë të zonjës Sako me hidrovorin e Durrësit:

“Një aferë tjetër superskandaloze është afera e zonjës Sako.

Zonja Sako është një korruptokrate e pamëshirshme.

Zonja Sako, për të vjedhur, nuk le ligj pa thyer, nuk le standard pa shkelmuar.

Tani hidrovori i Durrësit është simboli i zi i vjedhjeve të saj.

Ju lutem qytetarëve dhe ju, unë po lexoj përmbledhjen e kësaj afere.

Së pari, investimi për hidrovorin ndonëse nuk ka lidhje me asnjë fatkeqësi natyrore, u trajtua si rindërtim dhe u prokurua me fondet e rindërtimit të tërmetit. Imagjinoni se çfarë bëjnë këta me qytetarët hallexhinj që presin në çadra apo të strehuar në mënyrën më të keqe. Paratë i përdorin për hidrovorin.

Së dytin, projekti filloi si përforcim në rindërtim, duke shpërdoruar fondet e rindërtimit.
Së treti, u ndryshua pozicioni i vendosjes së godinës ekzistuese dhe zhvendoset pranë Porto Romanos, duke rritur kostot dhe shtuar 3600 metra linear kanal shumë të thellë dhe shpenzime të tjera që shkojnë në 26 milionë euro, vetëm për të vjedhur.

Së katërti, zhvendosja lidhet me investimin në Portin e Durrësit.

Vetëm projekti i rehabilitimit të infrastrukturës ka kushtuar 7.2 milionë euro.

Prokurimi ishte fiktiv sepse projekti ishte përgatitur nga projektuesi. Data e lidhjes së kontratës është më vonë.

Leja është miratuar pa u kryer shpronësimi, edhe kjo një shkelje shumë e rëndë ligjore nga Sako.

Sako firmosi për tjetër pozicion dhe tjetër pozicion propozoi Këshilli Bashkiak dhe tjetër pozicion është zbatuar për godinën e hidrovorit.

Sako është pra në një vepër të rëndë penale. Kjo zonjë e ka vendin në hetim të thellë të SPAK.
Pavarësisht se Rama e paralizon SKAP-in, ne do të dorëzojmë këtë për ndjekje penale.
Le ta quajë Rama si të dojë, ajo do të shkojë për ndjekje penale.

Në fund e pashmangshme dhe jashtëzakonisht e rëndësishme për këtë konferencë të përjavshme të Kryetarit të Partisë Demokratike ishte deklarata e Edi Ramës në një emision italian ku thotë se anëtarësimi i Shqipërisë në BE pa Serbinë është i pakuptimtë.

“Kjo është një deklaratë antishqiptare e vasalit të Beogradit, që kërkon të lidhë Shqipërinë pas qerres së Beogradit.

Kjo deklaratë vjen në kundërshtim flagrant me interesat shqiptare të integrimit.

Dy autokratët e Ballkanit, padroni dhe vasali, nuk kanë interesa evropiane.

Kanë interesa të pasurimit të tyre, kurse Aleksandër Vuçiç ka interesa ruse dhe përdor si avokat të shpifur kryeministrin e Shqipërisë, i cili pranon në vasalitet të plotë, t’i thotë Europës se integrimi i Shqipërisë në BE pa padronin e tij nuk ka kuptim. Sikur shqiptarët punojnë për serbët dhe jo për integrimin e tyre në Europë.

Integrimi në BE nuk është proces kolektiv, është proces individual për vendet.

Nuk ka akt më antishqiptar, si mundet kryeministri i një vendi të thotë se pa ata, nuk ka kuptim të vijmë ne, tha Kryetari i Partisë Demokratike, Sali Berisha duke përfunduar:

“De facto Rama mbron interesat e Kremlinit, mbron Serbinë si prapavijë e agresorëve barbarë rusë, duke insistuar që të mos i kërkohet Serbisë zbatimi i sanksioneve ndaj Rusisë, por ta pranojmë Serbinë si prapavijë.

Mirë që nuk thotë që të pranojmë edhe Bjellorusinë.

Nuk ka avokati më të shëmtuar të interesave të Kremlinit se kjo që bën Edi Rama.

PD e dënon me forcën më të madhe këtë deklaratë dhe fton shqiptarët të qëndrojnë sepse ky është shkelmim i interesave të tyre jetike.”