Një vit nga sulmi terrorist në Banjskë, ndëshkimet e Edi Ramës dhe BE ndaj Kosovës në fuqi!
Një vit më parë në Banjskë të Zveçanit, një grup i armatosur terrorist i kryesuar nga krimineli Milan Radoiçiç, sulmoi Policinë e Kosovës. Nga sulmi mbeti i vrarë, rreshteri i Policisë së Kosovës, Afrim Bunjaku.
Nga ajo kohë deri më sot kanë ndodhur shumë zhvillime. Radoiçiç pranoi organizimin dhe pjesëmarrjen në sulm, ai u hetua në Beograd dhe në Prishtinë ku ndaj tij dhe 44 personave tjerë u ngrit aktakuzë për veprimtari terroriste ndërkohë Kosova mbeti e ndëshkuar nga Kryeministri i Shqipërisë, Edi Rama, dhe, BE sepse në prag të këtij sulmi terrorist, sipas tyre, Kryeministri Albin Kurti fliste për një rrezik të paqenë!
Sot Presidentja e Kosovës, Vjosa Osmani, duke kujtuar sulmin terrorist dhe rënien dëshmor të Rreshterit Afrim Bunjaku, thekson se kjo tregon edhe një herë, siç kemi dëshmuar ndër shekuj, se kjo tokë është atdheu ynë i përjetshëm.
“Se liria nuk ka çmim. Se Kosova është dhe do të mbetet e pandashme, e liria dhe kufijtë tanë të paprekshëm! Sot e përgjithmonë,” shprehet Presidentja e Kosovës ndërsa Kryeministri Albin Kurti bënë të ditur se në mbledhjen e 221-të të Qeverisë, ndër vendimet kryesore ishte emërtimi i Rrugës Rajonale R-217 segmenti: Ballaban – Banjskë, me emrin e Heroit të Republikës së Kosovës “Afrim Bunjaku”.
“Në njëvjetorin e sulmit terrorist dhe paramilitar kundër vendit tonë në Banjskë të Zveçanit, nderojmë e kurrë nuk harrojmë sakrificën e heroit, rreshterit Afrim Bunjaku, që humbi jetën duke mbrojtur sovranitetin dhe integritetin territorial të Republikës së Kosovës,” shprehet Kryeministri i Kosovës, Albin Kurti.
45 të akuzuar
Ditë më parë, Prokuroria Speciale e Kosovës ngriti aktakuzë ndaj 45 personave për përfshirje në sulmin e armatosur terrorist në veri të Kosovës, në Banjskë një vit më parë, ku u vra rreshteri i policisë së Kosovës, Afrim Bunjaku.
Sipas aktakuzës, grupi terrorist me në krye Milan Radoiçiçin, synonin që përmes përdorimit të dhunës me armatim të rëndë, kanë tentuar të shkëpusin pjesën veriore të territorit të Republikës së Kosovës.
Në aktakuzë thuhet se si grup mirë i organizuar, këtë pjesë të territorit kanë tentuar t’ia bashkojnë Republikës së Serbisë, dhe si rezultat i dhunës së përdorur, ka vdekur zyrtari policor Afrim Bunjaku dhe është rrezikuar jeta e zyrtarëve të tjerë policorë dhe popullatës civile.
Grupi i përbërë prej 45 personave ngarkohet me “Veprat e rënda kundër rendit kushtetues dhe sigurisë së Republikës së Kosovës”.
Prokuroria Speciale ngarkon kreun e grupit, Milan Radoiçiç me veprën penale të “Lehtësimi dhe financimi në kryerjen e terrorizmit” pasi i njëjti nga viti 2017 e deri më 24 shtator 2023 në cilësinë e kreut të grupit terrorist të strukturuar, ka siguruar të ardhura në mënyrë të tërthortë.
Pjesa më e madhe e tyre janë përdorur për armatim të rëndë, uniforma ushtarake, mbështetje logjistike, pagesën e pjesëmarrësve të grupit, thuhet tutje në aktakuzë.
Radoiçiç ngarkohet edhe me pastrim të parave, pasi një pjesë të pasurive të paluajtshme e ka transferuar dhe tek personat e tretë, me qëllim të fshehjes ose maskimit të burimit të pasurisë.
Çështja e Banjskës vazhdon të mbesë temë diskutimi në shumicën e takimeve ndërkombëtare që mbahen e që diskutohet për raportet Kosovë-Serbi.
Kryeministri Edi Rama nuk flet si një vit më parë me vrullin revolucionar serb kur anuloi mbledhjen e dy qeverive në Gjakovë, por, sot, hesht edhe kur arsyeja e tij për këtë ndëshkim të Kosovës kishte për epilog një sulm terrorist serb të organizuar nga miku i tij Aleksandar Vuçiç! Madje, për ta shmangur mbështetjen për Kosovën në OKB, sajoi “Vatikanin jeshil” që zuri vend në fjalën e tij në Asamblenë e Përgjithshme të Kombeve të Bashkuara dhe nuk trazoi humorin e Presidentit të Serbisë në fushatën e tij kundër Kosovës në New York dhe dekorimin e liderëve të të gjitha shteteve që nuk mbështetën Rezolutën për Srebrenicën por masakrën e forcave serbe në Bosnje Hercegovinë!
Në fund, është Bashkimi Evropian ashtu sikur se Edi Rama që vazhdon dhe ndëshkon popullin e Kosovës pse Kryeministri i tyre Albin Kurti nuk lejon terroristët serb të futen në tokën kosovare dhe ta aneksojnë ashtu siç e kanë menduar dyshja kriminale e Ballkanit të Hapur, Rama-Vuçiç! Asnjëri prej tyre nuk kërkon nga Presidenti i Serbisë dorëzimin pranë autoriteteve kosovare të njeriut që thotë se e organizoi aktin terrorist, Milan Radoiçiç, madje e flasin me superlativa për Serbinë edhe për aktet që nuk i ka bërë, siç ishte rasti me Përfaqësuesin e BE në dialog, Miroslav Lajçak, për Letren e Brnabiçit ku hedhë poshtë Marrëveshjen e Kumanovës!
