Vdiq KiE! Rroftë zhgënjimi!

nga Agim Popoci

Jetësimi i paralajmërimit të Presidentit të Serbisë, Aleksandar Vuçiç, se Italia, Franca dhe Gjermania do të bllokojnë në Komitetin e Ministrave anëtarësimin e Kosovës në Këshillin Evropës ndonëse ishte votuar në Asamblenë Parlamentare të KiE, pasoi me një zhgënjim mediatik kosovar të pakuptueshëm i cili u shoqërua me kryqëzimin e Kryeministrit Albin Kurti për këtë rast historik të humbur pse ai nuk themeloi Asociacionin siç e kërkonte Perëndimi!

I pakuptueshëm, pasi që për mosanëtarësimin e Kosovës në Këshillin e Evropës shqiptarët nuk kanë pse të shqetësohen, sepse në çdo hallkë të lëvizjes deri te anëtarësimi i plotë në KiE, si në rastet me UNESCO dhe Interpolin, ishte krimi serb ai që luftoi përpjekjet e Kosovës edhe për anëtarësimin e Kosovës në një organizëm si Këshilli i Evropës, që qëllimin kryesor e ka ruajtjen e sundimit të ligjit dhe demokracisë, dhe ishin demokracitë perëndimore që iu nënshtruan këtij krimi, dhe, jo Kosova!

Pse Qeveria e Kosovës nuk themeloi Asociacionin dhe sot do të ishte anëtare e KiE?!

Pavarësisht se këtë kërkesë të drejtëpërdrejtë e kishin Italia, Franca dhe Gjermania, pse duhet kërkuar llogari nga Albin Kurti pas sqarimit të hartueses së rekomandimit të deputetes greke Dora Bakoyannis, në Asamblenë Parlamentare të KiE.

Bakoyannis me një karrierë në diplomaci shumë më shumë se sa kolegët që i ka në Komitetin e Ministrave të KiE e tha qartë se themelimi i Asociacionit të komunave me shumicë serbe në Kosovë nuk është çështje në duart e Këshillit të Evropës por kompetencë e brendshme e Kosovës, si një gur themel në procesin e dialogut mes Kosovës dhe Serbisë që e udhëheqë BE, dhe si i tillë ai u miratua!

Nëse dikush është i bindur se Albin Kurti duhet kryqëzuar pse nuk dëgjoj Scholz e Macron dhe nuk themeloi Asociacionin, kjo është tjetër çështje; Por, pse nuk e themeloi Asocacionin, atij as nuk mund ti kërkohet llogari dhe as të dekorohet pse ai iu përmbajt zotimeve nga Marrëveshja e Ohrit!

Sidoqoftë, Këshilli i Evropës nuk vdiq pse Kosova nuk u bë anëtare e saj, pse  Italia, Franca dhe Gjermania nuk e lejuan Kosovën të anëtarësohet, dhe as nuk shpëtoi pse Serbia vazhdoi të qëndroi si anëtare e saj, siç kishte kërcënuar Presidenti serb Aleksandar Vuçiç se do të largohej nëse anëtarësohet Kosova!

Dhe, askush nuk u thotë shqiptarëve që nuk duhet të zhgënjehen pse Kosova nuk u bë anëtare e Këshillit Evropës! Por, shqiptarët duhet ta kenë parasysh se në vitin jo të largët 1950, qeveritë e themeluesve të KiE firmosën në Romë, Konventën për mbrojtjen e të drejtave të njeriut dhe lirive themelore, e njohur si Konventa Evropiane për të Drejtat e njeriut, ku në krye të herës theksohet: ”Duke pasur parasysh se qëllimi i Këshillit të Evropës është arritja e unitetit sa më të madh në mes të anëtareve të saj dhe se ruajtja dhe zhvillimi i të drejtave themelore dhe lirive njëra ndër mënyrat drejt të cilit qëllim duhet bërë përpjekje…”

Kosova duhet të jetë anëtare e KiE pikërisht për shkak të këtyre synimeve sepse me firmosjen e kësaj Konvente ajo detyrohet që përveç këtyre qëllimeve, të pranoj dhe kompetencat e Gjykatës Evropiane për të drejtat e njeriut me seli në Strasburg, që është dhe kundërshtari më i madh i krimit serb, përveç se një portë e madhe e drejtësisë për të gjithë ata shqiptarë që vuajnë gjykatave kosovare për njohjen e pronave të tyre legjitime!  

Kosova anëtare e KiE do të jetë edhe me qytetarët serbë më të relaksuar për të drejtat e tyre, sepse nuk do të kërkojnë ndihmë më nga radoiçiçët që kanë në veri dhe as nga shefi i tyre që kapardiset në Beograd për shkak të interesave të momentit të Perëndimit në Evropën Juglindore, ndonëse Serbia renditet e teta me numrin e padive që ka në Gjykatën e Strasburgut nga qytetarët e saj, pas Turqisë, Rumanisë, Ukrainës, Hungarisë, Italisë, Polonisë dhe Rusisë.   

Për ata që injorojnë prezencën e krimit serb në këtë proces, duhet theksuar se Këshilli i Evropës përkatësisht Banka për zhvillim social të KiE, përveç luftës për të drejtat e njeriut dhe demokracinë, themelon dhe siguron disa fonde dhe mjete financiare për fushat e kulturës dhe shoqërisë civile, e cila vetëm në muajin mars 2024 ka miratuar 1.3 miliardë euro kredi për 11 shtete, prej të cilave Serbia ka marrë 6 milionë euro.

Kosova si anëtare e KiE detyrohet të garantoj të drejtat e pakicave dhe kulturën e dialogut, që në veçanti vlen për serbët në Kosovë, për të cilat të drejta nën KiE sot nuk druan Kryeministri Albin Kurti ndërsa bëjnë propagandë për vuajtjet serbe në tokën kosovare vetëm Presidenti i Serbisë me Ambasadorët e Rusisë dhe Palestinës në Beograd.

Në fund, nuk duhet harruar dhe Kryeministrin Edi Rama që u akuzua për tradhti  pasi Ministri i tij i Jashtëm, Igli Hasani, doli kundër Kosovës në Komitet të KiE dhe kërkoi themelimin e Asociacionit! Energjia që shpenzojnë shqiptarët e Kosovës me këtë shërbëtor të Serbisë nuk mund të arsyetohet pavarësisht zhgënjimit që krijojnë vendimet e këtij njeriu edhe në këto raste vendimtare për Kosovën dhe jo vetëm! Thjeshtë, ky njeri edhe kur mendon, mendon serbisht!   

Ndërkohë ju që kritikoni ata shqiptarë që u zhgënjyen nga Perëndimi pse Kosova nuk u anëtarësua në Këshillin e Evropës, duhet ta kuptoni më shumë zhgënjimin se sa tekat e liderëve siç janë Scholz dhe Macron, që kurrë nuk kanë qenë më pak serbë se Presidenti i Serbisë!

Dhe, s’kemi pse të themi as Rroftë Zhgënjimi, sepse studiuesi e mjeshtri budist tibetian i meditimit dhe themeluesi i Universitetit Vajradhatu dhe Naropa, Chögyam Trungpa, shumë kohë më parë kështu e ka përkufizuar zhgënjimin:

“Zhgënjimi është një shenjë e mirë e inteligjencës bazë. Nuk mund të krahasohet me asgjë tjetër: është i mprehtë, i saktë, i dukshëm dhe i drejtpërdrejtë. Nëse mund të qëndrojmë të hapur, befas fillojmë të shohim se pritshmëritë tona janë të parëndësishme në krahasim me realitetin e situatës me të cilën përballemi.”