Pleshtat grekë dhe jorgani i Edi Ramës!
nga Agim Popoci
Digjet jorgani për një plesht! Kështu e vlerësoi situatën e krijuar me protestën për lirimin e kryetarit të zgjedhur të Himarës, Fredi Beleri, ku morën pjesë dhe kryebashkiakë të rëndësishëm grekë, Kryeministri Edi Rama, duke shtuar se në memorien e tij nuk kishte një rast tjetër, kur të zgjedhurit e një shteti demokratik organizojnë protestë në një shtet tjetër demokratik, kundër autoriteteve të këtij shteti.
“Jo vetëm kaq, po ku ata shfaqen si protestues kundër vendimeve të gjykatave përkatëse të shtetit në të cilin protestojnë, duke e absolutizuar përkatësinë etnike të subjektit të protestës mbi çdo normë juridike, standard ligjor e logjikë demokratike.”
Po, ja që ka, madje protestën e këtij lloji e mbështeti edhe vetë Edi Rama, apo ndryshojnë gjërat kur protesta nuk zhvillohet në shtetin që ai drejton, kur jorgani është i tjetër kujt dhe pleshtat nuk janë grekë; Dhe, kur duhet shitur patriotizëm sepse qeveria ka halle!
Në krye të herës, duhet të thënë qartë që nuk ka shqiptar mbi këtë tokë, përveç atyre që kanë gjyshet me prejardhje italiane, i cili nuk është dakord me arrestimin e Fredi Belerit; Por, jo për akuzën e blerjes së votave, aq më shumë kur për gjithë këtë spektakël rilindas, u tha se ishte kap në flagrancë!
Sidoqë të vendos drejtësia e reformuar e Edi Ramës, nuk ka shqiptar mbi këtë tokë që do ti fal Fredi Belerit “Masakrën e Peshkëpisë”, kur në postën kufitare në Gjirokastër, u vranë dy ushtarakë, u plagosën tre të tjerë dhe gjatë tërheqjes u grabit dhe armatimi!
Por, nuk ka as shqiptarë mbi këtë tokë që e ka mbështetur Kryeministrin Edi Rama i cili për protestat e organizuara në veri të Kosovës nga Presidenti i Serbisë, Aleksandar Vuçiç, e ku merrnin pjesë zyrtarët më të lartë të qeverisë serbe, i kërkoj Kryeministrit Albin Kurti të mbyllë sytë, të mos marrë masa, dhe të liroj edhe kriminelët e arrestuar serbë për të shtensionuar situatën; Madje, meqë Mitsotakis nuk ishte matanë kufirit serb kreu i shtetit, por një kriminel i shkollës Milosheviçit dhe miku i Ramës, Kurti dhe populli i Kosovës kishin në kufirin me Serbinë dhe gjithë arsenalin ushtarak serb në gjendje gatishmërie për luftë!
Apo, kjo nuk ka rëndësi, këtu jorgani vërtetë është shqiptarë por është produkt i Kosovës dhe nuk ndikon në shqisat e Edi Ramës për të qëndisur qoftë dhe dy radhë normale, në mënyrë që pleshtat serbë të largohen nga territori i shtetit kosovarë.
Dhe, këtu do zinte vende edhe reagimi i Edi Ramës, se nuk kishte pa një rast tjetër, kur të zgjedhurit e një shteti demokratik organizojnë protestë në një shtet tjetër demokratik, kundër autoriteteve të këtij shteti!
E kur jemi te patriotizmi i Edi Ramës duhet thënë ca fjalë, dhe pse erdhi për t’u shitur pikërisht në këtë moment, pasi nuk mallëngjeu asnjë shqiptar mbi përpjekjet e tij titanike për integrimin e Shqipërisë, marrëdhëniet e fqinjësisës së mirë me Greqinë dhe drejtësinë e pavarur!
