Kontrolle në MINT, policia arreston dy zyrtarë të lartë dhe një biznesmen

Pas dy orësh ka përfunduar aksioni i kontrolit në Ministrinë e Industrisë, Ndërmarrësisë dhe Tregtisë, MINT, nga ana e Policisë së Kosovës.

Gjatë këtij kontrolli, hetuesit policor kanë marrë me vete disa dosje, derisa janë ndaluar për intervistim Hafiz Gara, drejtor në Departamentin për Rezervat Shtetërore të Mallrave dhe Irfan Lipovica, drejtor në Departamentin për Integrim Evropian dhe Koordinim të Politikave.

Dy zyrtarët e lartë të MINT dyshohen për keqpërdorim të pozitës në rastin e rezervave shtetërore.

Ndërkohë Policia e Kosovës ka arrestuar dhe biznesmenin Ridvan Muharremi, i cili u pa duke dalë nën pranga nga lokali “Bukë e zemër” .

Avokati Mahmut Halimi tha se klienti i tij është dërguar për intervistim në prokurorinë speciale dhe pastaj do të vendoset për lëshim ose jo të fletarrestit. 

“Unë me klientin tim, reagimin ia kemi drejtuar opinionit publik dhe kemi kërkuar prezencën e organeve të rendit. Atje do të shqyrtohen çështjet dhe do të zbardhen të gjitha gjërat,” tha Halimi duke shtuar se ende nuk kanë një fletëarrest për Ridvan Muharremin.

“S’ka urdhërarrest, ka vetëm urdhër pë bastisje. I kam dorëzuar të gjitha materialet që i kemi përgatitur me kohë. Jemi përgatitur për të vërtetën. Absolutisht  nuk dyshoj te klienti”, theksoi tutje Halimi.

Ndryshe Policia e Kosovës ka bastisur pronat, banesat dhe një lokal të bzinesmenit Ridvan Muharremi i cili është pronar i lokalit “Bukë e Zemër”, i cili së fundi është përmendur rreth keqpërdorimit të rezervave shtetërore.

Sipas përgjimit të publikuar ditë më parë, Ridvan Muharremi dyshohet se është ndërmjetësues i marrëveshjes ndërmjet Kosovës dhe firmës nga Polonia, e cila s’i ka sjellë rezervat në Kosovë, pavarësisht pagesës që është kryer nga ministria e Rozeta Hajdarit.