“Klubi Partizani”, Berisha: Destinacioni i territorit u ndryshua nga Edi Rama, 100% i kundërligjshëm!

Duke e cilësuar gjyq politik procesin për Klubin Partizani ku dhe ai është i akuzuar, Kryetari i Partisë Demokratike, Sali Berisha, shkoi sot një hap para duke theksuar se Vendimi i ndryshimit të destinacionit të një pjese të territorit të Klubit Partizani u bë nga Edi Rama, dhe është 100 për qind i kundërligjshëm.

Sai përket arrestimit të dhëndërit të tij Jamarbër Malltezi, Kryetari i Partisë Demokratike tha se Edi Rama e mban të burgosur politik sepse ai denoncoi sarajet e tij, aferën e inceneratorëve, pallatin e Lindës, betonizimin e Tiranës dhe tenderat e thjeshtrës

“Edi Rama mbrëmë në një monolog me mediat e Bolinos, dëshmoi qartë se ai personalisht është prapa aktit hakmarrës primitiv, të vendosjes antikushtetuese të masave të sigurisë ndaj meje dhe burgosjes politike të Jamarabër Malltezit, vetëm e vetëm pse ai në emër të interesit politik, ka denoncuar ndër të parët, ndërtimin e sarajeve të tij në Surrel, me gjatësi themeli 57 metra të gjata, ndërkohë që pronari i tyre, Edi Rama, kishte të deklaruar në ILDKP 3800 euro dhe 400 mijë lekë, duke faktuar kështu se sarajet e Surrelit u ngritën mbi krimin, korrupsionin, larjen e parave.

Shtoj këtu se Jamarbër Malltezi, anëtar i Këshillit Kombëtar, kryetar i Departamentit të Mjedisit në PD, që mbahet i burgosur politik nga Edi Rama, i tmerruar prej tij, mbahet në burg sepse ka marrë në përputhje të plotë me ligjet e vendit, 140 metër tokoë trashëgimi e pakontestueshme e familjes së tij, nga 1 miliard e 16 milionë metër katrorë tokë që qeveria e kryesuar nga Sali Berisha, iu ka kthyer pronarëve të ligjshëm gjer në fund të vitit 2012.

Ose ka marrë 140 metër tokë në përputhje me ligjet e vendit nga 54 milionë e 220 mijë metër katrorë truall, që qeveria e kryesuar nga Sali Berisha, u ka kthyer pronarëve legjitimë gjer në fund të vitit 2012.
Thashë këtë statistikë, meqenëse kjo ishte tani e plotë dhe duhet t’ia paraqisja publikut shqiptar.

Edi Rama me daljen e tij në mediat e Bolinos, provoi se ai personalisht qëndron mbrapa burgosjes politike të Jamarbër Malltezit sepse ky i fundit me guxim, ka denoncuar ndër më të parët në emër të mbrojtjes së interesit publik, pallatin pesëkatësh të familjes së tij, të ndërtuar në mes të sheshit të pallateve, pa asnjë faturë tatimore, bankare, doganore apo ndërtimore, por vetëm në mënyrë korruptive, mafioze, apo me para gjaku, siç deklaronte Linda Rama.

Edi Rama me mashtrimet e tij provoi mbrëmë përfundimisht se ai ka urdhëruar burgosjen politike me çdo kusht të Jamarbër Malltezit, sepse ky i fundit, në mbrojtje të interesit publik, ka denoncuar me dhjetëra në mos qindra herë, betonizimin e Tiranës nga Edi Rama, të bazuar në korruptimin e tij nga ndërtuesit e kryeqytetit.

