Grupi Parlamentar i PD: Aksioni politik do të fokusohet te zgjedhjet e lira e të ndershme

Kryetari i Grupit Parlamentar të Partisë Demokratike, Gazment Bardhi, tha pas përfundimit të mbledhjes se aksioni politik i PD-së do të përqendrohet në garantimin e zgjedhjeve të lira dhe të ndershme.

“Shqipëria ka detyrimin për të respektuar rekomandimet e OSBE-ODIHR. Ka detyrim si vend kandidat për në BE që të garantojë zgjedhjet e lira dhe të ndershme. Shëmtinë e zgjedhjeve ku diktojnë paratë e krimit të organizuar, Shqipëria duhet ta lërë pas. Veç këtij objektivi të grupit, kemi diskutuar për paraqitjen e disa kërkesave për Komision Hetimor në nisjen e këtij sesioni.

Do të ketë disa kërkesa për interpelancë, një prej të cilave, atë për mbetjet e rrezikshme me kryeministrin Rama e kemi dorëzuar. Kolegu Dogjani ka depozituar një kërkesë për interpelancë me ministrin e Brendshëm për situatën e rendit dhe sigurisë publike gjatë kësaj periudhe ku ka patur zhvillime dramatike, për të cilat duhet të ketë raportim në Kuvend,” tha Gazment Bardhi, duke mos harruar dhe tre çështjet tematike të interesit të qytetarëve ku do të fokusohet puna e këtij Grupi Parlamentar:

“Propozimin për vendosjen e minimumit jetik për të ndihmuar shtresat në nevojë, projektligji për rritjen e pensioneve. Është e papranueshme që gjatë këtyre viteve të mos ketë një reformë reale për rritjen e pensioneve për këtë kategori. Aksion politik e parlamentar me moton nuk ka zgjidhje pa zgjedhje të ndershme.”

Në fund, Kryetari i Grupit Parlamentar të Partisë Demokratike, Gazment Bardhi, duke konstatuar se Kryeministri Edi Rama ka bërë përpjekje për të shkallmuar zgjedhjet e lira dhe të ndershme duke bllokuar ndryshimet dhe reformat zgjedhore të nevojshme, tha se për të arritur një zgjidhje të qëndrueshme për problemet zgjedhore, është e domosdoshme të garantohen zgjedhje të lira dhe të ndershme.