Albin Kurti: Koha për shtet dhe jo për komb të ri!

Në një botë ideale i intervistuari i sotëm do të ishte një inxhinjer elektronik, një adhurues i matematikës dhe filozofisë! Në të vërtetë ai është i burgosur nga të gjitha regjimet.

20 vjet më parë është burgosur nga regjimi i Millosheviçit dhe është dënuar me 15 vjet heqie lirie. 10 vjet më parë është burgosur nga regjimi i UNMIK-ut dhe vjet është arrestuar nga qeveria në Kosovë!

Deri 5 vite më parë nuk merrte dot vizë për të vizituar Shtetet e Bashkuara të Amerikës.

Emëruesi i përbashkët i dënimeve lidhet me objektivin e tij politik: bashkimin e shqiptarëve në një shtet. Bashkimin Kombëtar e quan fe që ende nuk ka kishën e vet. Kur e përballë me perspektivën e BE-së të kujton se sa herë janë shpërbërë perandoritë, shqiptarët kanë qenë në rrezik. Për të, bashkimi në BE bëhet me Hollandën dhe Austrinë, në Ballkan duhet bërë bashkimi me njëri-tjetrin. Pengesën për realizimin e ëndrrës së tij e sheh te politikanët që “kanë ego  të madhe personale dhe ego të vogël për kombin”.

“Jemi një komb, thotë,- që kemi nevojë për një shtet të ri dhe jo për komb të ri për shtetin e Kosovës”.

Është optimist se dita e bashkimit do të vijë sepse “shqiptarët janë komb i fuqishëm se i kanë bërë ballë jo vetëm shteteve të tjera por edhe shteteve të tyre”.

Si hap të ndërmjetëm ai flet për nevojën e Republikës së 3-të në Kosovë dhe jo Republikën e 6-të në Shqipëri.

Në Tiranë aleat kryesor konsideron Kushtetutën e Shqipërisë. Këtu duket se ka parasysh fjalinë në preambulë të dokumentit themeltar të shtetit: “me aspiratën shekullore të popullit shqiptar për identitetin dhe bashkimin kombëtar”.

Në paradën e 100 vjetorit të shpalljes së Pavarësisë së shtetit shqiptarë ka mbetur i zhgënjyer: nuk ka parë të demonstruar fuqinë e ushtrisë shqiptare dhe ka thënë:

“Shqipëria hyri në NATO më shumë si territor se sa si ushtri”.

Është kritik për bisedimet me Serbinë. Kosova thotë se është temë në Bruksel dhe jo palë. Sipas tij, në bisedime Serbia ecën me moton: çfarë është e imja është e imja dhe çfarë është e juaja eja ta negociojmë”.

Serbia, për të, nuk është vend normal për shkak të së shkuarës ndërsa Kosova nuk është vend normal për shkak të së sotmes.

Është kritik i rreptë ndaj një pjese të elitës në Kosovë që “1 vit ishin luftëtar dhe 12 vjet biznesmen”.

Për kohën që po jetojmë thotë se “autokracitë janë në modë, diktaturat janë të papranueshme dhe demokracitë e brishta”. Kritikët e tij thonë se vetë është autokrat.

Në zgjedhjet parlamentare të vitit të kaluar – Lëvizja që drejton mori numrin më të madh të deputetëve, por mbeti në opozitë. Ndarjet e partive si rregull ndodhin në pushtet, por forca që drejton nuk është parti klasike, asaj i ndodhi në opozitë. Ai e quan dalje të disa deputetëve të cilët tashmë kanë krijuar partinë e tyre.

Sot ai flet: si e sheh Shqipërinë bashkë me Kosovën, vendin e shqiptarëve në rajon dhe në BE dhe rolin, vendin dhe peshën e ndërkombëtarëve në një rajon ku sipas tij janë 6 shtete dhe 4 superfuqi.

Albin Kurti – mirë se erdhe në Përballë