Këshilltarja e Kryeministrit të Kosovës u ndalua në kufi nga policia serbe

Këshilltarja e Kryeministrit të Kosovës për Preshevë, Medvegjë dhe Bujanoc, Ardita Sinani, u ndalua për mbi një orë nga policia serbe në vendkalimin me Kosovën, Muçibabë.

“Arsyetimi i vetëm që mu dha nga policët kufitarë të Serbisë ‘kemi urdhër për ndalimin tuaj dhe nuk mund të të lejojmë ta kalosh kufirin pa marrë pëlqim nga baza’,” u shpreh Ardita Sinani në reagimin e saj përmes rrjetit social Facebook.

Asnjë sqarim shtesë për arsyen, apo se kush është baza që duhet pyetur dhe marrë leje për të kaluar kufirin, thotë Këshilltarja e Albin Kurtit:

“Kjo mbase mund të jetë kostoja e të qenurit Këshilltare Politike e Kryeministrit të Republikës së Kosovës, por sigurisht nuk do të jet mjeti me të cilin do të heshtet zëri për të drejtat e shqiptarëve të Luginës së Preshevës,” thekson Ardita Sinani duke e konsideruar këtë rast si nxitje edhe më të madhe për të folur me zë edhe më të lartë për diskriminimin shtetërorë serb ndaj shqiptarëve.

Ndryshe, Ardita Sinani është Ish-Kryetare e Komunës së Preshevës, që është njëra nga tre komunat me shumicë shqiptare në jug të Serbisë, së bashku me Medvegjën dhe Bujanocin, që me këtë lloj terrori shtetëror serb bashkëjetojnë që nga lindja.