Dhuna ndaj gazetarëve dhe deputetëve të pabindur, Basha: Debat konstruktiv!
Vetëm pasi shpërtheu dajaku për deputetët që nuk mbështesin Sali Berishën dhe nuk i binden verbërisht as urdhërave të Lulzim Bashës, u kuptua se Basha nuk është ai “evropiani modern” që Edi Rama me socialistët e tij i vuri mbi samar, por i dhunshëm po aq sa e kishte akuzuar Saliun, madje që nuk shfaq asnjë shenjë pendese!
Dhe, kur kalon mesdita dhe ai zgjohet si zakonisht, kur bashkëpartiakët e tij në luftën kundër Saliut e akuzojnë për dhunën e forcave të tij paramilitare ndërsa dalin dhe pamjet me bandën e Florencit të tij nga ballkoni i 8 Janarit, ai nuk dënon dhunën, madje e konsideron “debat konstruktiv”!
“Fryma e debatit konstruktiv me të cilën Kryesia e PD debatoi për më shumë se 8 orë për gjetjen e rrugës më të mirë në funksion të riorganizimit të PD, është shenjë e qartë e një reflektimi të thellë që ka nisur brenda familjes tonë politike,” thekson Lulzim Basha përmes rrjetit social Twitter duke i konsideruar vlera demokratike që nuk mund të cenohen nga asnjë individ edhe rrahjet e gazetarëve dhe atyre që nuk mendojnë si Lulzim Basha dhe Kryetari Nënkryetar!
“Nuk ka gjë më demokratike se mendimet e ndryshme në një forum politik. Debatet dhe mendimi ndryshe duhen respektuar nga të gjithë. Vlerat demokratike që na drejtojnë në këtë rrugëtim të vështirë për ne demokratët nuk mund të cenohen nga asnjë individ.”
Kur kësaj neverie i shtojmë edhe cilësimin “palaço” të mjeshtres së fjalës së lirë për të gjithë ata që nuk mendojnë si kryetari i dorëhequr që rikthehet në partinë e Flutura Açkës, ky reagim i pasditës së një mashtruesi, që tashmë është e qartë se nuk ishte dhe nuk është, as lider dhe aq më pak evropian, nuk ka se si të përfundoj ndryshe reagimi i tij:
“Refuzoj dhe dënoj me forcë çdo përpjekje për tensionim që ushqen kulturën e vjetër politike të baltës dhe shantazhit me të cilën jemi ndarë njëherë e mirë dhe që duhet lënë pas.”
Ndryshe, duke dënuar me forcë aktet e dhunës kundër deputetëve të PD, anëtarëve të Kryesisë dhe gazetarëve, Sekretari i Përgjithshëm Gazment Bardhi i kërkoj secilit kolegë të distancohen publikisht ndërsa përfundoi:
“Dhuna verbale, presioni dhe shantazhi kundër deputetëve të PD që mendojnë ndryshe nuk janë mjete politike. Kjo sjellje prej grupimi paramilitar hedh në erë bashkëjetesën brenda kësaj force politike dhe dërrmon në mënyrë përfundimtare besimin e qytetarëve tek PD.”
