Lajçak në Beograd promovon agjendën e Serbisë, të enjten vazhdon dialogu në Bruksel

Përkundër krijimit të situatës së favorshme për terroristët serbë për të vepruar më 24 shtator në tokën kosovare dhe vendosjes së masave ndëshkuese për Kosovën nga Bashkimi Europian, I dërguari i BE për dialogun Kosovë-Serbi, Miroslav Lajçak nuk ka ndaluar dhe sot në Beograd ka vazhduar me promovimin e agjendës së Serbisë për ripushtimin e Kosovës në takim me Presidentin serb, Aleksandar Vuçiç.

Pas takimit u bë e ditur se Presidenti i Serbisë, Aleksandar Vuçiç ka pranuar thirrjen e Lajçakut që të enjten të vazhdojnë bisedimet në mes të Prishtinës dhe Beogradit në Bruksel, ndërsa Drejtori i Zyrës për Kosovën pranë qeverisë serbe, Petar Petkoviç, saktësoi se do të bisedohet për Statutin e Asociacionit të komunave me shumicë serbe.

“Kemi pranuar thirrjen e zotit Lajçak që për dy ditë të takohemi në Bruksel ku do të vazhdojnë bisedimet e Beogradit dhe Prishtinës. Pala jonë është shumë e përgatitur me një ekip të veçantë të ekspertëve ku do të bisedojmë për tekstin e Statutit të Asociacionit, që është hapi i parë konkret në drejtim të formimit të Asociacionit,” tha Petkoviç pas takimit duke shtuar se Presidenti i Serbisë foli për faktet e serbëve të rrezikuar në Kosovë dhe lëvizjeve të Kryeministrit Albin Kurti që përshkallëzojnë situatën.

Nuk dihen faktet për të cilat foli Vuçiç meqë Serbia që nga viti 1912 flet për fakte që nuk ekzistojnë në Kosovë, nuk dihet se çfarë ka biseduar vërtetë Lajçak gjatë vizitës së javës së kaluar në Prishtinë, por një gjë është e qartë se bisedimet me Beogradin pasi Presidenti i Serbisë, Aleksandar Vuçiç, hodhi poshtë propozimin e BE vetëm një minutë pasi përfundoi takimin me liderët evropian, më nuk ka kuptim!