Dimër ekstrem në Mongoli, ngordhin mbi dy milionë kafshë

Mbi dy milionë kafshë kanë ngordhur gjatë këtij dimri në Mongoli, bëri të ditur sot një zyrtar i qeverisë ndërsa vendi po përballet me të ftohtin ekstrem dhe reshje të dendura bore.

Temperaturat e ulëta ekstreme nga muaji nëntor deri në muajin mars nuk janë lajm për vendin aziatikolindor, ku në disa zona temepraturat shkojnë deri në -50°C .

Por, ky dimër ishte më i ashpër se zakonisht, me temperatura shumë më të ulëta se zakonisht dhe reshje të dendura bore, thuhet në raportin e Kombeve të Bashkuara. Gantulga Batsaikhan nga ministria e Bujqësisë tha se deri më sot nga uria dhe lodhja kanë ngordhur 2.1 milionë kokë bagëti.

Mongolia në fund të vitit 2023 kishte 64.7 kokë bagëti, duke përfshirë këtu dele, dhi, lopë dhe kuaj, tregojnë të dhënat zyrtare.

Këto kushte ekstreme të motit, që në Mongoli quhen “zud”, zakonisht shkaktojnë ngordhjen e një numri të madh të kafshëve shtëpiake.

Kombet e Bashkuara thanë se ndryshimet klimatike janë duke rritur numrin e rasteve të zudit. Mongolia në dekadën e fundit është përballur me gjashtë zud, duke përfshirë këtu atë të dimrit të vitit 2022/2023 kur ngordhën 4.4 milionë kokë bagëti.

Këtë vit, zudi u përkeqësua me thatësirën e verës e cila i ka pamundësuar kafshëve që të krijojnë rezerva të yndyrnave që do ti ndihmonin për të përballuar dimrin e acart.

Në Mongoli, 70 për qind e vendit po përballet me “zudin” ose kushtet e ngjashme, raporton OKB. Në të njëjtën periudhë të vitit të kaluar, kjo shifër ishte vetëm 17 për qind, raporton Agjencia e lajmeve AFP

Ndryshe, zudi më i ashpër është shënuar në dimrin e vitit 2010/2011 kur kanë ngordhur mbi 10 milionë kokë bagëti, që ishte dhe 1/4 e gjithë bagëtive që kishte Mongolia.