Pse u bë aq patriot dhe i tha jo Kryeministrit grek Mitsotakis për takimin e 21 Gushtit me liderët e Ballkanit Perëndimor në Athinë, dhe pse u mundua ta shes përmes mediave që ka në Tiranë, si bojkotim të takimit meqë Kryeministri i Kosovës, Albin Kurti, ishte prezent, pasi u informua se vëllau i tij Aleksandër ishte shprehur se është takim shumë i rëndësishëm për Kosovën!
Që ta ketë të qartë Kryeministri sepse shqiptarët vazhdojnë të jenë esëll, pleshtat grekë janë armë që Edi Rama i përdor sa herë që është në opozitë; Dhe, pas luftës që bëri me ca idiotë me dylbi për ruajtjen e kufirit detar, sot vetëm Edi Ramës i duhen pleshtat grekë që të futen në jorganin e Ramës, që ai t’a shkund me forcë dhe llafe për të vazhduar “luftën” aty ku e la, dhe t’i jap fund përckatimit të kufirit detar që gjithsesi do jetë një epilog i disfavorshëm për shqiptarët dhe Shqipërinë!
Përderisa u tha se do dërgohet në Gjykatën Ndërkombëtare, ky disfavor për Shqipërinë duhet të ketë dhe miratimin e Qeverisë në mënyrë që në Arbitrazh të procedohet një Marrëveshje! Dhe jo vetëm kaq! Palët në Gjykatën Ndërkombëtare vetë përcaktojnë rregullat e procesit, duke mos harruar se asnjë shtet nuk mundet pa vullnetin e tijj ti nënshtrohet arbitrazhit!
Nuk ka më dylbi dhe Gjykata Kushtetuese që urdhërohen me telefon, kur Vendimi ekziston dhe ai e bëri nul me arsyetim Marrëveshjen e Saliut!
Por, ka diçka tjetër! Nëse të gjithë mund të flenë vetëm Sigurimit i Shtetit nuk flenë, kjo është dhe arsyeja pse Piktorit i dhanë furçën me bojë kuq e zi.
Vendimi i miratuar nga 9 Janari 2021 i Parlamentit grek për zgjerimin e kufirit detar të Greqisë në Jon, nga gjashtë në dymbëdhjetë milje detare, para se të futet në dosjen e Arbitrazhit duhet të mbulohet para syve të shqiptarëve qoftë dhe me shoshë!
Aq më shumë, pasi në kulmin e pandemisë, opozita i kërkoj Edi Ramës transparencë për kufirin detar dhe të mos abuzoj me të drejtën ndërkombëtare, Kryeministri as që mori mundimin të flas për të gjitha këto, dhe shqiptarët nga goja e tij dëgjuan vetëm, vajmedet, Lul, sapun, djath e shitje!
Sot, Kryeministri Edi Rama mund të vazhdoj me pleshta, jorgan dhe pranga të Fredi Belerit, por, patriotizmi nuk do ti shitet as për sapun e as për djath!
Sot, Kryeministri Edi Rama mund t’i thotë jo Kryeministrit grek Mitsotakis për takimin e liderëve të Ballkanit Perëndimor, por, kjo nuk e bënë aspak patriot dhe nuk ka se pse e arsyeton më pas mosprezencën e tij me prezencën e Albin Kurtit, pasi që Fuga dhe Rama duhet ta dinë se shqiptarët edhe lexojnë, dhe pa lejen e Zyrës së Propagandës së Kryeministrit informohen se më 28 e 29 Gusht 2023 ai do të marrë pjesë në Forumin Strategjik në Bled të Sllovenisë ashtu si dhe Albini që e ka konfirmuar pjesëmarrjen!
Sot, është e qartë se Edi Rama nuk e ka as merakun e votës himarjote dhe as lirinë e Belerit, por, 12 milje si u bënë?! Dhe, pavarësisht se e shkund jorganin kuq e zi që e mbanë sot me shumë fanatizëm, rruga për dërgimin në Arbitrazh do të shtrihet vetëm aq sa i ka këmbët Qeveria e Shqipërisë!