Edi Rama mban të burgosur politik Jamarbër Malltezin, sepse ai si anëtar i Këshillit Kombëtar të PD dhe kryetar i Komisionit të Mjedisit, është absolutisht ndër më të parët që ka denoncuar në dhjetëra e dhjetëra debate televizive dhe me më shumë se 382 statuse në FB e tij, aferën e inceneratorëve, vjedhjen e shekullit.
Është ai që ka denoncuar me dhjetëra e dhjetëra herë thjeshtrën e parë të vendit, vajzën e familjes Rama për dhjetëra tendera të fituar, në shkelje flagrante të Kushtetutës së vendit,” tha Sali Berisha duke e vlerësuar se Vendimi i ndryshimit të destinacionit të një pjese të territorit të klubit Partizani nga Rama, është 100 përqind i kundërligjshëm.

“Le t’i kthehemi tani dhe të shohim se si përpiqet Edi Rama të mbrojë krimin e tij politik dhe krimin e tij real ligjor.

Ai lëshoi mbrëmë në mediat e Bolinos, një seri mashtrimesh, me të cilat jo vetëm që u përpoq të mbrojë veten për krimet e kryera, konkretisht për shkeljet e ligjit, duke lexuar një për një, ato që ka shkruar në dacibaon e larove të tij.

Rama mbrëmë tha: “Njëri thotë kështu, unë do them të kundërtën, ndërkohë këtu flitet për fakte dhe jo opinione. Leja e firmosur nga unë ka një hartë. Leja që erdhi si rezultat i ndryshimit për ligjin e sportit, ka një hartë. Nxirrni hartat dhe të shohin njerëzit në hartë. Ja ku janë terrenet sportive, vazhdon ai, fusha e Partizanit, etj. Ja edhe godinat me fotografi, ja edhe fushat e tenisit që kanë qenë te klubi i Partizanit. Leja që ka dhënë KKRT e Tiranës është ajo me të kuqe, që ka qenë hyrja djathtas e klubit. Ajo është leja. Leja me jeshile është e firmosur prej meje”.

Ja ku e keni, të firmosur prej tij.

Me këtë deklaratë, ai pranon se ka ndryshuar me firmën e tij me 8 qershor 2006, nga zonë sportive, në zonë urbane të një pjese të territorit të klubit Partizani.

Shtoj këtu se këtë ndryshim, Edi Rama e ka bërë në shkelje flagrante të ligjit. Dhe kjo është absolutisht e vetmja shkelje e ligjit, të cilin larot e tij, Kraja, Millonai dhe Gjoka kanë përmendur në dacibaon e tyre prej qindra faqesh.

Është e vërtetë se ky vendim është firmosur nga unë, Sali Berisha në datë 22 nëntor 2006, por është firmosur thjesht në rol noteri, pasi dhjetë ditë më parë, Gjykata Kushtetuese kishte rrëzuar më 10 nëntor 2006, ligjin që i lejonte qeverisë të ndërhynte në vendimet e Këshillit të Rregullimit të Territorit të bashkisë.

Unë kisha bërë një ligj që të ndërhyja, por ky ligj u rrëzua nga gjykata.

Pra, vendimi i ndryshimit të destinacionit të asaj pjese territorit të klubit Partizani, është 100 përqind i kundërligjshëm, i dënueshëm dhe ka në bazë korrupsionin,” tha lideri i opozitës duke konstatuar se Edi Rama mashtroi hapur, ndryshimet në ligjin e sportit nuk lejonin ndërtimet në terrenet sportive.

“Kurse më poshtë, Rama mashtron trashë për të justifikuar krimin e tij. Ai thotë se e gjithë pjesa tjetër te tenisi, palestra, është leja që ka ardhur pasi është ndryshuar ligji i sportit.

Ligji atëherë ishte i qartë, nuk mund të ndërtohet në terrene sportive.

Ligji u ndryshua dhe terrenet u ndryshuan, pohon Edi Rama.

Këtu, sipas tij, ndryshimin e ka bërë jo për shkak të xhepit, por për faj të ndryshimit të ligjit.

Në këtë rast kemi të bëjmë me një gënjeshtër të bazuar 100 përqind në mashtrim.

Ligji për sportin, në asnjë gërmë, as dhe në frymën e tij, nuk ndryshoi destinacionin e terreneve sportive, por mundësoi ndryshimin e pronësisë kur ato ishin të ndërtuara mbi tokë private. Dhe kishte mbi 1000 të tilla, ndoshta 1500.

