Ministri i Brendshëm i Serbisë: Ne e dimë se kush e ka vrarë Oliver Ivanoviçin!
Ministri i Brendshëm i Serbisë, Bratislav Gashiç, tha sot se autoritetet serbe “e dinë saktësisht” se kush e ka vrarë Oliver Ivanoviçin, politikanin serb nga veriu i Kosovës.
“E dimë saktësisht se kush është vrasësi,” tha Gashiç, gjatë një fjalimi në një seancë të Parlamentit të Serbisë, që është thirrur nga opozita, e cila po kërkon shkarkimin e tij, raporton agjencia Beta.
Ai tha se policia serbe ka kërkuar nga autoritetet gjermane këtë person “nën mbrojtjen e të cilëve ai është”.
“Ne kemi një video nga aeroporti i Tiranës, kemi fotografi nga Prishtina, kemi fotografi që shfaq atë duke hyrë në një banesë në Prishtinë”, tha Gashiç, pa ofruar detaje apo dëshmi të tjera për të mbështetur këto pretendime.
Ky rast, tha ai, “është zgjidhur nga profesionistët”, por ata nuk kanë pranuar imazhe satelitore të skenës ku u krye vrasja. Sipas ministrit serb, këto imazhe ishin kërkuar nga partnerët ndërkombëtarë, por këta të fundit ishin arsyetuar se në ditën e vrasjes “kishte qenë ditë me mjegull”.
Oliver Ivanoviç u vra më 16 janar 2018, me gjashtë plumba në shpinë. Vrasja u krye para zyrës së partisë së tij në Mitrovicë të Veriut.
Mbi pesë vjet pas kësaj vrasjeje, rasti ende nuk është zgjidhur.
Prokuroria Speciale e Kosovës deri më tani ka ngritur tri aktakuza, por në to nuk ka pasur ndryshime thelbësore, gjegjësisht përmenden vetëm personat që “me vetëdije dhe qëllim kanë ndihmuar grupin kriminal për kryerjen e veprës penale të vrasjes së Oliver Ivanoviqit”, por jo autori i vrasjes apo porositësi.
Aktakuza janë ngritur ndaj zyrtarëve policorë Nedelko Spasojeviç, Radeta Basara, Zharko Jovanoviç, por edhe ndaj sekretares së Ivanoviqit, Silvana Arsoviç dhe Marko Roshiç, qytetar i Mitrovicës së Veriut.
Më 19 tetor 2022, Policia e Kosovës arrestoi pjesëtarin e komunitetit serb, M.M, nën dyshimet se ai është anëtar “i një grupi të organizuar kriminal” të lidhur me vrasjen.
Edhe Zyra e Prokurorisë Speciale e Serbisë po kryhen hetime për vrasjen e Ivanoviqit./RFE/
