Sulmi terrorist, BE: Kosova ka mandat për hetime, Serbia të bashkëpunojë pa kushte

Policia e Kosovës ka mandat për t’i hetuar sulmet që janë bërë në Banjskë të Zveçanit më 24 sthator, ndërsa Serbia e ka obligim të bashkëpunojë, pa kushte.

Kështu u shpreh sot Zëdhënësi i Bashkimit Evropian, Peter Stano, duke komentuar dëshmitë e fundit të publikuara nga autoritetet e Kosovës lidhur me këtë sulm terroris ndërsa përsëriti se BE është në pritje të rezultateve të plota të hetimeve, që ta ketë një pasqyrë të qartë të asaj që ka ndodhur, dhe në bazë të tyre të marrin vendime vendet anëtare, pëfshirë edhe ndonjë masë të mundshme ndaj Serbisë.

Lidhur me përgjegjësitë që e ka marrë Ish-Nënkryetari i Listës Srpska, Milan Radoiçiç për sulmin, dhe a do të ndihmojë BE që ai të ekstradohet në Kosovë, Peter Stano tha se Bashkimi Evropian pret bashkëpunim të plotë, transparent dhe pa kushte nga Serbia, në mënyrë që të sqarohet jo vetëm se kush e ka përgatitur dhe kryer sulmin terrorist, por edhe kush qëndron prapa tyre.

“E kemi parë se çfarë ka thënë Radoiçiç. Të gjitha faktet duhet të verifikohen dhe të zbardhen. Presim bashkëpunim të plotë nga Serbia. Ne nuk e bëjmë angazhimin tonë përmes mediave, por përmes kanaleve tona,“ tha zëdhënësi i BE-së ndërsa për deklaratat e Beogradit se misioni i BE-së në Kosovë për sundim të ligjit, EULEX, nuk është lejuar të marrë pjesë në hetime, ai ishte i prerë dhe i bëri të qartë shtetit serb se EULEX-i nuk ka nevojë për zëdhënës që flet në emër të këtij misioni nga ana tjetër, por e ka zyrën e vet.

“Secilën ditë dalin dëshmi të reja. Nuk i komentojmë, por presim rezultate përfundimtare që i sqarojnë të gjitha rrethanat e sulmit terrorist. Presim bashkëpunim të plotë nga Serbia. BE ka thënë qartë se jemi gati të vendosim masa edhe ndaj Serbisë, nëse vendet anëtare vlerësojnë se kanë dëshmi të mjaftueshme.“

Zëdhënësi i BE-së nuk ka lënë asnjë dyshim se mandatin për ta hetuar rastin e Banjskës e kanë autoritetet e Kosovës.

“Kjo ka ndodhur në territorin e Kosovës dhe hetimet i bën Policia e Kosovës. Ne kemi bashkëpunim shumë të mirë me të,“ tha zëdhënësi i BE-së duke ebërë të qartë se Bashkimi Evropian dhe partnerët e saj e shohin vazhdimin e dialogut mes Kosovës dhe Serbisë si mënyrën e vetme për t’i zgjidhur problemet, edhe në këtë situatë, dhe kur Presidenti i Serbisë ka paralajmëruar zgjedhje parlamentare për muajin dhjetor, ndërsa përfundoi:

“Gjithmonë ka cikle të zgjedhjeve. Por duhet të rifillojmë dialogun, sepse është rruga e vetme për normalizim të raporteve. Sikur të kishte normalizim, nuk do të kishim situatën që kemi. Prandaj bëjmë thirrje nga BE-ja dhe partnerët që palët t’i kthehen dialogut.“

Ndryshe, Kosova dhe Serbia janë pjesë e dialogut të ndërmjetësuar nga BE-ja, për normalizim të raporteve, prej vitit 2011. Palët kanë nënshkruar një mori marrëveshjesh, por jo të gjitha janë zbatuar./RFE/