Distributorët, fitimet u rritën më ngadalë se të ardhurat, supermarketet favorizohen nga rënia euros

Segmenti i distributorëve, i përqendruar në tregtinë me shumicë të mallrave që lëvizin shpejt nga rafti, u përball në vitin 2022 me një rritje të fortë të çmimeve të produkteve që tregtojnë, për shkak të situatës globale të krijuar nga sulmet e Rusisë ndaj Ukrainës.

Rritja e inflacionit, e cila filloi që në gjysmën e dytë të vitit 2021 dhe arriti deri në 8.3% në tetor të vitit 2022, niveli më i lartë në dy dekada, i bëri operatorët pesimistë për një frenim të ri të konsumit, siç shprehen në raportet e tyre vjetore, për shkak të rënies së fuqisë blerëse.

Në kahun tjetër, nënçmimi i Euros i bëri më të lira importet, duke amortizuar disi inflacionin e lartë të importuar.

Ndryshimet demografike, si rrjedhojë e emigracionit, sidomos të të rinjve dhe plakjes graduale të popullsisë, po japin efektet e veta si në zakonet e blerjes së popullsisë, ashtu dhe në gjetjen e fuqisë punëtore të disponueshme.

Në të kundërt, turizmi ka qenë një faktor pozitiv, që ka zëvendësuar “hapësirën” e lënë bosh nga emigracioni.

Konsumi vjetor i popullatës, sipas INSTAT, u rrit me ritmet më të larta në të paktën një dekadë, duke arritur në 7.4%, pas zgjerimit me 4.7% vitin e mëparshëm.

Në këtë ambient, distributorët kanë arritur që të rrisin fitimet në pjesën më të madhe, por gjithsesi për disa, normat e fitimit kanë rezultuar në rënie, teksa të ardhurat, të ndihmuara nga çmimet e shtrenjta, janë rritur me ritme më të shpejta sesa fitimet.

 “AGNA”, kompania më e madhe distributore, ka deklaruar një fitim prej rreth 657 milionë lekësh (rënie 9%), me një normë prej 3.7%, nga 4.3% një vit më parë. “Alfa sh.a.”, pjesë e të njëjtit grup me AGNA, pa një rritje të fitimeve me 9%, në 979 milionë lekë, me një normë kthimi prej 8%, të pandryshuar nga viti i mëparshëm.

Në raportet vjetore, grupi thekson se pasojat e luftës, shtrenjtimi i çmimeve dhe rritja e interesave nga Banka e Shqipërisë do të japin ndikim në konsum. Emigracioni është një faktor që po ndikon në konsum.

“Pritet të ketë një rënie të shitjeve të paktën në sasi, për shkak të reduktimit të konsumit nga rritja e çmimeve dhe faktorëve demografikë”, theksohet në raport.

“Albanian Distribution & Development” rriti fitimet me 6%, në 796 milionë lekë. Norma e fitimit ishte 13.4%, nga 14% vitin e mëparshëm.

Më fitimprurësja në vitin 2022 vijoi të jetë, për të pestin vit radhazi, “Inter Trade & Distribution”, norma e përfitueshmërisë e së cilës ishte 17.4%, nga 17.3%, vitin e mëparshëm (fitime në vlerë prej 436 milionë lekësh, me zgjerim vjetor 10%).

Sipas raportit vjetor, kjo ecuri ka ardhur kryesisht si rrjedhim i faktorëve të brendshëm, që kanë të bëjnë me përmirësimin e strukturës së shitjeve, organizimit të punës, investimeve në teknologji, si dhe shtimit të investimeve të kryera me fondet e furnitorëve dhe vetë kompanisë në marketing dhe promocion.

Një tjetër faktor që ka ndikuar lidhet me nivelin e ulët të kursit të këmbimit, si dhe normës së interesit.

“Elka sa” raportoi rënie të fitimeve me 28%, në 393 milionë lekë, me një normë prej 7.2%, nga 11.2% vitin e mëparshëm.

Ndryshe nga importuesit e tjerë që kanë parë efekt pozitiv nga rënia e Euros, Elka është ndikuar negativisht, teksa 18% të të ardhurave të saj erdhën nga eksportet.

Sipas raportit vjetor, “stabiliteti i kursit të këmbimit do të luante një rol të rëndësishëm në aktivitetin tonë si eksportues, pasi luhatjet e shumta në ulje që ka pësuar kursi i këmbimit, kanë sjellë pasiguri në çmimet e shitjes, duke ndikuar kështu edhe tregjet ndërkombëtare në të cilat ne jemi të pranishëm prej shumë vitesh.

