Djegia e karrigeve, përgjegjësi personale, PD: Kërkesë SPAK-ut, të hetohen 73 deputetë socialistë!

Karriget janë mjeti i punës së deputetit dhe është përgjegjësi e tyre se çfarë bëjnë me një mjet pune, tha sot Kryetari i Grupit Parlamentar të Partisë Demokratike, Gazment Bardhi, duke sqaruar djegien e djeshme të karrigeve para Kuvendit ndërkohë ka sqaruar dhe kallëzimin që PD ka bërë në SPAK për 73 deputetë socialistë.

“Tashmë në fletoren zyrtare është botuar vendimi për moszbatimin e vendimit të Kushtetueses lidhur me mandatin e Olta Xhaçkës dhe moszbatimi i një vendimi gjykate është vepër penale. Sipas Kodit të Procedurës Penale, moszbatimi i vendimit të Gjykatës dënohet me burg deri në 3 vjet. Në këto kushte, PD i është drejtuar SPAK për të hetuar të 73 ligjvënësit socialistë,” tha Gazment Bardhi duke sqaruar dhe arsyen pse do të paraqitet sot në SPAK, pak ditë pasi denoncoi disa mesazhe që i kishin mbërritur në telefon të cilat i konsideroi si akte intimiduese.

“Kam shprehur gadishmërinë për t’I vënë SPAK-ut në dispozicion telefonin tim, për të hetuar atë kallëzim që kam bërë, dhe sot do të paraqitem në Prokurorinë Speciale.”

Sa i përket veprimit të mëtejmë politik të Partisë Demokratike dhe seancës së nesërme plenare, Kryetari i Grupit Parlamentar të PD ishte i prerë:

“Grupi Parlamentar do të jetë në mbledhjen Sekretariatit të orës 15:00 si formë e mosdakordësisë tonë me këtë përshkallëzim që PS po i bën grupit parlamentar të Partisë Demokratike.

Të përjashtosh opozitën nga Kuvendi, të burgosësh opozitën për fjalën e lirë, të pengosh opozitën të kryejë funksionet veta, të tentosh ta asgjësosh opozitën, siç e kam thënë edhe më parë është shpallje lufte ndaj PD-së, grupit parlamentar të PD-së dhe opozitës në tërësi,” tha Kryetari i Grupit Parlamentar të Partisë Demokratike, Gazment Bardhi, duke përfunduar:

“Sa i takon seancës së nesërme, grupi ka vendosur të bëjë gjithçka për të mos lejuar normalitet në seancën e nesërme. Strategjitë se çfarë do të bëjmë do ti mësoni aty.”