Ligji ndryshoi me kushtin e prerë ligjor të ruajtjes së destinacionit sportiv.

Le t’u referohemi ligjeve për saktësi. Citoj nenin 31, para dhe pas ndryshimeve.

Neni 31§2 para ndryshimit thotë: “Objektet sportive jepen me koncesion apo privatizohen, me kusht që të mos u ndryshojë destinacioni, në përputhje me ligjin nr.7973, datë 26.7.1995 “Për koncesionet dhe pjesëmarrjen e sektorit privat në shërbimet publike dhe infrastrukturë”.

Çfarë thotë ligji i ndryshuar? Neni 31§2 pas ndryshimit: “Objektet sportive privatizohen nga pronarët e truallit, kur ka të tillë, ose në të kundërt, jepen me koncesion, në përputhje me ligjin nr.9663, datë 18.12.2006 “Për koncesionet dhe pjesëmarrjen e sektorit privat në shërbimet publike dhe infrastrukturë”, me kusht që të mos u ndryshojë destinacioni”.

Për të gjithë ata që dinë gjuhën shqipe, kuptojmë në fjalinë e parë, ndryshimi u ka mundësuar pronarëve të truallit të qindra terreneve sportive, të mos përjashtohen nga e drejta e privatizimit, dhe të ushtrojnë të drejtën e parablerjes sipas të gjithë ligjeve nga qeveri të majta dhe të djathta.

Në thelb, kjo nuk ishte një e drejtë e re, e krijuar në legjislacionin shqiptar, por ishte thjesht njësim i qëndrimit të ligjit për sportet, me legjislacionin për kthimin dhe kompensimin e pronave, i cili gjithnjë ka njohur dhe rregulluar, të drejtën e parablerjes së pronarëve.

Të gjithë ata që i thonë gjuhës shqipe, gjuhë shqipe dhe jo gjuhë xhepi, ky ligj nuk autorizon dhe nuk lejon ndryshimin e destiacionit, pasi ligjvënësi ka ndarë jo me pikë fjalinë e parë, por me presje dy fjalitë e para, me fjalinë e tretë, ku thuhet se kthimi te pronari apo dhënia me koncesion, bëhet me kusht që të mos ndryshohet destinacioni.

Mirëpo me raste të caktuara, xhepi nuk pyet as ligj dhe as gjuhë.

Dhe ky është përsëri rasti i Edi Ramës, i cili edhe pas studimit që bëri me studion zvicerane UrboPlan, nën patronazhin e Shalsit të tij, të dëgjesave me banorët e zonës, në kundërshtim flagrant me ligjin e ndryshuar dhe në përputhje me xhepin e tij, e shpall zonë urbane të gjithë zonën e klubit Partizani.

Dhe tani ai kërkon të fshihet prapa Shalsit.

Shtoj këtu se studimi Rama-Shalsi i studios zvicerane UrboPlan, në të cilën zona e madhe që thotë Rama, iu ndryshua destinacioni nga sportive në urbane, përsëri është firmosur nga Sali Berisha, por vetëm në kuadër të miratimit të planit të përgjithshëm rregullues të territorit, firmë e cila pas vendimit të Gjykatës Kushtetuese të nëntorit 2006, ishte thjesht noterizim dhe asnjë lloj tagri për ndryshim,” tha Berisha ndërsa me deklaratën e mbrëmshme të Edi Ramës vlerësoi se faktoi që dacibao e Krajës, Millonait dhe Gjokës është shkruar prej tij.

“Cilido që lexon deklaratën e mbrëmshme të Edi Ramës, në mbrojtje të shkeljeve të tij ligjore, mesa duket të bazuar në valixhe me euro, kupton se ato janë copy-paste me mashtrimet që ai ka bërë në dacibaon e larove të tij kundër meje dhe Jamarbër Malltezit.

Kjo do të thotë se Edi Rama është autori i vërtetë i saj.