Sidomos gjatë vitit 2022 ka pasur shumë luhatje të kursit, të cilat kanë ndikuar negativisht edhe në rezultatin financiar”.

“Marketing & Distribution” rriti me 76% fitimet në 334 milionë lekë. Edhe norma e fitimit u përmirësua në 3.9% nga 2.4% vitin e mëparshëm. Rritja e të ardhurave me 5.7% dhe mbajtja nën kontroll e shpenzimeve dhanë ndikimin kryesor në rezultatin më të mirë financiar.

“Inter Distribution Service” ka deklaruar rritje të fitimeve me 13%, në 270 milionë lekë, me normë fitimi prej 1.5%, me reduktim të lehtë në krahasim me 1.6% që ishte viti i mëparshëm. Sipas raportit vjetor, “këto rezultate kanë ardhur si rrjedhim i përmirësimit të strukturës së shitjeve, organizimit të mirë të punës, investimeve në teknologji dhe trajnimit të burimeve njerëzore”.

 “Interbrands” raportoi rritje të lehtë të fitimeve me 2%, në 232 milionë lekë. Norma e fitimit ra në 10.2%, nga 11.8% vitin e mëparshëm.

Sipas raportit vjetor, “kanë ndodhur një sërë ndryshimesh në strukturën e produkteve të shitura. Është vënë re gjithashtu rënie e shitjeve të produkteve dhe grup-produkteve të caktuara, si dhe rritje e shpejtë e shpenzimeve, gjë që pa dyshim do të ndikojë në rezultatin financiar”.

“Ferra”, e fokusuar në tregtimin e mallrave ushqimore, kryesisht të sheqerit, orizit, vajit, etj., dhe në aktivitete të tjera dytësore i rriti fitimet me 39% në 230 milionë lekë. Megjithatë, norma e kthimit ra lehtë në 4.8%, nga 4.9% vitin e mëparshëm.

Në raportin vjetor thuhet se “tipar dallues i kësaj periudhe është rritja e të ardhurave nga aktiviteti i shfrytëzimit dhe rritja e shpenzimeve me ritme më të larta se të ardhurat dhe rrjedhimisht ka sjellë rënien e fitimit neto”.

“Teuta Durrës”, që operon në dy sektorë kryesorë, paketimin dhe shpërndarjen e produkteve ushqimore, pa një rënie të fitimeve me 4%, në 183 milionë lekë. Norma e kthimit u reduktua në 6.1%, nga 7.8% vitin e mëparshëm.

Supermarketet shtojnë fitimet

Zinxhirët e mëdhenj të supermarketeve operojnë me norma relativisht të ulëta fitimi, të ndikuara si nga lloji i aktivitetit, ashtu edhe niveli i lartë i informalitetit në tregun e paorganizuar të pakicës.

Gjithsesi, në 2022, ato kanë parë përmirësim të rezultatit financiar, e ndikuar nga shtrenjtimi i çmimeve të pakicës dhe efektit amortizues që ka dhënë rënia e Euros në blerjen e mallrave të importit.

“Big Market”, zinxhiri më i madh i supermarketeve në vend, kishte të ardhura të konsoliduara sipas të dhënave zyrtare, rreth 24.5 miliardë lekë, me rritje 16% në krahasim me vitin e kaluar.

Fitimet u rritën po me 16%, në 1.2 miliardë lekë. Norma e kthimit ishte gati 5%, e pandryshuar nga viti i mëparshëm.

Rrjeti i supermarketeve “SPAR Albania” (pjesë e grupit BALFIN), është zinxhiri i dytë më i madh i supermarketeve në vend. Sipas burimeve nga kompania, të ardhurat e konsoliduara të rrjetit SPAR rezultojnë 16.3 miliardë lekë në vitin 2022, me rritje 19% me bazë vjetore.

58% e të ardhurave vijnë direkt nga “SPAR Albania”, të tjerat nga sistemi franshise. Fitimi para tatimit në total i konsoliduar ishte 650.9 milionë lekë, me një normë fitimi prej 4%.

Gjatë vitit 2022, rrjeti SPAR numëron në total 15 markete të reja.

“Conad Albania” raportoi të ardhura prej gati 4.4 miliardë lekësh, me rritje prej 14.5% në raport me vitin e mëparshëm. Edhe fitimet u zgjeruan me 22% në 544 milionë lekë.

Sipas raportit vjetor, “kursi i favorshëm i këmbimit dhe tendenca pozitive e shitjeve (që lejoi uljen e incidencës së kostove fikse) lejoi një rritje më shumë se proporcionale të rezultatit ekonomik”./Monitor/