Diktatura e Kryeministrisë dhe diktatura e Bashkisë, Teliti: Shumë shpejt do ulen në gjunjët e shqiptarëve!
Në protestën e dhjetë kundër skandalit korruptiv të pesë drejtorëve të Bashkisë Tiranë dhe inceneratorëve, Nënkryetari i Këshilliti Bashkiak të Tiranës nga radhët e PD, Dorian Teliti, duke i bërë thirrje qytetarëve të vazhdojnë me rezistencën sepse nuk ka diktaturë që është shembur vetë, diktaturat, tha ai, shemben nga njerëzit e lirë që nuk ulin kokën para pushtetit!
“Jam lindur dhe rritur në këtë qytet dhe kur ishim fëmijë arrinim ta shihnim malin e Dajtit. Sot Edi Rama dhe Erion Veliaj e zhdukën malin e Dajtit ashtu siç zhdukën edhe Kullën e Sahatit.
Nuk shihet më se sytë tanë zënë vetëm kulla, zënë vetëm beton, zënë vetëm zullumet e kësaj qeverie.
I keni parë këto ditë lajmet në mediat ndërkombëtare, në mediat italiane që po zbardhin dita ditës se si e gjithë nomenklatura shtetërore që nga kryeministri, zv. kryeministrat e ministrat dhe gjithë të tjerët janë përfshirë në një strukturë kriminale, që po abuzon me të tashmen dhe të ardhmen, që po shkatërron jetën e shqiptarëve. Zhdukën edhe 132 milionë të inceneratorit të Tiranës.
Zhdukën 60 milionë euro. Thotë Arben Ahmetaj “pyetini se ku janë paratë, pyeteni pronarin e vërtetë të inceneratorit”.
Por pronari nuk del, pronari është i humbur, në arrati, ka mbyllur derën e bashkisë dhe i ka vendosur zinxhirin dhe i denjë për një ministër të brendshëm diktature, rrethohet me policë, që marrin urdhra dhe detyroheni ju t’i zbatoni,” tha Nënkryetari i Këshilliti Bashkiak të Tiranës, Dorian Teliti, duke i bërë thirrje protestuesëve të rezitstojnë sepse nuk ka diktaturë që është shembur vetë ndërsa përfundoi:
“Miqtë e mi, kjo rezistencë e dhjetë, për të cilën unë ju falënderoj përzemërisht, që të shumtë siç jemi sot, siç ishim dhe herën e kaluar dhe më të shumtë të jemi herën që vjen, të vazhdojmë të rezistojmë!
Nuk ka diktaturë që është shembur vetë! Diktaturat shemben me protesta! Diktaturat shemben me qëndresë! Diktaturat shemben nga njerëzit e lirë që nuk ulin kokën para pushtetit, nga ata që me të drejtën e Zotit dhe të drejtën që u jep Kushtetuta, protestojnë me të gjitha mjetet demokratike të mosbindjes civile derisa diktatura të shembet!
Diktatura e Kryeministrisë dhe diktatura e bashkisë shumë shpejt do të ulen në gjunjët e shqiptarëve!
Ai, që 800 metra larg nga këtu, në godinën e kryeministrisë, në vend që të bëjë politikat ndërkombëtare, për ta çuar Shqipërinë në Evropë, bën vetëm biznes ndërkombëtar!”
Dhe, sot, deri sa në mënyrë të përsëritur nuk iu lejua këshilltarëve bashkiak të opozitës të futen në zyrat e tyre në Bashkinë Tiranë, policia e shtetit provokoi protestuesit me fikëse zjarri mbi ata dhe gomat që ishin vendosur në mes të protestuesëve dhe kordonit të policisë së vendosur para bashkisë ndërsa fliste anëtari i Kryesisë PD, Belind Këlliçi, që përfundoi me djegien e gomave dhe protestuesit që kërkonin largimin e Erion Veliajt pas skandaleve të shumta që u zbuluan në Bashkinë Tiranë.
Protesta e radhës do jetë të hënën më 10 Qershor në ora 11:00.