Kështu, në dacibaon e tij, të firmosur nga ish-oficeri i sigurimit famëzi të shtetit, Arben Kraja, zuzar i shtetit që qëndron në detyrë në kundërshtim flagrant me ligjin aktual të prokurorisë dhe nenin 6 të Kushtetutës; famozja Enkeleda Millonai, kriminele që për mbrojtjen e vëllait të saj biologjik apo lidhjet obskure që ka me Taulant Ballën, i mohon në kundërshtim me Kushtetutën dhe Konventën Europiane të të Drejtave të njeriut, qytetarit, të drejtën e një procesi gjyqësor kundër Ballës, duke i konfiskuar si një bandite, dosjen e padisë së tij; dhe gjykatësja Gjoka që si një turp i njeriut, fshihet prapa krimit të saj, pra, paraqitën pikërisht në këtë dacibao, këto shpifje të Edi Ramës, se ndryshimi i ligjit për sportin, u bë për shkak të klubit Partizani.

Ndërkohë që ligji kthente te pronarët, qindra e qindra terrene sportive, të ndërtuara në tokën e tyre, me kushtin e prerë ligjor të mosndryshimit të destinacionit sportiv, të këtyre terreneve, të cilat gjer atëherë, ishin të uzurpuara dhe shfrytëzoheshin nga persona pa asnjë lidhje me pronësinë e tyre.

Ju kujtoj këtu fushat e mëdha sportive, Ali Demi, kompleksi Dinamo dhe 105 terrene sportive që kanë ekzistuar vetëm në Tiranë, të cilat u uzurpuan dhe u betonizuan në tërësinë e tyre nga Edi Rama,” tha kryedemokrati në denoncimin e sotëm duke konstatuar se Ligji për sportin hapi të drejtën e pronarëve për privatizimin e terreneve sportive pa u ndryshuar destinacionin.

“Edi Rama me datën 10 qershor të vitit 2006, kur nuk ishte kthyer, nuk ishte privatizuar asgjë, mori zonën- mori apo nuk mori para, unë nuk mund të them, por absolutisht pa para nuk mund të bëhet- por vendosi që këtë ta shndërrojë nga zonë sportive, në zonë urbane.

Këtë e bëri Edi Rama.

Edhe njëherë, e ka bërë kur nuk kishte asnjë privatizim aty, kur ato objekte ishin krejtësisht shtetërore.
Pjesa tjetër, çfarë bëri Edi Rama? Për pjesën tjetër, ia kishte vënë syrin ose e paguanin, mori një studio zvicerane, UrboPlan dhe ajo bëri masterplanin e kësaj zone.

Studio bënte masterplanin, Shalsi- i cili ka humbur vetëm në martesën e parë tetë apartamente pas divorcit, është e njohur, dhe e meritonte t’i humbiste plotësisht se asnjë nuk e kishte me djersë- Shalsi bënte dëgjesat.

Dhe Edi Rama e la në këtë studim të gjithë zonën, zonë urbane. Dhe kjo zonë u integrua në planin e përgjithshëm të rregullimit të territorit, të cilën e firmosi Sali Berisha në një datë, në një kohë kur Sali Berisha nuk kishte asnjë tagër ligjor, pas dy vendimeve të Gjykatës Kushtetuese, prapa të cilave qëndronte Edi Rama, se ai më kishte paditur mua, për të bërë ndryshimin më të vogël.

Nxirre pak ligjin, se këtu thotë te e para se objektet sportive jepen me koncesion ose privatizohen, por nuk thotë te pronari. Sepse ato ishin të uzurpuar nga mafiozë, ishin të uzurpuara nga të fortë. Dhe nxirrnin fitime prej tyre, shteti nuk merrte asnjë qindarkë. Pronari jo e jo.

Kurse në përputhje me ligjin e kthimit dhe kompensimit të pronave, plotësisht, thotë se objektet sportive privatizohen nga pronarët e truallit, kur ka të tillë, në të kundërt jepen me koncesion në përputhje me ligjin për koncesionet, me kusht që të mos u ndryshojë destinacioni.

