Operacioni policor në kampin ASHRAF në Manzë, MEK: 1 i vrarë, 36 të plagosur!
Në zbatim të vendimit të Gjykatës së Posaçme kundër Korrupsionit dhe Krimit të Organizuar dhe të urdhrit të ekzekutimit të Prokurorisë pranë kësaj Gjykate, për kontrollin e të gjitha ambienteve dhe zyrave ku banojnë për qëllime humanitare, Policia e Shtetit, në kuadër të një plani operacional sot në orën 4 e 30 të mëngjesit filloi kontrollin e të gjitha ambienteve dhe zyrave në kampin MEK, në Manëz.
Por ndryshe nga plani operacional i Policisë së Shtetit ndonëse u blindua e gjithë zona, policia ka hasur në rezistencën e banorëve. Anëtarët e MEK u takuan në orën 08:00 të mëngjesit me Drejtorin e Përgjithshëm të Policisë së Shtetit, Muhamed Rrumbullaku, ku ky i fundit iu dha vendimin e gjykatës për të ushtruar kontrolle.
Por shumë shpejtë ndodhi përplasja në mes policisë shqiptare dhe muxhahedinëve, e cila përshkallëzoi dhe konfrontimi i banorëve të këtij kampi me policinë mori përmasa të frikshme.
Epilogu ishte fatal! Një person humbi jetën dhe dhjetëra muxhahedinë mbeten të plagosur në kampin e Manzës.
Këtë e konfirmoi zëdhënësi i MEK, Shahriar Kia, i cili pohoi se viktima është banor i kampit ASHRAF dhe quhet Ali Mostashari.
Policia e Shtetit e mohoi se mund të kishte viktima ndërsa pas shumë shifrave që qarkulluan brenda dhe jashtë morgut të kampit ASHRAF, avokati i muxhahedinëve, Genc Gjokutaj, konfirmoi 1 të vdekur dhe 36 persona të plagosur që janë nën oksigjen ndërsa nuk dihet numri i saktë i atyre që u dërguan në Spitalin e Durrësit dhe atë të Traumës në Tiranë.
Ndryshe, me fillimin e aksionit u tha se janë lëshuar 70 urdhër-arreste ndërsa urdhri i kontrollit u bë në kuadër të luftës kundër terrorizmit dhe parandalimin e sulmeve kibernetike.
