Sot Xhamia e Namazgjasë inaugurohet në tokën e rrëmbyer

Ndërsa impianti propagandistik i Kryeministrit Edi Rama ndezi debatin rreth imamit turk ose shqiptar të Xhamisë së Namazgjasë në një turli Komuniteti Mysliman me gylenist dhe erdoganist, për të sfumuar çështjen e tokës së rrëmbyer ku inaugurohet sot Xhamia e Namazgjasë, myslimanët dhe jo vetëm sot presin orën 16:30 për inaugurimin e kësaj Xhamie nga Presidenti i Turqisë, Reccep Tayyip Erdogan, pa u shqetësuar nëse ajo sot ndërtohet në tokën HALLALL që ishte dhuruar nga Familja Kruja, apo, HARAM, meqë marrëveshja e arritur me Komunitetin Mysliman Shqiptar dhe vendimi i Qeverisë u minuan sapo komunistët erdhën në pushtet në vitin 2013!

Por, kjo nuk e pengoi Komunitetin Mysliman që sot ta pret Presidentin e Turqisë në inaugurimin e Xhamisë së Namazgjasë duke falënderuar për zgjidhjen e pronësisë së tokës së rrëmbyer ose HARAM, Kryeministrin Edi Rama!

Vakëfi i Familjes Kruja

Ndërtimi i Xhamisë së Namazgjasë nisi 11 vjet më parë në një sipërfaqe prej 5.500 m2 ku vakëf nga Familja Kruja ishin 2.050 m2, ose më saktë, vakëf islamik rreth 750 m2, dhe duke vënë në shërbim të xhamisë sipërfaqen e mbetur prej 1.300 m2.

Por me ardhjen e komunistëve në pushtet, ndër vendimet e para ishte ai i anulimit të lejes zhvillimore nga ana e Këshilli Kombëtar të Territorit, i cili në 8 tetorin e vitit 2013 anuloi lejen për godinën 8-katëshe që do të ngrihej ngjitur me Xhaminë e Namazgjasë nga familja Kruja, ndonëse ajo ishte leje e përbashkët për ndërtimin e xhamisë.

Pas këtij Vendimi, kur Kryeministri Edi Rama kërkoi nga Komuniteti Mysliman një projekt të ri pa kullë të xhamisë, familja Kruja me rënien e projektit të godinës së saj tërhoqi dhe truallin prej 2.050 m2 që i kishte lënë KMSH-së, për ndërtimin e Xhamisë së Namazgjasë.

Por komunistët vazhduan përpara, ashtu siç vepruan nga viti 1944, dhe avokatura e shtetit iu drejtua Gjykatës së Tiranës për të hequr të drejtat e pronësisë, ndërsa trashëgimtarët e pronës reaguan duke thënë se është shkelur e drejta themeltare e njeriut, e drejta e pronës, dhe për këtë arsye çështja do të ndiqet në gjykatë.

“Kjo marrëveshje parashkruante të drejtën që KMSH të ndërtonte mbi truallin privat, pronë që do të kalonte në pronësinë e KMSH si vakëf – brenda një periudhe 3.5 vjet ose dhe më herët, me hipotekimin e karabinasë së një strukture private që familja Kruja do ndërtonte në truallin e saj,” thekson pas këtij vendimi përfaqësuesi i Familjes Kruja, Alban Bala, duke pasur parasysh dhe faktin se sipas rregullave islame, toka në të cilën ndërtohet një xhami, duhet të jetë ose pronë e komunitetit ose e dhuruar “vakëf”, nga pronari i saj.

“Prishja e lejes së parë nga qeveria e re – rrëzoi marrëveshjen, la xhaminë pa tokën që i duhej për projektin e saj,” thekson Alban Bala dhe derisa kjo ngatërresë e Edi Ramës u transferua në gjyq, dhe Rama nuk pushonte me retorikën e denigrimit të “Xhamisë me Pallat”, familja Kruja zhvilloi edhe negociata direkt me qeverinë për kompensimin e tokës.

“Zv/Kryeministri më thirri për negociata financiare dhe prej ditës së parë, unë ripërsërita qëndrimin tonë: jemi në favor të çdo zgjidhjeje që i hap rrugën xhamisë dhe nëse nuk na doni, e shesim tokën. Çmimi i blerjes është çmimi i metrit katror të një apartamenti në të njëjtën zonë +30%,” sqaroi Bala, por, negociatat janë ndërprerë, kur qeveria mori vendimin për kompensimin e tokës dhe ndërtimin bashkë me xhaminë dhe të Muzeut të Bashkëjetesës.

“I kërkuam KMSH që të analizojë me Këshillin e Teologëve faktin se xhamia e re po synonte të ndërtohej mbi kushtet e ‘Tokës Haram’. I kërkuam të shprehej me shkrim (fetwa) në lidhje me këtë status të pronës. Kurrë nuk morëm një përgjigje,” tha Alban Bala pas këtij vendimi duke sqaruar disa procese gjyqësore për tokën në fjalë dhe të drejtën e dëmshpërblimit me çmime tregu.

