Hedhja e granatës në veri, Sveçla: Revoltë për arrestimin e tre serbëve!

Pas hedhjes së granatës ushtarake të dorës nga grupet kriminale në veri të Kosovës ka reaguar Ministri i Punëve të Brendshme, Xhelal Sveçla, duke theksuar se kjo nuk do ta zbraps drejtësinë ndërsa garantoi se krimet e kryera gjatë luftës në Kosovë do të ndiqen deri në fund.

“Nga njësitë relevante të Policisë së Kosovës pas një angazhimi të gjatë e me dyshime të bazuara, janë arrestuar 3 qytetarë serbë për krime të kryera ndaj popullatës civile gjatë luftës në Kosovë. Të njëjtit dyshohet të kenë qenë bashkëpunëtorë në tortura, plagosje, vrasje, dëbim, dhe masakra ndaj shqiptarëve në Vushtrri, fshatrat e saj përreth dhe në Burgun e Smrekovnicës,” shprehet Xhelal Sveçla në reagimin e tij përmes rrjetit social Facebook duke e cilësuar këtë sulm si shenjë revolte ndaj arrestimit të këtyre personave, si mesazh ndaj drejtësisë dhe me qëllim të shkaktimit të terrorit tek qytetarët tanë.

“Inspirimi, mbështetja dhe urdhëri për këtë akt kriminal ka ardhur nga ish Ministri i Propagandës në kohën e Milosheviçit, Aleksandar Vuçiç. Serbia ka kryer gjenocid në Kosovë. Serbia me në krye Vuçiqin, jo vetëm që nuk e pranon këtë fakt, por glorifikon kriminelët e luftës. Dëshmia e qëndrimit të saj të pandryshuar është vetë planifikimi i aktit të hedhjes së granatës,” shprehet Ministri i Punëve të Brendshme, Xhelal Sveçla, duke përfunduar:

“Kosova do të jetë shtet i së drejtës, i qytetarëve të barabartë ku barazia dhe prosperiteti do të garantohen për të gjithë.”