Mitrovicë Veri, Lista Srpska nxjerr serbët në protestë kundër vendimit të BQK

Se sa me vend është vendimi i Bankës Qendrore të Kosovës, BQK, pse u duhet lënë kohë qytetarëve serbë që të kuptojnë vendimin, dhe pse Kryeministri Albin Kurti ka të drejtë që kërkon ti jepet fund pagesave të paligjshme edhe në dinar, tregon protesta e sotshme në veri të Mitrovicës, për të cilën u tha se u organizua nga Shoqata e Pensionistëve Serbë, por, në krye të saj nuk ishin pensionistët por liderët e Listës Srpska, e cila mori përgjegjësinë për sulmin terrorist të 24 shtatorit në Banjskë.

Prezenca e liderit të Lista Srpska, Igor Simiç, dhe parulla “e pensionistëve” mbrapa kokës që i qëndronte, “Pensionin e kam fituar gjatë gjithë jetës, dhe nuk ja jap Kurtit” tregon se sa të manipuluar janë serbët në veri, që sot në protestën e radhës kundërshtuan rregulloren e Bankës Qendrore të Kosovës, e cila përcakton përcakton se Euro është valutë e vetme e vlefshme në Kosovë.

Ndërsa edhe para fillimit të protestës, sindikata që përfaqëson punëtorët që punojnë sipas sistemit paralel serb, duke ftuar punëtorët e arsimit, shëndetësisë, postës dhe minierës Trepça, tha atë që Vuçiç thotë çdo ditë: “Kundërshtojnë lëvizjet e njëanshme përshkallëzuese që synojnë dëbimin e popullatës serbe nga Kosova”!

Veçori e protestës së sotme serbe ishte se nga folësit nuk ishte asnjë njeri normal, të gjithë nga Lista Srpska dhe prezent në çdo protestë që nga dita e parë e krimeve serbe pas çlirimit të Kosovës në qershorin e vitit 1999.

Ndërkohë ai që foli në emër të punëtorëve shëndetësorë, Dragisha Miloviç, që përndryshe është Nënkryetar i Listës Srpska, si gjithmonë edhe sot gënjeu qytetarët serbë duke u thënë se ky vendim ka në shënjestër popullin serbë dhe ka për qëllim zhbërjen e institucioneve serbe në këto zona.

“Serbia ka të drejtë të financojë qytetarët e saj, për çka është rënë dakord me marrëveshjen e Brukselit në vitin 2013 dhe 2015, dhe aty thuhet se financohen shkollat, kopshtet, spitalet, pushtetet lokale, të cilat në fakt janë themelet e Asociacionit të komunave me shumicë serbe. Por, për fat të keq, ai Asociacion që është dashur të formohet 11 vjet më parë, shohim se Prishtina ende nuk dëshiron ta formojë, dhe Brukseli, që është garantuesi i zbatimit, hesht,” tha Miloviç në protestën e cila zgjati më pak se një orë por i dha mundësinë atij të hedhë një lum gënejshtrash për vendimin e BQK, për të cilin ftoi ambasadorët e shteteve të Quintit që ta shfuqizojnë.

Ndërkohë Kryeministri i Kosovës, Albin Kurti, në një intervistë për “Bloomberg” në Londër ka deklaruar se i qëndron prapa rregullores së re të Bankës Qendrore të Kosovës për zbatimin e Euros si monedhë e vetme e vendit dhe qeveria nuk do të ndërhyjë në zbatimin e rregullores së BQK, e cila hyri në fuqi më 1 shkurt.

“Tani, edhe partnerët tanë amerikanë dhe evropianë po thonë se rregullorja është ligjore sepse po lufton financimin e terrorizmit, aktivitetet e paligjshme, por ne nuk duhet të ngutemi shumë në zbatimin e plotë. Dhe kështu do të veprojmë gjatë shkurtit,” tha Albin Kurti duke saktësuar se serbëve do t’u jepet kohë për t’u përshtatur dhe se nuk do të ketë asnjë lloj mase ndëshkuese, pasi nuk është ky qëllimi.

Ndryshe, Banka Qendrore e Kosovës ka miratuar një rregullore, sipas së cilës, duke filluar nga 1 Shkurti 2024, “valuta e vetme e lejuar të përdoret për kryerjen e transaksioneve të pagesave me para të gatshme dhe në sistemin e pagesave në Republikën e Kosovës është euro, si valutë e vetme edhe në kuptim të nenit 11 të Kushtetutës së Republikës së Kosovës dhe neneve 16, 17 dhe 18 të Ligjit Nr. 03/L-209 për Bankën Qendrore të Republikës së Kosovës”.