A po kërkon Rishi Sunak një marrëveshje për migrantët e paligjshëm me Shqipërinë?

Kryeministri i Britanisë së Madhe, Rishi Sunak nesër do të diskutojë planet radikale për të përpunuar kërkesat për azil të emigrantëve jashtë shtetit.

Ai do të udhëtojë në Romë nesër në mëngjes për një mini samit për migracionin ilegal me kryeministren italiane Giorgia Meloni dhe homologun e saj shqiptar Edi Rama, shkruan e përditshmja britanike Daily Mail.

Më pas ai do të mbajë një fjalim mbi këtë temë në një konferencë politike të organizuar nga partia Vëllezërit e Italisë së zonjës Meloni.
Z. Sunak ra dakord për një marrëveshje historike kthimesh me zotin Rama vitin e kaluar, e cila ka parë që numri i shqiptarëve që kalojnë ilegalisht Kanalin të bjerë me 90 për qind.

Nesër ai pritet të diskutojë një marrëveshje të re që do të bëjë që Italia të dërgojë emigrantë të paligjshëm në Shqipëri për të trajtuar kërkesat e tyre për azil.

Marrëveshja e ashtuquajtur “‘offshoring'”zhvendosje përtej detit” është bllokuar përkohësisht nga Gjykata Kushtetuese e Shqipërisë.

Por nëse kjo mundësohet, 36.000 emigrantë në vit do ti përpunojnë kërkesat e tyre në dy qendra të ndërtuara në Shqipëri dhe që do drejtohen nga Italia.

Downing Street nuk u shpreh sot nëse zoti Sunak është i interesuar për një marrëveshje të ngjashme me Shqipërinë, për tu aplikuar së bashku me skemën problematike të qeverisë në Ruandë.

Një zëdhënës tha se samiti i nesërm do të ‘përqendrohet në partneritetet ekzistuese dhe marrëveshjen e kthimit me Shqipërinë’.

Por një burim konfirmoi se në rend dite do të jetë edhe marrëveshja mes Italisë dhe Shqipërisë.

Italia është në vijën e parë të krizës së migracionit të BE-së, me pothuajse 130.000 të ardhur në nëntë muajt e parë të këtij viti. Sipas marrëveshjes, Italia do të dërgojë deri në 3000 njerëz në muaj në Shqipëri.

Pasi të jenë vlerësuar kërkesat e tyre, Italia do të jetë përgjegjëse ose për rikthimin e tyre ose për dëbimin e tyre.

Skema është e ndryshme nga marrëveshja e Mbretërisë së Bashkuar me Ruandën, sipas së cilës migrantët nuk do të kenë asnjë mundësi për të aplikuar për azil.

Por disa ministra besojnë se një marrëveshje e “zhvendosjes përtej detit” do të ishte më e lehtë për të kapërcyer gjykatat, veçanërisht me një vend si Shqipëria ku tashmë ka një marrëveshje kthimi.

Një burim qeveritar tha më herët se skema e vë theksin tek interesi në rritje i vendeve të tjera evropiane në përpjekjen për të penguar emigrantët e paligjshëm. Gjermania, Danimarka dhe Austria janë ndër shtetet e tjera që shqyrtojnë marrëveshje të stilit të Ruandës.

Bisedimet e së nesërmes nënvizojnë gjithashtu partneritetin politik në lulëzim midis z. Sunak dhe zonjës Meloni. Dy liderët do të zhvillojnë një seancë kokë më kokë përpara se t’i bashkohet zoti Rama për një diskutim më të gjerë.

Z. Sunak më pas do të mbajë një fjalim për trajtimin e migracionit të paligjshëm në takimin vjetor politik të zonjës Meloni, të cilën ajo e organizon nga viti 1998.

Një burim i Whitehall tha se zoti Sunak shkon mirë me zonjën Meloni, e cila erdhi në pushtet në të njëjtën kohë dhe gjithashtu citon Margaret Thatcher që ka një ndikim./Daily Mail/