Gjermani, 16 efektivë të policisë shqiptare në EURO 2024, ja roli i tyre

Për garantimin e qetësisë dhe mbarëvajtjen e ndeshjeve në Kampionatin Europian të Futbollit “Euro 2024”, nga data 10 qershor në Gjermani janë dislokuar 580 forca të huaja policore, 16 prej të cilave shqiptarë, të vendosura kryesisht në stacione hekurudhore, aeroporte dhe pikat kufitare, krahas funksionimit të Qendrës Kombëtare të Bashkëpunimit Policor.

Të gjithë shtetet pjesëmarrëse në kampionat kanë grupin nga policia tyre, kështu nga Policia e Shtetit Shqiptar janë dërguar në mbështetje të Policisë Federale Gjermane 10 efektivë nga forcat e rendit, Shqiponja dhe forcat e sigurisë kombëtare, të dislokuar në terren dhe 6 oficerë të nivelit të lartë, nga të cilët 2 të vendosur në Qendrën Kombëtare të Bashkëpunimit Policor në Neus dhe 4 të tjerë të shpërndarë në qytetet ku do të zhvillohen ndeshjet e Ekipit Kombëtar të Shqipërisë.

Punonjësit e Policisë së Shtetit janë certifikuar nga Ministria e Brendshme Gjermane, pas trajnimit të zhvilluar për patrullim të përbashkët nga data 10 qershor deri në 13 qershor, dhe do të mbështesin policinë gjermane duke ndërmjetësuar komunikimin dhe masat policore midis shtetit gjerman dhe tifozëve të kombëtares tonë, në këtë rast.

Detyrë e policëve tanë dhe oficerëve të kontaktit në Gjermani janë që të kontaktojnë krerët e tifogrupeve të Kombëtares dhe t’i informojnë për rregullat e sigurisë të policisë gjermane për mbarëvjatjen e ndeshjeve.

Efektivët shqiptarë që janë në terren patrullojnë me policinë gjermane edhe pranë fan zonave ku tifozët shqiptarë dislokohen para ndeshjeve. Gjithashtu, efektivët shqiptarë futen edhe brenda në stadium gjatë ndeshjeve ku mbajnë kontakt të vazhdueshëm me krerët e tifogrupeve.

Ndryshe, deri më sot nuk është shënuar asnjë incident ndërsa efektivët e policisë shqiptare do të jenë në Gjermani deri në momentin që Kombëtraja Shqiptare përfundon rrugëtimin.