Presidentja e Kosovës flet para KS të OKB, dhunimet seksuale të kryera gjatë luftës
Duke falënderuar Shqipërinë për nismën, dhe Shtetet e Bashkuara dhe Mbretërinë e Bashkuar për mundësinë, Presidentja e Kosovës, Vjosa Osmani, sot i është drejtuar anëtarëve të Këshillit të Sigurimit të OKB, shteteve të shumta anëtare të Kombeve të Bashkuara, përfaqësuesve të shoqërisë civile e mediave lidhur me dhunimet seksuale të kryera gjatë luftës së fundit në Kosovë.
“Falënderoj Shqipërinë për nismën, si dhe për ftesën që të flas në emër të Republikës së Kosovës, duke i dhënë kështu zë mijëra të mbijetuarëve të dhunës seksuale në luftën e fundit në Kosovë. Mirënjohëse edhe ndaj Shteteteve të Bashkuara të Amerikës dhe Mbretërisë së Bashkuar si bashkërorganizatorë të kësaj seance,” tha Presidentja e Kosovës, Vjosa Osmani duke vazhduar të argumentoj rëndësinë që ka arritja e drejtësisë për të mbijetuarit e dhunës seksuale gjatë luftës në Kosovë.
Dhunuesit, tha Osmani, vazhdojnë të jenë në liri pa u ndëshkuar, ndërkohë përmendi se dhuna seksuale gjatë luftës në Kosovë u përdor si strategji brutale nga regjimi i Milosheviçit për demoralizim, spastrim etnik e gjenocid.
“Mungesa e drejtësisë dhe ndëshkimit të dhunuesve gjatë konfliktit ka krijuar pasoja afatgjata. Kjo e bën kërkimin e drejtësisë për të mbijetuarit jashtëzakonisht më sfiduese. Mungesa e përgjegjshmërisë dërgon një mesazh dëshpërues se veprime të tilla të neveritshme mund të kryhen pa u ndëshkuar. E përjetëson një kulturë të heshtjes, një ndjenjë hezitimi dhe frikë te të mbijetuarit që kërkojnë ndihmë dhe mbështetje. Dështimi që dhunuesit të mbahen përgjegjës, jo vetëm që lë plagët e hapura, por edhe minimizon besimin në shoqërinë pas luftës dhe institucionet,” Presidentja e Kosovës ndërsa lexoi një deklaratë të një të mbijetuare të dhunës seksuale, për të cilën tha se e mbijetuara ka dashur ta dëgjojnë përfaqësuesit në Këshillin e Sigurimit.
“‘Tentova ta fshihja veten nën karrige, mbylla sytë dhe veshët që të mos dëgjoja britmat e grave të tjera. Çfarë u bënë grave të tjera në shkollë ku na futën me forcë, asnjëherë nuk kam parë gjë më të tmerrshme… në atë moment kur një burrë më kapi për këmbe, më gjuajti përtokë, më zhveshi me forcë pantallonat, më dukej sikur isha e paralizuar, nuk ndjeja këmbët, kisha gjakderdhje të rëndë… isha vetëm 9 vjeç”.
