KPK vendos shkarkimin e anëtarit të Gjykatës së Lartë

KPK vendosi shkarkimin nga detyra të anëtarit të Gjykatës së Lartë, Artan Zeneli. Në këtë mënyrë, Zeneli është anëtari i 3-të i gjykatës më të lartë në vend, që nuk kalon sitën e vettingut, për shkak të pasurisë.

Pas këtij vendimi, Gjykata e Lartë ka mbetur me 6 anëtarë. Tashmë pritet nëse Zeneli do të apelojë ose jo vendimin e KPK-së, i cili i ndërpret karrierën si gjyqtar.

Artan Zeneli e ka filluar karrierën në vitin 1991 si gjyqtar, është shkëputur për një dekadë për të ushtruar profesionin e avokatit dhe është rikthyer sërish në sistem në vitin 2009. Në vitet 1991-1999 ai ka punuar si gjyqtar në Krujë dhe në Tiranë. Në vitin 1999, Zeneli është larguar me dëshirën e tij për t’u bërë avokat, profesion të cilin e ka ushtruar deri në vitin 2009, duke qenë njëkohësisht edhe këshilltar ligjor për kompanitë AMC, Top Channel apo INSIG.

Në qershor të vitit 2009 rikthehet në detyrën e gjyqtarit dhe kryetarit të Gjykatës së Tiranës-zgjedhje e cila u kontestua asokohe nga ish-ministri i Drejtësisë, Enkelejd Alibeaj. Artan Zeneli u zgjodh anëtar i Gjykatës së Lartë në korrik 2012 nga Kuvendi i Shqipërisë.