Rezoluta për Srebrenicën, agnostiku dhe ateisti Vuçiç kërkon bekimin e Patriarkut Porfirie para nisjes në New York

Presidenti i Serbisë, Aleksandar Vuçiç, ashtu siç kishte paralajmëruar sot mori pjesë në liturgjinë në Katderalen e Shën Savës në Beograd ku kërkoj dhe bekimin nga Kryepeshkopi serb Porfirje, para se të niset në New York për të marr pjesë në Asamblenë e Përgjithshme të OKB, ku do të diskutohet për Rezolutën mbi gjenocidin serb në Srebrenicë.

„Para nisjes në New York kam kërkuar bekimin nga patriarku serb Porfirie dhe iu luta Zotit në Katedralen e Shën Savës në Beograd. Po shkoj në New York të luftoj me gjithë fuqinë që kam për të ardhmen e vendit tonë,” u shpreh Vuçiç pas liturgjisë përmes rrjetit social Instagram.

Ndërkohë nga Kisha Ortodokse Serbe u bë e ditur se Patriarku Porfirie duke u lutur para nisjes së Presidentit të Serbisë në New York vlerësoi se miratimi i Rezolutës për Srebrenicën është “e pavërtetë dhe padrejtësi ndaj popullit serb”

“Për fat të keq, bota në të cilën jetojmë harroi gjenocidin ndaj popullit serb në shekullin XX, si dhe shekujt paraardhës. Për këtë arsye ngrejmë zërin dhe tregojmë për të pavërtetën e plotë dhe përpjekjen për revizionizmin historik të paqenë, ku po bëhet përpjekje që populli serb të shpallet si autor i gjenocidit,” tha Patriarku Porfirie në liturgjinë ku ishte prezent edhe Presidenti i Republik Srpska, krimineli serb Milorad Dodik.

Lutja e Presidentit të Serbisë para nisjes për në New York, vlerësohet hipokrite nga ekspertët serbë të shkencave politike dhe komunikimit, sepse lutjen në kishë ai e keqpërdor për marketing në përpjekje që të kontribuoj për homogjenizimin kombëtar.

Psikologu dhe ish-deputeti serb, Zharko Koraç, thotë për të përditshmen serbe “Danas” se Deklarata për Srebrenicën ku shumica është siguruar që ajo të miratohet në Asamblenë e Përgjithshme të Kombeve të Bashkuara, nga partia në pushtet po trajtohet si dita e gjykimit.

“Natyrisht, tani i shtuan edhe kishën. Që toka dhe qielli të jenë në anën e SNS. Gjithmonë kam menduar se edhe demagogjia duhet të ketë kufi. Tek ne siç duket nuk ka. Mjerisht edhe kisha për të disatën herë po e ndihmon pushtetin në propagandën e saj politike,” thotë Zharko Koraç ndërsa analisti politik Dragomir Angjelkoviç thotë se sipas Kushtetutës së Serbisë gjithkush mund ta shprehë besimin e tij dhe kjo vlenë edhe për Presidentin.

“Por, gjëra të tilla duhet të bëhen me qetësi, dhe jo për pozime, që qytetarëve t’ju jepet mesazhi për dashurinë tuaj religjioze dhe politike për interesa kombëtare. Aq më shumë që kjo e gjitha ka dimension hipokrit sepse Vuçiçi, nëse papritmas nuk ka përjetuar një shpallje fetare, agnostik e pse je edhe ateist.

Kur i kemi të gjitha këto parasysh dhe faktin se në Kosovë i dorëzoi të gjitha pozicionet që mbanim në veri para se ai të vinte në pushtet, dhe gati sa nuk i ka dhënë fund pranimit faktik të krahinës tonë të shkëputur, është e qartë se as për çështjen e Srebrenicës nuk po lufton për interesa por po manipulon që të përfitoj politikisht në rrethanat kur gjithnjë e më shumë qytetarë janë të pakënaqur me qeverisjen e tij në Serbi,” thotë Dragomir Angjelkoviç.

Ndërsa profesori në Fakultetin e Shkencave Politike në Beograd, Sinisha Atlagiç sqaron se si funksionon e gjithë kjo.

“Fjala është për përpjekjen e një plani simbolik që të kontribuohet në homogjenizimin kombëtar. Sa i përket rolit të kishës, në këtë institucion qytetarët e Serbisë kanë besim shumë të madh. Nga këndvështrimi i besimit politik, çdo pushtet që i konsideron shumë të rëndësishme për bashkësinë, do ti zgjas dorën transferimit të qëndrimeve pozitive që qytetarët kanë ndaj një institucioni të këtij lloji,” thotë profesori i njohur serb i Shkencave Politike duke përfunduar:

“Për ‘transferimin’ këtu flasim si teknikë e një besimi politik të organizuar i bazuar në mbështetjen si mekanizëm psikologjik i ndikimit në ndërgjegjen dhe sjelljen e publikut në komunikimin masiv politik.”