Përmbytje në Evropën Qendrore, pas mbrëmjes më të rëndësishme në shekullin XXI…

Reshjet e dendura të shiut morën 17 jetë njerëzish, 26 vende në Austri janë të izoluara nga përmbytjet ndonëse niveli i ujit po bie ndërsa në Poloni pas një nate të gjatë për shpëtimin e argjinaturës që të gjithë 2000 burra, gra e fëmijë të angazhuar janë të lumtur që shpëtuan qytetin e tyre Nyse.

Ndërkohë, mëngjesin e sotëm, me 12.000 ushtarë në gatishmëri dhe thirrje qytetarëve për të ndihmuar në përballjen me përmbytjet nga Danubi, niveli i të cilit sa shkon e rritet, ministri i Brendshëm i Hungarisë, Sandor Pinter, është mobilizuar pas pamjeve apokaliptike në Çeki ku niveli i ujit shkoi deri në dy metra.

Austri, bie niveli i ujit, rreziku nga shkarjet e dheut

Niveli i ujit në zonat e përmbytura në Austri ka filluar të bie gjatë natës me rënien e intensitet të shiut, por zyrtarët austriakë presin valën e dytë të reshjeve të dendura të shiut, dhe shkarjet e dheut.

Mëngjesin e sotëm, mediat austriake raportojnë se në 26 vende, për shkak të përmbytjeve nuk mund të shkohet fare.

Në Tullnerfeld janë evakuuar shtatë fshatëra ndërsa Kryqi i Kuq ka organizuar strehim të përkohshëm në qendrën e panairit në Tulln, me kapacitet prej 1000 personave. Sipas përfaqësueses së Kryqit Kuq, Sonja Keller, ishin 450 persona që u strehuan dhe u ushqyen gjatë natës ndërsa mëngjesin e sotëm janë 325 persona.

Kellner e bëri të qartë se strehimi për 1000 persona në Tulln do të jetë në dispozicion aq sa do të jetë i nevojshëm.

Polonia vazhdon luftën me përmbytjet

Jugu i Polonisë vazhdon luftën me përmbytjet ndërsa situata më kritike vazhdon të jetë në rajonin Nyse, edhe mëngjesin e sotëm.

Për shkak të rrezikut të çarjes së argjinaturës në lagjen Wyspiańskiego, kryebashkiaku i bëri thirrje qytetarëve për evakuim urgjent. Pushteti lokal përveç se i bëri thirrje qytetarëve që të angazhohen në ruajtjen e argjinatur që po çahet, lidhur me situatën nga përmbytjet kanë lutur qytetarët që përcjellin lajmet dhe apelet që do të lëshohen zyrtarisht.

Sipas të dhënave të mediave lokale, gjatë natës ishin mbi 76 qendra hidrometeorologjike ku niveli i ujit ishte shumë më i lartë se sa alarmi që ishte dhënë, kryesisht në jugperëndim të Polonisë, dhe 40 qendra që nuk arritën të parashikojnë intensitetin e reshjeve të shiut dhe nivelin e ujit që do arrihet.

Lewin Brzeski, całe miasto do ewakuacji!

Oznacza to przemieszczenie się fali w stronę Odry. To kolejne fatalne informacje dla Wrocławia…

Dramat ludzki… 💔#Powodź pic.twitter.com/buEZ2eF92l

— Mati (@FremdenlegionPL) September 16, 2024

Lajmi i mirë në momentet e kësaj nate tmerri ishte se në lumin Nysi Kłodzkoj, në lagjen Wyspiańskiego, argjinatura ishte rregulluar.

“Tani po luftojmë me një vrimë që është krijuar në argjinaturë pranë digës në liqenin Nyskie,” raportoi kapetani Dariusz Pryga nga Drjetoria e zjarrfikësve të qarkut Nyseu duke bërë të ditur se po vendosen thasë me rërë. Por, pak momente më vonë, erdhi lajmi për problemet e reja.

“Kemi çarje të re në argjinaturë. Ishte e vogël fillimisht, por tani është zgjeruar,” tha kapiteni Dariusz Pryga duke raportuar për RMF FM, ndërsa shtoi se me ndihmën e helikopterëve ushtarak MI-17 po bëhen përpjekje për mbylljen e çarjes, duke vazhduar të hedhin thasë me rërë në argjinaturë.

Kryebashkiaku i Nyses për RMF FM ishte optimist edhe në këto momente kritike:

“Shpresojmë se Nyse do të shpëtoj nga përmbytjet. Kjo është nata më e rëndësishme në historinë e qytetit në shekullin XXI,” tha kryetari i Bashkisë Nyse, Kordian Kolbiarz, duke falënderuar banorët e këtij qyteti për angazhimin në forcimin e argjinaturës dhe shpëtimin e saj

“Vetëm para disa minutave tek argjinatura ishin duke punuar rreth dy mijë njerëz – gra, meshkuj, fëmijë, pleqë. Përkushtim i madh, dashuri e madhe për qytetin. Të gjithë duam që ai të mbijetoi,” tha kryetari i Bashkisë Nyse, Kordian Kolbiarz.

Qeveria e Polonisë shpalli fatkeqësinë natyrore në zonat e goditura dhe tha se për viktimat janë ndarë 260 milionë dollarë.

Kryeministri Donald Tusk në komunikim me krerët e shteteve tjera që janë goditur nga përmbytjet tha se do të kërkoj ndihmë financiare nga Bashkimi Evropian.

Szymon Krzysztan nga qyteti Ladek Zdroja tha se dëmet janë të pallogaritshme.

“Ky është qytet apokaliptik… Ky është qytet i fantazmave,” tha i trishtuar Zdroja.

Hungari pret përmbytjet me 12.000 ushtarë në gatishmëri

Në qytetin çek përgjatë kufirit, Jesenik, i cili është i përmbytur, ka filluar pastrimi pasi niveli i ujit ka filluar të bie duke lënë mbrapa të gjitha automjetet e dëmtuara dhe rrugët e bllokuara nga balta e zhavori. 

“Rrugët u përmbytën nga niveli i ujit që shkoi deri në dy metra… Të gjitha makinat janë dëmtuar,” tha Zdenek Kuzilek. “Telefonët nuk punojnë, nuk ka ujë, nuk ka drita.”

Në lindje të Rumanisë, ku u përmbytën të gjitha fshatrat dhe qytetet, kryebashkiaku i Slobozije Conachi, Emil Dragomir, tha për telelvizionin publik rumun duke rrëfyer mbi situatën dramatike, se njerëzit nuk arritën ti marrin as rrobat e trupit.

Kryebashkiaku i Kisoroszit në Hungari tha për hirado.hu se po presin përmbytje rekorde ku niveli i ujit mund të shkoj deri në 890 centimetra, ashtu siç ndodhi në vitin 2013. Për këtë arsye është ngritur niveli i tretë i mbrojtjes, e banorët janë informuar se zona pritet të izolohet nga pjesa tjetër e botës 6-8 ditë.

Rruga nacionale Tahi-Kisoroszi pritet të përmbytet, që është dhe problemi më i madh sepse Kisoroszi mund të izolohet i tëri. Për këtë arsye është ngritur dhe niveli i tretë, në mënyrë që të mos ndërpritet furnizimi me ushqime dhe ilaçe.

Në rastin më të keq, Kryebashkiaku tha se janë marrë masa që banorët t’i kenë varkat në dispozicion.

Bratislava dhe Budapesti po përgatiten për përmbytje duke parë rritjen e nivelit të lumit Danub. Ministri hungarez i Punëve të Brendshme, Sandor Pinter, tha se janë në gatishmëri 12.000 ushtarë.