Organizatë e mirëfilltë kriminale, Berisha: Skapi ngjason si dy pika uji me Sigurimin e djeshëm!

Duke akuzuar Prokurorinë e Posaçme si një organizatë të mirëfilltë kriminale, Kryetari i Partisë Demokratike, Sali Berisha, duke folur para të rinjëve të FRPD, tha se Skapi ngjason si dy pika uji me Sigurimin e djeshëm!

Sot Edi Rama ka në mënyrë absolute çdo pushtet, tha Kryetari i Partisë Demokratike dhe sot Shqipëria pret heronj nga ju e nëse ju ngriheni, Edi Rama do i ketë kohërat e numëruara, tha Sali Berisha para Forumit Rinor.

“Sa herë që më jepet rasti të bisedoj me të rinjtë, është një pyetje e sinqertë që gjithmonë ngrihet, qofshin këta të rinj demokratë, qofshin të rinj indiferentë, qofshin të rinj të bindjeve të tjera.

Kjo pyetje bashkëjeton sot me çdo të ri shqiptar.

Kjo pyetje mundon secilin prej jush pasi përgjigjja ende nuk është e qartë.

Prandaj fjalën time sot do e nis duke u përpjekur t’i jap përgjigje kësaj pyetje që qëndron si barrierë sot mes jush dhe të ëndrave tuaja, të ardhmes tuaj.

Kjo pyetje famëkeqe është: pse është kaq e vështirë t’ia dalësh në Shqipëri? Ose e formuluar ndryshe: pse nuk po ia dal dot në këtë vend dhe po largohem prej tij?

I sigurt kam që çdo i ri e ka pyetur veten për këtë para se të marrë rrugët e dheut.

Arsyeja pse unë nisa fjalën time me këtë pyetje është se përsëri, pavarësisht nga rezultati dramatik i situatës, pyetja kërkon një përgjigje të saktë. Të rinjtë ikin sepse shkollimi i tyre po degradon dhe ky është një realitet.

Për të rinjtë, formimi, qoftë universitar, qoftë parauniversitar, qoftë profesional, është i një rëndësie shumë të madhe për të ardhmen e tyre.

Por studimi i fundit ishte vërtetimi i atyre konstatimi në qindra e mijëra raste se arsimi po degradon me shpejtësi të madhe.

Studimi i fundit i PISA-s gjeti se Shqipëria, në 9-vjeçarin e kësaj qeverie pësoi rënien më të madhe në botë. U rendit e para në degradimin e arsimit. U kthye në vitet 2000.

Imagjinoni nxënësit tanë në arsimin parauniversitar përgatiten jo për vitet 2024, por për vitet 2000.

Përgatiten për 20 vite mbrapa.

Përgatiten për kohën pothuajse të fillimit të internetit apo para internetit.

Rënie katastrofale. Rënie me pasoja shumë të rënda.

Natyrisht, do të ishte e padrejtë në qoftë se do pranonim se vetëm arsimi është shkaku i këtij largimi masiv të të rinjve, i shkretimit të vendit në raport me ju, me moshën tuaj, Shqipëria po shndërrohet në një shkretëtirë.

Besarti dha disa statistika tronditëse, asnjë luftë, asnjë gjendje nuk ka larguar nga ndonjë vend të rinjtë sa ç’janë larguar këto 10 vite.

Përveç arsimit, shpeshherë ju ndodh në mënyrë absurde ju fajësojnë ose vetëfajësojnë, sepse qeveria ka ushqyer një frymë shfuqizuese ndaj jush. Qeveria bën gjithçka që ju të mos ndjeheni të fuqishëm. Ndaj i mëshon me propagandën e saj se janë çuna dhe vajza kafenesh, se janë zdromsa, janë dembela.

Në një kohë kur asnjëra nga këto nuk është e vërtetë. Në një kohë kur kapacitetet tuaja intelektuale janë absolutisht të klasit të parë dhe kjo është e faktuar. Jo me ju, por me studimet e para gjenealogjike dhe antropolitike të shqiptarëve. Askush dhe asnjëherë nuk e ka vënë ndonjëherë në diskutim inteligjencën shqiptare.

Këtu ngjallet një frymë antirini e qëllimshme dhe me këtë frymë synohet të largohet rinia nga Shqipëria.
Rikujtoni për një moment Edi Ramën, ministrat e tij, nuk e përmendin kurrë fjalën rini. Nuk ekziston për ta fjala rini. Ekziston vetëm kur i duhet pr të mbushur sheshet në koncerte për qëllime elektorale, por për asgjë tjetër.

Se për Edi Ramën, interesi absolut është se të rinjtë, që nuk mund të pajtohen me një qeverisje të tillë dhe me pasoja të tillë, të largohen nga Shqipëria.