Çfarë ka bërë ligji? Ligji ka hapur të drejtën e pronarëve, sepse Paro Laçi, një bandit, me bandën e tij të armatosur, në bashkëpunim me gjeneral Qirjazin që deklaron se ia çova ekipin dhe ma përzuri me forcë, shfrytëzonte terrenet, i merrte tarifa çdo njeriu që hynte në territor dhe i paguante një rrogë këtij apo atij.

Të tilla situata kishte në Ali Dem, te Dinamo, kudo.

Çfarë bëri ligji? Ligji tha se privatizohen ato që kanë pronarë, te pronarët. Por pronari duhet të ruajë destinacionin.

Ky është ndryshimi i vërtetë që do të luajë duart si Pilati, Edi Rama. I cili për mua, me 99 përqind, e ka bërë ndryshimin për një valixhe me euro,” tha Kryetari i Partisë Demokratike ndërsa për gjyqtaren e çështjes Irena Gjoka tha që të mos fshihet, por të deklarojë nëse është shkarkuar nga ai për shkelje të rëndë ligji dhe korrupsion.

“Gjykatësja, turpi i drejtësisë shqiptare, evropiane dhe botërore, nuk duhet të fshihet prapa krimit të saj.
Por të deklarojë në emër të detyrimit ligjor, jo integritetit, se ajo ka zero integritet personal, por në emër të detyrimit ligjor, të deklarojë a është shkarkuar apo jo nga Sali Berisha në vitin 1996, për shkelje të rëndë ligji dhe korrupsion.

Të dalë dhe të deklarojë, nuk mund të fshihet.

Është turpi i njeriut, jo i gjykatëses.

E di çfarë u tha ajo avoketërve? Nuk jap dorëheqjen, tha, se nuk më sollët prova që unë jam shkarkuar.

E kuptoni apo jo? Nuk ka ndërgjegje ajo. Provë, arkivë në ndërgjegjen e saj njerëzore nuk ekziston.

Arkivë në ndërgjegjen e saj njerëzore nuk ekziston për ato që ka bërë.

Tani mbahet me premtimin që i ka dhënë direkt Edi Ramës për masën që ka marrë.

Unë kam qenë kryeministër, president. Gjithë jetën time, ata që kanë punuar me mua, kanë pasur një porosi konstante. Vetëm një. Mos prano asgjë në kundërshtim me ligjin. Kanë qenë ushtarakë, kanë qenë policë, kanë qenë oficerë të shërbimit të sekretë, çfarëdo që kanë qenë.

Porosia më konstante nga Sali Berisha ka qenë mos pranoni urdhra kundër ligjit.

Që të pranoj unë një urdhër të një qenie, ç’t’i thuash se tani nuk dua të lëshoj gojën se ka ca probleme etike që nuk më lejon, e cila fshihet prapa krimit të saj dhe shkelmon Kushtetutën si një turp i drejtësisë, kjo të harrojë se do e pranojmë këëtë gjë. Ajo që u kam thënë gjithë jetën vartësve të mi, ka qenë e njëjtë edhe për mua.,” tha Kryetari i Partisë Demokratike, Sali Berisha, duke përfunduar:

“Asaj zonje i them unë, ki grimcën më të vogël të integritetit moral, profesional, integritetit njerëzor, të tregosh se je shkarkuar apo jo nga Sali Berisha për korrupsion në një datë të caktuar, në një muaj të caktuar në vitin 1996. Dhe nëse e ke deklaruar këto shkarkim në ato deklarimet që ke bërë për vetingun apo nuk e ke deklaruar?

Për të mos thënë ca pyetje të tjera, por po mjaftohem vetëm me me këto. Këto të dyja.

Shkoni, bëjani asaj. Pyeteni se ajo nuk është asgjë tjetër veçse një skllave mjerane në shërbim të Edi Ramës. Dhe unë për çdo skllav, kam mëshirë.”