A do t´a kalojë Vettingun Sokol Sadushi? Ja si përgjigjet kreu i shkollës së Magjistraturës

Drejtori i Shkollës së Magjistraturës, Sokol Sadushi, është shprehur nga emisioni “Studio e hapur” në “News 24”, se as pedagogët e këtij institucioni nuk do të shpëtojnë nga Vettingu.

Ai shton më tej se kjo është e nevojshme dhe është e parashikuar në ligj. Sadushi ndër të tjera tha se rreth 50 pedagogë të Shkollës së Magjistraturës vijnë nga sistemi, pra nga ai sistem, i cili sipas tij është i bllokuar.

“Në ligj është parashikuar që të kalojë vettingun edhe këshilli drejtues i Shkollës së Magjistraturës. Ne jemi të gatshëm që të na marrin dhe të na skanojnë. Edhe pedagogët duhet të kalojnë procesin e vlerësimit dhe të qëndrojnë në detyrë nëse janë të pastër.

Të bëhet vlerësim për pasurinë dhe figurën, çdo gjë që ka të bëjë me Shkollën e Magjistraturës. Le të skanohen të gjithë nëse vjen e keqja nga pedagogët.

Shkolla ka 8 pedagogë dhe drejtori 9, që janë të brendshëm. Gjithsej janë 60 pedagogë në tërësi dhe 50 prej tyre janë gjyqtarë, prokurorë, akademikë. Janë njerëz që punojnë në sistem”, u shpreh Drejtori i Shkollës së Magjistraturës.