Por në qoftë se ju dhe çdo i ri shtron pyetjen me të drejtë pse nuk ia dalim në këtë vend, në një kohë kur ju garantoj se në çdo vend tjetër që të shkoni në Europë, kurrë nuk do gjeni një tokë me potenciale të jashtëzakonshme si ky vend. Pasuritë e Shqipërisë në kaq sipërfaqe, nuk i ka asnjë vend tjetër.

Potenciali i saj turistik është i pakrahasueshëm sepse ka një kombinim mahnitës të alpeve dhe maleve me brigjet më të bukura që ekzistojnë në rajon. Sepse ka një tokë të pakët, por shumë pjellore. Sepse ka rezerva të mëdha minerale, ka fushat më të mëdha të naftës onshore në Europë.

Pra, jetohet midis gjithë këtyre pasurive dhe megjithatë, Shqipëria nuk jep shansin që ju ta ndërtoni këtu ëndrrën tuaj.

Shqipëria nuk është një vend i mallkuar, por një vend i tradhtuar. I tradhtuar në themelet e lirive dhe të drejtave të tyre. I tradhtuar në ato parime, pa të cilat vendi nuk është më i yti. Pa të cilat, ti detyrohesh të kërkosh një strehë tjetër. Dhe kjo ndodh sot.

Në aparencë, Shqipëria është një vend i lirë, por kjo është absolutisht një liri e rremë. Kjo është një liri e rremë. Shqipëria nuk është një vend i lirë.

Shqipëria sot, njëlloj si në diktaturën komuniste, ka të gjitha të pushtetet e saj në dorën e një njeriu. Pa përjashtim.

U them unë ju, nga memoria dhe eksperienca ime, Shqipëria pati dy diktatorë gjatë diktaturës komuniste, Enver Hoxhën dhe pasardhësin e tij. Enver Hoxha i kishte të gjitha në dorë, por pasaardhësi nuk i kishte të gjitha pushtetet në dorë. Pavarësisht se përpiqej, por sërish nuk i kishte.

Sot Edi Rama ka në mënyrë absolute, në mënyrën më të verbër, çdo pushtet.

Ju jeni dëshmitarë, ndoshta keni ndjekur procesin e tij ndaj meje. Një proces pa asnjë fakt, pa asnjë dokument, pa asnjë firmë të Sali Berishës në privatizimin e një kompleksi me qindra pronarë, njëri prej të cilëve ishte dhëndri im, Jamarbër Malltezi. Asnjë firmë. Një proces i filluar në vitin 1995, i përfunduar në vitin 2009 në përputhje me të gjitha ligjet e vendit.

Në këtë proces ka diçka shumë të veçantë, ky që ka marrë tokën e tij dhe është një i 500 mijti pronar që ka marrë trojet dhe ka marrë 400 metra nga 1 miliard e 577 milionë e 400 mijë metër katrorë tokë që qeveria, në përputhje me programin e saj, ua dorëzoi pronarëve legjitimë. Ky vihet në gjendje arresti.

Vetë Edi Rama, me firmën e tij, me 4 vendime qeverie, merr nga toka e kësaj familje, të cilët fisnikërisht e kishin dhuruar për shkollë komuniteti, 1500 metër katrorë tokë. Po si i merr? Me 4 firma. Ky që mori 400 metra nuk ka asnjë firmë të Sali Berishës. Kurse ky tjetri, për të marrë 1500 metra, vendos 4 firma njëra pas tjetrës, dhe burgos këtë, njëlloj siç burgosën në vitin 1946, paraardhësit e tij,” tha Sali Berisha duke e akuzuar Skapin si një organizatë të mirëfilltë kriminale.

“Për të kuptuar ngjashmërinë mes diktaturës së sotme dhe diktaturës së djeshme, se ju jeni fatlumë, asnjëri prej jush nuk e jetoi atë diktaturë dhe është fat i madh.

Por problemi është se sot jemi prapë në diktaturë dhe kjo kërkon vetëdijen tuaj të plotë.

Përpara ne kishim Sigurimin e Shtetit, i cili fajësonte njerëz pa faj, me një qëllim të vetëm, që të ushtronte terror në shoqëri.

Sot kemi Skapin.

Çfarë ishte Sigurimi? Sigurimi përbëhej nga kriminelë, nga torturues, nga vrasës, nga përdhunues.

Përbëhej nga një vulg njerëzor ndaj dhe ata ishin të aftë të zbatonin çdo urdhër.

Por çfarë është Skapi sot?

Ngjason si dy pika uji me Sigurimin e djeshëm. Skapi sot është një organizatë e mirëfilltë kriminale që rëndom paraqitet si një risi. Po pse them se është organizatë kriminale?

Sepse aty janë rekrutuar prokurorë, përfaqësues të bandave më të rrezikshme të Shqipërisë.

