Presidentja e Kosovës: FSK e gatshme të fitoj betejat në një rajon me sfida e kërcënime komplekse!
Ju keni rrënjosur kompetencat themelore ushtarake të nevojshme, për të fituar të gjitha betejat, në një rajon e botë me sfida e kërcënime komplekse, tha Presidentja e Kosovës, Vjosa Osmani, në ceremoninë e certifikimit të ushtarëve të rinj të Forcës së Sigurisë së Kosovës, duke shyuar se tashmë besnikëria, nderi, integriteti dhe guximi janë mishëruar në shërbimin e FSK ndaj vendit.
Me këtë rast, Presidentja e Kosov premtoi program shtetëror të bazuar në 7 shtylla kyçe për përmirësimin e kushteve të punës dhe jetës së rekrutëve.
“Realizimi i pagesave të shtesave në paga për rrezikshmëri, realizimi i pagesave të punës me ndërrime, të kujdestarisë apo punën jashtë orarit, shërbimi i sigurimit jetësor dhe shëndetësor, ndërtimi dhe funksionalizimi i spitalit ushtarak deri në nivelin terciar për ushtarakët, policët dhe familjet e tyre si dhe për familjet e ushtarëve dhe policëve të rënë në detyrë, dëshmorëve, invalidëve dhe veteranëve të UÇK-së,” renditi Vjosa Osmani disa nga pikat si dhe sigurimin e një banimi të përballueshëm nëpërmjet një programi të veçantë dhe krijimin e fondit kreditues me kushte të veçanta për ushtarët e FSK-së.
“Jam krenare që ju sot do të mbani uniformën e forcave tona, jam krenare që jeni trashëgimtarë të UÇK-së dhe jam krenare veçanërisht me hapin e parë që hodhët në pragun e komandës së doktrinës së stërvitjes, duke prekur ëndrrën tuaj për t’u bërë ushtarë të FSK-së dhe duke filluar rrugëtimin tuaj plot sfida,” tha Presidentja Osmani duke folur dhe për besnikërinë, nderin, integritetin dhe guximin që tashmë janë mishëruar në shërbimin e FSK ndaj vendit ndërsa përfundoi:
“Përmes programit ushtarak keni rrënjosur kompetencat themelore ushtarake të nevojshme, për të fituar të gjitha betejat, në një rajon e botë me sfida e kërcënime komplekse si dhe me frymëzimin e duhur për përsosmëri të duhur profesionale dhe shërbim ndaj qytetarëve.”
Ndërsa Kryeministri Albin Kurti duke theksuar se kjo gjeneratë e rekrutëve të Forcës së Sigurisë së Kosovës është e veçantë sepse janë numri më i lartë i diplomuarve, ai tha se ndjehet krenar me ushtarët e FSK-së.
“Ushtria jonë po rritet e do të zhvillohet në vazhdimësi me të rinj e të reja si ju që dëshirojnë t’i shërbejnë atdheut, pikërisht si shqiponja sy patrembur që qëndisur si emblemë keni në krahë e që me nder e krenari bartni uniformën e FSK-së,” tha Kryeministri i Kosov duke përfunduar:
“Kjo ndjenjë krenarie është rrjedhojë e një pune të madhe ekipore: Investimet ministrore në trajnimet e shkollimet e ushtarakëve dhe furnizimet me armatime e pajisjeve të tjera, më shumë se kaq, investimin tuaj shpirtëror dhe gatishmërinë për ta mbrojtur atdheun dhe të ardhmen e tij. Nga sot jeni shtylla e radhës e Forcës së Sigurisë së Kosovës.”
Ndryshe, sot me parakalime ushtarake u zhvillua ceremonia e certifikimit të 325 ushtarëve të rinj të Forcave të Sigurisë së Kosovës. Kjo është gjenerata e dytë që certifikohet me përfundimin e stërvitjeve ushtarake bazë.
