Në zgjedhjet e sotme përcaktohet e ardhmja e botës. Dhe, ky është vetëm fillimi…
Sot në Taiwan zhvillohen zgjedhjet parlamentare dhe presidenciale, që nga analistët vlerësohen shumë të rëndësishme për shkak të marrëdhënieve të Taiwanit, Kinës dhe SHBA.
“Në zgjedhjet në Taiwan po përballen dy opsione politike, njëra për pavarësinë e Taiwanit dhe tjetra për politikë më racionale ndaj Kinës për t’ju shmangur përshkallëzimeve. Këtë opsionin e dytë, Kuomintang, e akuzojnë për përafrim me Kinën që do të cenonte aleancën me Shtetet e Bashkuara,” vlerësojnë ekspertët ndërsa për opsionin e parë parashikohet:
“Nëse fiton partia e cila angazhohet për pavarësi, përshkallëzimi në marrëdhënie me Kinën do të vazhdoj, madje do forcohet. Përshkallëzimi rreth Taiwanit i përgjigjet Washingtonit sepse kjo është një mënyrë e shpërqëndrimit të Kinës edhe në këto marrëdhënie strategjike.”
Nëse fitojnë mbështetësit e pavarësisë së Taiwanit pritet një tensionim i situatës deri sa një fitore e Kuomintang mendohet se do të ndryshonte shumëçka, jo vetëm në Taiwan.
Ndryshe, në këtë vit superzgjedhor, në zgjedhje do të dalin 40 shtete ose rreth dy miliardë votues me të drejtë vote në Bashkimin Europian, SHBA, Rusi, Indi etj. dhe sipas të gjitha gjasave edhe në Mbretërinë e Bashkuar, ku afati i fundit për zgjedhje parlamentare është janari i vitit 2025!
Analistët në mbarë botën kanë filluar me parashikimet se si do të ndikojnë zgjedhjet në politikën globale. Pritet dominimi i së djathtës në Bashkimit Europian, fitorja e Donald Trump në SHBA, rizgjedhja e Vladimir Putin në Rusi ndërsa vend me rëndësi në këto analiza ka zënë dhe India, ku pritet fitorja e kryeministrit aktual Marendra Mondi me partinë e tij hindu Bharatiya Janata, e cila zbaton një politikë të ashpër nacionaliste që kundërshtohet nga myslimanët që jetojnë në këtë vend.