“Por pa u përmbushur ky hap, ajo xhami i bie të ngrihet mbi një tokë të rrëmbyer me dhunë shtetërore. Dhe në këto kushte ajo tokë nuk mund të quhet ‘Hallall’.”

Por retorika e Myftiut të Tiranës, Ylli Gurra, ishte shumë më shqetësuese se e komunistit Edi Rama.

“Jemi dëshmitarë të nisjes konkrete të punimeve në terren për xhaminë e Namazgjasë. Zbritja e xhamisë 2 kate nën tokë, do kemi një gjurmë prej 5200 metra katror dhe xhamia do jetë në hapësirën 2415 metra katrorë,” tha Gurra për xhaminë që do të kushtonte rreth 30 milionë euro dhe ndërtohet në bashkëpunim me komunitetin Mysliman të Turqisë dhe donacionet e besimtarëve myslimanë shqiptarë të cilat ende nuk ishin përcaktuar sa do të jenë.

“Nuk flasim për një shifër se sa do të paguaje komuniteti, ndërtimi nga themeli brenda 3 vitesh tërësisht i komunitetit mysliman të Turqisë,” sqaroi Myftiu Gurra e sa për tokën ku do të ndërtohej vetëm sqarim nuk mund të jetë:

“Xhamia do të ndërtohet në tokën e myslimanëve që e zotërojnë prej vitesh ndërsa përsa i përket pretendimeve të familjes Kruja, është një çështje me qeverinë dhe jo me komunitetin.”

Inaugurimi

Në shtetin e Edi Ramës ku nuk mund të ketë “Xhami me Kullë” vetëm pse leja e ndërtimin është firmosur nga Saliu, por mund të ketë “Stadium me Kullë” kur firmoset nga dora vetë Kryeministrit të Shkodrës, Himarës dhe gjithë Shqipërisë, e gjenë Komunitetin Mysliman në lumturi të paparë në mes të gylenistëve, sorosistëve dhe erdoganistëve që i gëzohen inaugurimit të Xhamisë së Namazgjasë edhe pse është ndërtuar në tokë HARAM, nuk do të lejohet pjesëmarrja e Kryetarit të KMSH në ceremoninë e inaugurimit dhe Imam i kësaj xhamie të shumëprritur nuk do të jetë shqiptar!

“Të dashur motra dhe vëllezër, Komuniteti Mysliman i Shqipërisë ka kënaqësinë t’ju njoftojë për evenimentin e madh që do të mbahet ditën e enjte në Tiranë, siç është inaugurimi i Xhamisë së Namazgjasë.

Kjo xhami është një ëndërr e kahershme e popullit shqiptar, e cila u bë e mundur falë bujarisë së popullit vëlla turk dhe insistimit të Presidentit të Republikës së Turqisë, SH.T.Z, Recep Tayyip Erdoğan. Po ashtu Xhamia e madhe e Namazgjasë nuk do ishte bërë sot realitet pa mbështetjen e madhe administrative po edhe financiare të Qeverisë Shqiptare, që falë vullnetit të Kryeministrit Edi Rama i hapi rrugë konsolidimit të pronësisë sonë mbi truallin e Namazgjasë,” shprehet KMSH pa e parë të arsyeshme të sqaroi debatin që u ndez nga impianti i Kryeministrit për imamin turk të xhamisë vetëm se u mjaftua me kënaqësinë se të pranishëm në cenermoninë e inaugurimit, ku Komuniteti Mysliman i Shqipërisë do të përfaqësohet nga Myftiu i Tiranës, Gazment Teqja, do jenë të pranishëm Presidenti Erdogan dhe Kryeministri Rama.

Kështu, pas orës 17:00, sot qytetarët e Tiranës do ta kenë edhe një vendfalje, këtë radhë edhe dinjitoze për nga përmasat, Xhaminë e Namazgjasë, por, për fat të keq do të vazhdojnë ta kenë një Kryeministër të Shqipërisë jodinjitoz, Edi Ramën, i cili arriti ta bind në rastin më të mirë, Komunitetin Mysliman, që të hapet me çdo kusht Xhamia e Namazgjasë, për një arsye të vetme: I duhet vota e myslimanëve në zgjedhjet e ardhshme!

E Komuniteti Mysliman që po arsyetohet nga të gjitha anët duke u munduar ta bind xhematin se Imam i Xhamisë së Namazgjasë nuk do të jetë kleriku turk Enes Bastur, nuk ka pse të sforcohet ashtu siç bënë Myftiu i Tiranës, Gazmend Teqja, për të na bindur se do jetë Imami i kësaj Xhamie, ndërsa për menaxhimin e saj si një kompleks multifunksional do të ngrihet një Fondacion!

Kjo edhe mund të ndodhë, por nuk ka arsye ta bind xhematin, le ta bindë Edi Ramën, atë për të cilin KMSH thotë se i hapi rrugë konsolidimit të pronësisë HARAM mbi truallin e Namazgjasë!