Rezolutë të unifikuar për Kosovën, Çuçi: Avokati i Popullit, jo propozim i Bashës apo Bardhit!

Më 12 tetor, në një seancë dedikuar Kosovës, pas një debati prej rreth 5 orësh pritet të miratohet një Rezolutë për sulmin terrorist serb në Kosovë.

Pas përfundimit të mbledhjes së Konferencës së Kryetarëve, Kryetari i Grupit Parlamentar të PS-së, Bledi Çuçi, tha se do të punohet për unifikimin e një drafti të përbashkët me opozitën, për Rezolutën për Kosovën.

“Të unifikojmë draftet për rezolutën e Kosovës. Kjo është çështje protokollare e parlamentit. Ne nuk kemi rrëzuar interpelancë, kemi bashkuar dy kërkesat për rezolutë me interpelancën, por bashkuam kërkesat,” tha Bledi Çuçi.

Ndërsa Kryetari i Grupit Parlamentar të PD-së, Gazment Bardhi, konfirmoi Rezolutën e përbashkët që do të harrtohet për sulmin terrorist të 24 shtatorit në veri të Kosovës ndërsa saktësoi se seanca do të zhvillohet më 12 tetor.

“Qëllimi i përbashkët ka qenë që të dilet me një qëndrim të unifikuar të të gjitha grupeve parlamentare mbi këtë çështje. Kryetari i Komisionit të Politikës së jashtme dhe nënkryetari të punojnë së bashku për një draft të unifikuar,” tha Gazment Bardhi duke përfunduar:

“Ne kemi kërkuar që kjo axhendë të futet në rend dite një orë e më parë. Është rënë dakord që të kemi më 12 tetor një seancë dedikuar Kosovës, dhe koha e debatit të jetë rreth 5 orë.”

Ndërkohë për Avokatin e Popullit, Kryetari i Grupit Parlamentar të PS-së, Bledi Çuçi, e bëri të qartë se nuk presin propozimet e Bashës apo Bardhit, por të opozitës.

“Avokati i Popullit është një çështje që e kemi bërë të qartë qëndrimin që duhet zgjedhur nga propozimet që duhet të vinë nga opozita. Nuk është as domain i Bashës dhe as i Bardhit, propozimi për Avokatin e Popullit. Ky propozim i takon opozitës në tërësi.”