Hill: Serbët ta kuptojnë se fati i tyre është në duart e tyre, jo në Washington, Bruksel dhe Pekin

Ambasadori i Shteteve të Bashkuara në Serbi, Christopher Hill, tha sot se serbët duhet të kuptojnë se fati i tyre është në duart e tyre, jo në Washington, Bruksel dhe Pekin.

Në hapjen e konferencës “Bota më 2024” në Beograd, raporton RFE, Hill theksoi se viti 2024 do të jetë kompleks dhe se rezultati i tij do të varet nga shumë faktorë.

“Viti i ardhshëm do të jetë shumë, shumë i rëndësishëm për të gjithë ata që duan të shohin zgjerimin e mëtejshëm të Bashkimit Evropian, dhe, Serbinë në një vend tjetër,” tha Christopher Hill duke shtuar se po shikon vullnetin e mirë në Bruksel.

Serbia u bë kandidate për anëtarësim në BE në mars të vitit 2012. Ajo sot ende e ka atë status dhe negociatat e pranimit u hapën zyrtarisht në janar të vitit 2014.

BE-ja paralajmëron rregullisht se shpejtësia e procesit të anëtarësimit me Serbinë do të varet nga përparimi në dialogun për normalizimin e marrëdhënieve me Kosovën, i cili po zhvillohet nën lehtësimin e Bashkimit Evropian në Bruksel.

“Ka mundësi që dialogu ndërmjet Beogradit dhe Prishtinës të përparojë në muajt në vijim dhe se në këtë kuptim besoj se viti i ardhshëm do të jetë i rëndësishëm për Serbinë,” Ambasadori amerikan në Serbi, Christopher Hill.

Më 27 shkurt 2023, raporotn RFE, Serbia dhe Kosova arritën një marrëveshje për rrugën drejt normalizimit të marrëdhënieve. Për Aneksin e zbatimit të kësaj marrëveshjeje palët ranë dakord në Ohër më 18 mars.

Prishtina dhe Beogradi nuk e nënshkruan marrëveshjen apo Aneksin e zbatimit të saj sepse presidenti serb, Aleksandar Vuçiq, refuzoi të nënshkruante.

Kosova shpalli pavarësinë në vitin 2008, të cilën Serbia nuk e njeh.