Tensionet në Parlament, SHBA dhe BE të shqetësuara: Akte të tilla nuk kanë vend në procesin demokratik!
Pasi Partia Socialiste dje djegu mandatin e Ervin Salianjit ndërsa opozita karriget e tyre në Parlament, ka reaguar Ambasada e SHBA dhe ajo e BE në Tiranë të shqetësuara për situatën e krijuar në parlamentin shqiptar duke theksuar se akte të tilla nuk kanë vend në procesin demokratik ndërsa shprehen qartë se mbështesin diskutimet paqësore dhe bashkëpunuese lidhur me negociatat për anëtarësimin e Shqipërisë në BE.
“Ambasada e SHBA është thellësisht e shqetësuar për shkatërrimin dhe forcën e shpalosur në parlamentin shqiptar të hënën. Akte të tilla dëmtuese dhe potencialisht lënduese nuk kanë vend në procesin demokratik.
Nxisim të gjitha palët e përfshira të ushtrojnë vetëpërmbajtje, të angazhohen në dialog konstruktiv si dhe të përqafojnë vlerat e respektit dhe qytetarisë,” shprehet Ambasada amerikane në Tiranë duke siguruar se SHBA do qëndrojë krah institucioneve shqiptare teksa punojnë për ta sjellë Shqipërinë më pranë bashkësisë euro-atlantike ndërsa përfundon:
“Mbështesim diskutimet paqësore dhe bashkëpunuese lidhur me negociatat për anëtarësimin e Shqipërisë në BE si dhe do të vazhdojmë të qëndrojmë krah institucioneve shqiptare teksa punojnë për ta sjellë Shqipërinë më pranë bashkësisë euro-atlantike.”
Ndërkohë Ambasadori i BE, Silvio Gonzato, duke shprehur keqardhje që disa përfaqësues të opozitës përdorën mënyra që ndërpresin mbarëvajtjen e jetës parlamentare, tha se nuk duhet të përdoret dhunë për të shprehur mendimin.
“Është për të ardhur keq që për një çështje tjetër disa përfaqësues të opozitës përdorën mënyra që ndërpresin mbarëvajtjen e jetës parlamentare në Parlament. Është për të ardhur keq. Për çfarëdo ideje që kemi nuk është kjo mënyra për ta shprehur mendimin.
“Në një demokraci funksionale si Shqipëria pakënaqësitë duhet të shprehen në mënyrën e duhur e nuk duhet të përdoren dhunë apo dëmtime ndaj pronës për të shprehur mendimin, deputetët e Parlamentit duhet të kenë mundësinë të përmbushin rolin e tyre në siguri të plotë. Të ulen tensionet e të shmangen sulmet. Dhuna nuk duhet të jetë zgjidhje”
