Turizmi, fasoneria dhe remitancat ulën në minimumin historik deficitin e llogarisë korente

Deficiti i llogarisë korente pësoi një rënie të fortë në tremujorin e parë të vitit.

Sipas të dhënave të Bankës së Shqipërisë, vlera e deficitit zbriti në 135 milionë euro, 72% më pak krahasuar me tremujorin e fundit të vitit të kaluar dhe 46% më pak krahasuar me të njëjtën periudhë të një viti më parë.

Kjo ishte njëkohësisht vlera më e ulët e shënuar ndonjëherë për tremujorin e parë të vitit, të paktën për periudhën prej vitit 2008 e në vazhdim, të mbuluar nga statistikat e Bankës së Shqipërisë.

Përmirësimi vjetor i deficitit të llogarisë korente i detyrohet zgjerimit të ndjeshëm të suficitit tregtar të shërbimeve, sidomos falë turizmit, por edhe rritjes së të ardhurave dytësore, të lidhura kryesisht me dërgesat e emigrantëve.

Bilanci tregtar i shërbimeve për tremujorin e parë të vitit rezultoi pozitiv në vlerën e 564 milionë eurove, në rritje me 38% krahasuar me tremujorin e parë të vitit të kaluar. Kontributin kryesor e dha sektori i fasonerisë, ku të ardhurat neto nga shërbimet për përpunim të inputeve fizike të zotëruara nga të tjerët arritën në 196 milionë euro, në rritje me 24% krahasuar me tremujorin I 2022.

Por, rritjen më të lartë të të ardhurave neto e shënoi sektori I turizmit Të ardhurat neto në këtë sektor arritën vlerën e 189 milionë eurove, në rritje me 116% krahasuar me të njëjtën periudhë të vitit të kaluar.

Shtylla e tretë më e rëndësishme e përmirësimit të bilancit të llogarisë korente ishin dërgesat e emigrantëve, që për tremujorin e parë të vitit kishin vlerën e 214 milionë eurove, në rritje me 16.3% krahasuar me të njëjtën periudhë të vitit të kaluar.

Ndërkohë, bilanci tregtar në mallra është përmirësuar ndjeshëm krahasuar me tremujorin e fundit të vitit të kaluar, me një rënie të deficitit prej 28%; por, ky deficiti shënoi rritje me 9.2% krahasuar me të njëjtën periudhë të një viti më parë.

Përveç përmirësimit të ndjeshëm të bilancit të llogarisë korente, një kontribut në rritje për tremujorin e parë erdhi nga llogaria financiare dhe sidomos nga investimet e huaja direkte. Fluksi prej 308 milionë eurosh i investimeve të huaja direkte ishte gati 2.3 herë më i lartë se deficiti i llogarisë korente për tremujorin e parë.

Të dhënat e Bilancit të Pagesave shpjegojnë në një masë të madhe edhe tendencat e kursit të këmbimit në pjesën e parë të këtij viti. Leku shfaqi tendenca mbiçmuese ndja Euros në tremujorin e parë, por këta tendenca u theksuan edhe më shumë në tremujorin e dytë.

Aktualisht, kursi i këmbimit Euro-Lek ndodhet pranë niveleve më të ulëta historike. Më datë 9 qershor, monedha europiane u këmbye me 105.62 lekë./Monitor/