Aty është prokurori që u tha shqiptarëve se Mehmet Greca, trafikanti që kishte mbushur makinën me fletë votimi dhe euro dhe karta identiteti në Elbasan, nuk kishte asgjë në makinë. Dhe ai u shpërblye nga bosi i tij i krimit, Taulant Balla dhe u soll në Skap.

Skapi është organizatë kriminale sepse vrasësi që vrau jashtë çdo lloj tradite njerëzore në gjumë të fejuarën e tij 15-vjecare, në vend që të dënohej me dënim përjetë, doli nga burgu sikur nuk ka kryer krim. Skapi tha: jo, këta nuk janë organizatë kriminale. E dërguan në Shkodër, ku shoku i tyre kishte marrë milionat dhe ata dolën të lirë.

Ose, ish-oficeri i Sigurimit të Shtetit, Arben Kraja qëndron në Skap. Ligji thotë nuk mund të jenë në prokurorinë e shtetit ata të cilët kanë qenë bashkëpunëtorë ose oficerë të Sigurimit të Shtetit. Por ligji nuk ekziston për ta, ekziston vetëm vullneti i Edi Ramës për t’i përdorur si mercenarë.

Të njëjtën figurë kanë krijuar dhe po krijojnë te gjykatësit. Pra, Edi Rama ka vendosur një kontroll të plotë dhe total mbi të gjitha pushtetet.

Por ëndrra e tij është kjo. Një Shqipëri pa rini, një Shqipëri pa opozitë.

Në qoftë se një Shqipëri pa rini, po e realizon me largimin e të rinjve nga Shqipëria, Shqipërinë pa opozitë e realizoi duke blerë ish-kreun e opozitës.

Natyrisht shpirti opozitar nuk u ble dot nga Edi Rama dhe gjatë dy viteve dhe këtu duhet ta them, që drejtuesit tuaj kanë një meritë të veçantë se qenë më të parët që u rreshtuan në shpëtimin e PD-së. Ua them unë ju.

Por pasi e pa se i doli jashtë kontrollit, pasi e pa se ëndrra e tij po bëhej pluhur, ëndrra e tij për një Shqipëri pa opozitë, pasi e pa se kjo opozitë e vërtetë do e groposte siç e meriton, ai kaloi në veprime ekstreme ndaj saj. Në mohimin e të drejtave themelore të opozitës, pa të cilat ajo nuk është opozitë. Ajo është fasadë, ajo është një opozitë në letër, por kurrë një opozitë e vërtetë.

I mohoi në parlament të drejtën e komisioneve parlamentare,” duke e cilësuar atë që ndodhi në Gjykatën Kushtetuese si vdekje përfundimtare të sistemit demokratik.

“Edi Rama vendosi të bllokojë në mënyrën më diktatoriale njëri pas tjetrit, tetë kërkesa të opozitës për komisione hetimore parlamentare.

Pse e bëri këtë? Sepse ai vetë është në epiqendër të hetimeve për të gjitha aferat.

Edi Rama është nëna e të ligave në këtë vend. Është mobodiktatori. Diktatori me bandë, jo me ideologji.

Ju e patë se si Pëllumb Gjoka, nga një vrasës i urryer, nga një trafikant, u shndërrua në investitor strategjik.
Sepse mobokracia është sundimi në të cilin krimin vendos kudo. Vendos në rrugë, në zyrat e qeverisë, në qelitë më të sigurta të narkokraturës dhe vret. Vendos në parlament. Vendos kudo.

Ndaj dhe ai tani përpiqet me çdo kusht të asgjësojë opozitën. Pasi i ka mbyllur në parlament të gjitha të drejtat, me Gjykatën Kushtetuese absolutisht që do ia kishte lakmi, gjykata e Adolf Hitlerit dhe gjykata e Edi Ramës, arriti në mënyrë të paimagjinueshme të mbyllë dhe dritaren e fundit të opozitës. E fundit kishte ngelur.

Çfarë i kishte ngelur opozitës në rrugë ligjore? I kishte mbetur drejtimi në Gjykatë Kushtetuese.

Kushtetuta përcakton 4 subjekte me të drejtë të pakushtëzuar për t’iu drejtuar Gjykatës Kushtetuese. Në një farë mënyre 4 roje të rendit kushtetues, që mund t’i drejtohen kur shohin se ka çështje madhore, kësaj gjykate, garante e Kushtetutës, për të vlerësuar.

Ç’bëri gjykata e Edi Ramës? Ata janë të shkolluar, ata e njohin Kushtetutën. Por çfarë firmosën 3 ditë më parë? Ata i hoqën pakicës të drejtën e pakushtëzuar vetëm e vetëm për të mbrojtur pushtetin e Edi Ramës.

