Çmendet Patriarku Irinej: Mali i Zi, kjo tokë serbe, dërgon ushtarë në Kosovë, për të mirën e atyre që me qindra vjet kanë rrënuar, djegur dhe plaçkitur…
Patriarku i Serbisë, Irinej vlerësoi se Kisha Ortodokse Serbe në Mal të Zi trajtohet më keq se në kohën e Perandorisë Osmane, ndërsa statusi i serbëve si në kohën e krijesës famëkeqe fashiste Shtetit të pavarur Kroat, NDH. E për të dëshmuar se nuk është kot kryepeshkop i Serbisë, kështu e komenton për gazetën “Dan” vendimin e qeverisë malazeze që të dërgoj ushtarët në Kosovë në kuadër të KFOR-it.
“Mali u Zi të dërgoj ushtarë në Kosovë për ti qetësuar serbët dhe kush e di se çfarë do bëjnë atje, mendja e shëndoshë këtë nuk e kupton. Aq më shumë që këtë e bënë Mali i Zi, që është tokë ortodokse, tokë serbe, që të bëjë një vepër të tillë për të mirën e atyre që me qindra vjet kanë rrënuar, djegur dhe plaçkitur dhe tani edhe i ndihmon në këtë vepër të paligjshme”
Por kryepeshkopi i Kishës Ortodokse të Serbisë, Irinej nuk ndalon me kaq edhe pse kisha për të cilën ai flet në Mal të ZI është ilegale. Ai akuzon zyrtarët e shtetit malazez të cilët theksuan se jo prona e kësaj kishe, por çdo pronë që nuk legalizohet do të konfiskohet në rast se nuk respektohen afatet ligjore.
“Duke lexuar diçka për këtë çështje, mendoj se është e paimagjinueshme për kohën që po jetojmë. Sikur ta bënin këtë turqit ose ustashët në kohën e tyre, kjo mund të kuptohej. Por të bëhet sot në kohën e paqes dhe lirisë, në kohën kur sundojnë parimet e ligjit dhe ligjshmërisë, kjo është e papranueshme, jo vetëm në Evropë por edhe në Azi,” tha Irinej me një gjuhë ordinere ashtu siç u shpreh një ditë më parë edhe presidenti i Serbisë për shtetin malazez.
Por Irinej vazhdoi me gjuhë kërcënuese për mbrojtjen e asaj që ai vazhdon ta quaj Mitropoli malazezo-bregdetare, e që ekzistonte vetëm në kuadër të shtetit të Jugosllavisë, ndërsa akuzoi Podgoricën edhe për trajtimin që i bënë serbëve ndonëse nuk është i informuar mirë.
“Unë nuk jam shumë mirë i informuar, por siç dëgjoj, statusi i serbëve në Mal të Zi nuk është i mirë. Për fat të keq! Ai është një popull që është i ndarë. Ti trajtosh në këtë mënyrë serbët në Mal të Zi është e pakuptueshme,“ tha ai për gazetën “Dan” duke krahasuar këtë trajtim me kohën e fashizmit kroat.
“Do ta krahasoj këtë trajtim të serbëve me atë në Kroaci, në kohën e NDH-së. Për fat të keq edhe sot në Kroaci trajtimi i serbëve nuk është më mirë. Ndoshta kjo armiqësi në Mal të Zi nuk është siç ishte tek ustashët, por urrejtja në popull ekziston,“ përfundoi Irinej me vrerin e tij kundër çdo gjëje joserbe që frymon në këtë botë.
