Nesër, Zv/Kryeministri i Serbisë takim me Presidentin e Rusisë, Vladimir Putin
Zv/Kryeministri i Serbisë, Aleksandar Vulin, do të takohet nesër në Vladivostok me Presidentin e Rusisë, Vladimir Putin, ka bërë të ditur Ndihmësi i presidentit rus, Yuri Ushakov.
Mediat serbe në Beograd raportojnë, duke ju referuar Agjencisë serbe të lajmeve Beta, se Ushakov tha që Vulin dhe Putin do të takohen në margjinat e Forumit Ekonomik Lindor, EEF, i cili mbahet nga 3 deri më 6 shtator në kampusin e Universitetit federal të Lindjes së largët në Vladivostok, raporton VOA, e cila ndërkohë i është drejtuar Qeverisë ë Serbisë nëse këto raportime janë të sakta.
Me këshilltarin për çështje të politikës së jashtme të presidentit të Rusisë, Yuri Ushakov, Zv/Kryeministri i Serbisë ishte takuar para tre javësh gjatë një vizite zyrtare në Moskë.
Pas këtij takimi, Qeveria e Serbisë është shprehur se Vulin ka theksuar se Serbia është vendi i vetëm në Evropë që nuk i ka vendos sanksione Rusisë dhe se marrëdhëniet mes dy vendeve kurrë nuk ishin më të sinqerta dhe më përmbajtësore.
Para këtij takimi, Vulin në muajin qershor është takuar në Moskë me ministrin e punëve të brendshme të Rusisë, Vladimir Kolokolcev, sekretarin e Këshllit rus të Sigurisë, Sergei Shoigu, dhe, zv/ministrin e punë të jashtme, Aleksandar Grushko.
Kjo ishte dhe vizita e parë zyrtare e Aleksandar Vulinit në Rusi që nga koha kur u zgjodhë Zv/Kryeministër i Serbisë, raporton VOA.
Ndryshe, Aleksandar Vulin, partner i koalicionit të SNS-së së Vuçiçit, ishte drejtor i shërbimit sekret BIA nga dhjetori i vitit 2022 deri në nëntor të vitit 2023, dhe ministër i punëve të brendshme nga viti 2020 deri në vitin 2022.
I njohur për lidhjet e ngushta me Rusinë, Aleksandar Vulin nga 11 korriku i vitit të kaluar është në listën e sanksioneve të Sekretariatit për financa të Shteteve të Bashkuara për shkak të akteve korruptive dhe destabilizuese, për realizimin e agjendës politike personale dhe interesave personale në dëm të paqes dhe stabilitetit në Ballkanin Perëndimor.
Në këtë komunikatë Zyra për kontrollin e pasurisë së huaj pranë Sekretariatit amerikan për financa, OFAC, u theksua se ai është i implikuar në krimin e organizuar transnacional, operacione ilegale në lidhje me narkotikët dhe keqëpërdorim të funksioneve publike.