Thanë jo, Kushtetuta nuk ua njeh këtyre një të pestës së deputetëve, që ua njeh vetëm atyre, ia njeh parlamentit, që nuk ia njeh aspak parlamentit.

U ndala në këtë aspekt, ajo që ndodhi në Gjykatë Kushtetuese ishte vdekja e ëmbël, ta quajmë në thonjëza, përfundimtare e sistemit demokratik.

Ajo që ndodhi, ata gjykatës firmosën mbylljen përfundimtare të të drejtës së opozitës për të mbrojtur interesin publik.”

Në fund, duke ju të drejtuar të rinjve të FRPD, Kryetari i Partisë Demokratike tha se Shqipëria pret heronj nga ata dhe nëse ngrihen, Edi Rama do i ketë kohërat e numëruara.

“Sot Shqipëria pret heronj!

Ju garantoj se ajo i pret nga ju.

Këta heronj, si gjithmonë kanë qenë të rinjtë. Ka qenë Azem Hajdari, heroi i kohës së tij, që guxoi, doli me 8 dhjetor në shesh.

Diku kam shkruar sepse u ndodha përballë tyre dhe çfarë ndjenjash më ngjalli? Aty pashë heronj sa kurrë në jetën time, sa në asnjë film, sa në asnjë roman. Kjo ishte e vërteta.

Se ata kishin dalë në sheshin e mejdanit, u përballën dhe fituan.

Studentët nisën një betejë të shkëlqyer në vitin 2018. Tani unë i pyes ata, u pyes ju dhe i ftoj të pyesni secilin prej tyre. Çfarë fituat nga ajo lëvizje?

Në qoftë se nga lëvizja e viteve ‘90, studentët çelën një epokë për kombin dhe vendin, çfarë u fitua nga lëvizja e vitit 2018? Secili student sot paguan një tarifë më të shtrenjtë se më përpara, secili prej jush sot paguan një qira më të shtrenjtë se ajo që paguanit, secili nga ju sot shpenzon shumë më tepër për një vit shkollor sesa bashkëmoshatarët tuaj në Vjenë, Paris, Romë, prindërit e të cilëve janë pakrahasimisht shumë më të pasur se prindërit tuaj.

Pra, ajo lëvizje u tradhtua. Ato premtime u përdorën për mashtrim.

Çfarë ndodhi me studentët e mjekësisë? Një urdhër i marrë hua nga Maduro i Venezuelës.

Të gjitha këto janë një kushtrim për ju. Të gjitha këto janë një shans i madh për ju.

O sot o kurrë duhet të ngrihemi kundër kësaj diktaturë.

Të gjitha këto kërkojnë nga ju të ndjeheni luftëtarë lirie, misionarë, në një mision hyjnor dhe njerëzor. sepse liritë dhe të drejtat e individit janë sa njerëzorë, aq edhe hyjnore.

Sot, më shumë se kurrë kërkohet që të jeni ju protagonistët kryesorë në këtë betejë.

Dhe dy gjëra do u them. Edi Rama kontrollon të gjitha pushtetet dhe në pamje të parë është i stërfuqishëm. Ju garantoj se ai është një kalbësirë, është një statujë e kalbur që nuk pret asgjë tjetër për t’u rrëzuar përveç vrullit, guximit, mosbindjes civile.

Ai e kuptoi sapo ëndrra e tij për Shqipëri pa opozitë u bë pluhur, ai e kuptoi që nuk do i rezistojë kurrë opozitës së vërtetë. Ndaj u hodh në veprimet më të dëshpëruese.

Por ai qëndron dhe do qëndrojë për sa kohë ne nuk do ngrihemi fuqishëm, ju nuk do ngrihemi fuqishëm.

Për sa kohë heronjtë e vërtetë do të rrinë në një apati apo do pajtohen me regjimin e tij,” tha Kryetari i partisë Demokratike, Sali Berisha, para duke FRPD, duke përfunduar:

“Ndaj ju ftoj ju, ftoj të gjithë të rinjtë shqiptarë në emër të dinjitetit tuaj, asnjëri të mos mendojë se ka dinjitet në rast se të drejtat kushtetuese shkelmohen. Dinjiteti i pëlqen çdo njeriu, por garanti i dinjitetit të tij është Kushtetuta, e cila përcakton respektin e dinjitetit si shtyllë themelore të saj.

Asgjë nuk ka liria më thelbësore sesa dinjiteti. Ndaj dhe ne duhet të mendojmë për këtë.

Në qoftë se të rinjtë tanë vendosin të realizojnë ëndrrën e tyre, të rikthejnë shpresën për shqiptarët, Edi Rama do i ketë kohërat e numëruara. Dhe unë jam i bindur se ju do i jipni atij shumë shpejt përgjigjen e merituar.”