Presidentja e Kosovës dekreton datën e zgjedhjeve parlamentare, 9 Shkurt 2025!

Pas konsultimeve me liderët e partive parlamentare, sot Presidentja e Kosovës, Vjosa Osmani, ka caktuar 9 shkurtin e vitit 2025, si datë kur do të mbahen zgjedhjet e rregullta parlamentare.

“Zgjedhjet e rregullta për Kuvendin e Republikës së Kosovës do të mbahen më 9 shkurt 2025.

Udhëzohet Komisioni Qendror i Zgjedhjeve i Republikës së Kosovës t’i ndërmarrë të gjitha veprimet e nevojshme për organizimin dhe mbajtjen e zgjedhjeve për Kuvendin e Republikës së Kosovës, në përputhje me këtë dekret dhe legjislacionin në fuqi.

Dekreti hyn në fuqi në datën e nënshkrimit,” thuhet në Dekretin i cili u firmos sot nga Presidentja e Kosovës, Vjosa Osmani.

Ndryshe, më 31 korrik, Presidentja e Kosovës, Vjosa Osmani, ftoi të gjitha partitë parlamentare në konsultime për caktimin e datës së zgjedhjeve, takim ku nuk mori pjesë Kryeministri dhe Kyetari i Lëvizjes Vetëvendosje, Albin Kurti.

Sot u bë e ditur se lideri i Lëvizjes Vetëvendosje, Albin Kurti, i kishte propozuar Presidentes së Kosovës, Vjosa Osmani, 2 Shkurtin 2025 si datën e mbajtjes së zgjedhjeve të rregullta parlamentare.