Buxheti 2025, Berisha: Zero rritje të pagave, injorim total shëndetësisë, arsimit, fermerëve dhe biznesit

Buxhetin për vitin 2025 që Qeveria Rama dorëzoi këto ditë në parlament, sipas Kryetarit të Partisë Demokratike, Sali Berisha, nuk është buxhet i qytetarëve, parashikon zero rritje të pagave dhe injoron totalisht shëndetësinë, arsimin, fermerët dhe biznesin.

Fondi i rimbursimit të ilaçeve është ai që ishte 5 vite më parë, tha Kryetari i PD, për rreth 800 mijë pensionistë janë lënë për vitin e ardshëm vetëm 16 milionë euro, për pronarët tre herë më pak se ç’kishin në vitin 2013, ndërsa për rreth 180 mijë shqiptarë që jetojnë në varfëri ekstreme me ndihmë ekonomike nuk iu është lënë një qindarkë.

“Ky buxhet në total prej 8.2 miliardë euro është buxheti më i madh dhe që në pamje të parë duhet të ofronte mirësinë më të madhe për qytetarët shqiptarë. Por, në Shqipëri ka ndodhur një fenomen paradoksal. Rritja e përvitshme e buxhetit gjer pothuajse në dyfishimin e tij është shoëqruar në mënyrë të habitshme me rritjen e përvitshme të varfërisë.
Varfërisë relative, varfërisë të skajshme apo mjerimit.
Kjo dukuri unike është tipar kardinal i buxheteve të diktaturave ideologjike dhe mobokracive kleptokratike.
Nuk mund të ndodhë kurrë kjo përveçse në regjime ku paratë përdoren siç i përdorte diktatori Hoxha për bunkerë dhe tunele, ose siç i përdor Edi Rama për punëra publike me çmime 10 herë më të lartë se në Kroaci.
Kështu që ky buxhet, para se gjithash mund të cilësohet si buxheti i triumfit të kleptokracisë, të vjedhjes, parajsës qeveritare dhe si buxhet pa mëdyshje i ndëshkimit të qytetarëve shqiptarë,” tha Sali Berisha duek e zbërthyer këtë togfjalësh:

“Së pari, në qoftë se ju merrni dhe studioni buxhetin, do të gjeni se pjesa dërrmuese e tij nuk i përkushtohet qytetarit, shërbimeve, trajtimit, pagesave ndaj tij, por është investim kapital njëlloj siç ndodhte në diktaturën ideologjike ku 35 përqind e buxhetit investohej në bunkerë dhe tunele, por këtu nuk ka bunkerë dhe tunele. Këtu investohet në rrugë, punë publike që ndërtohen me çmim të 10-fishtë.

Si rregull, investimi në rrugë është investimi ndër më fitimprurësit dhe Banka Botërore në studimet e veta, ka gjetur se 1 milion i investuar në rrugë është 4 milionë fitim në të ardhura pas investimit. Me dy kushte, kushti i parë është që investimi të jetë fizibël, pra të jetë ekonomikisht i leverdisshëm. Dhe natyrisht jo kurrë si tuneli i Llogarasë që i vihet dryni në tetor dhe i hapen portat në qershor dhe që ka kushtuar 65 mijë euro për banor.

Natyrisht jo kurrë si aeroporti i Vlorës, që shpallet aeroporti më i madh i Ballkanit, që ndërtohet me një çmim të katërfishtë krahasuar me një aeroport të përmasave që do kishte nevojë Vlora dhe që gjobit qytetarët shqiptarë me biletat jo më pak se 600 mijë në vit.

Investimet në rrugë mund të shndërrohen në ndëshkim, jo vetëm kur fizibiliteti nuk ekziston, por kur ato nuk realizohen në kohën optimale. Jashtë kohës optimale të tyre, këto investime zbehen deri në shuarje.

Do ju jap një shembull sot, 12 vite vazhdoi rruga 34 km Korçë-Ersekë. U ndërtua me 800 mijë euro km, kurse 7 kilometrat e dytë kaluan, pasi erdhi Edi Rama në pushtet, nga 800 mijë euro, në 4-5 milionë euro kilometri. Ju garantoj se rruga Korçë-Ersekë jo që nuk rikthen investimin, por nuk e shlyen atë as për dy gjenerata.”

Po çfarë mbetet nga buxheti më i madh në histori për qytetarët shqiptarë?

“Për shërbimin shëndetësor, investohet gjithsej 2.5 përqind e Prodhimit të Brendshëm. Për arsimin, 2.9, por mos harroni se shpenzimet totale janë rritur me 6.7 përqind. Pra, shpenzimet në këto dy fusha rriten pothuajse 3 herë më pak se në fushat e tjera. Fusha që kanë lidhje direkt me qytetarin, me shëndetin, me fëmijët e tyre.

Çfarë ndodh me rrogat?

Zero rritje rrogave në vitin 2025.

Çfarë ndodh me fermerët?

Trajtim qesharak i paimagjinueshëm.

Taksa ndëshkuese TVSH nuk ndryshon dhe lihen gjithsej 40 milionë për ata të cilët japin mbi 20 përqind të prodhimit bruto të vendit.

A mund të imagjinoni ju 40 milionë euro për ata që përbëjnë 40 përqind të popullatës së vendit dhe japini 20 përqind? Atyre u thuhet falimentoni, falimentoni, falimentoni.

Çfarë ndodh me bizneset? Sa u kalon nga ky buxhet bizneseve që janë gjeneratorët e tij? Jo vetëm që nuk ulen taksat, por rriten përsëri taksat dhe përveç tyre, parashikohen që nëpërmjet metodave arbitrare, të paguajnë edhe 500 milionë euro më tepër,” tha Berisha ndërsa shtoi se Buxheti 2025 i Edi Ramës parashikon vetëm 16 milionë euro për rreth 800 mijë pensionistë!

“Kjo është çnjerëzore! Tani, le të kthehemi tek ata që numërojnë kafshatën. Se gjer tani këto nuk janë kategori që numërojnë kafshatën. Janë dy kategori tjera që në Shqipëri numërojnë kafshatën dhe këta janë 790 mijë pensionistë dhe janë 62 mijë familje në ndihmë ekonomike. Për 62 mijë familje në ndihmë ekonomike, të cilët de facto janë në varfëri ekstreme, nuk shtohet asnjë qindarkë.
A mund të imagjinoni pra, buxhetin më të madh të kohërave dhe ata të cilët rropaten çdo ditë me dhimbje dhe skamje, nuk përfitojnë asnjë qindarkë. A ka cinizëm më të madh se ky,” tha kreu demokrat duke vazhduar me pensionistë.

“Përbëjnë rreth 800 mijë. Se si janë injoruar këta, do u jap vetëm një shembull. Nga viti 2014 gjer në vitin 2024, me indeksim pensioni mesatar është rritur 27 për qind. Me indeksim. Kurse buxheti është rritur 87 përqind.

Mirëpo kjo 27 për qind rritje në aparencë është fake, është kallp sepse inflacioni zyrtar nga 2014 gjer në 2024 është rritur me 34 përqind. Kurse inflacioni i ushqimeve bazë që janë dhe shpenzimi kryesor pensionistët, është rritur të paktën me 50 për qind.
Atëherë, sot çdo pensionist merr miminalisht një pension më të ulët në raport me fuqinë blerëse se sa në vitin 2014. A ka cinizëm, injorim dhe më shumë se injorim që në tërë këtë buxhet të lësh për pensionistët gjithsej 16 milionë euro?”
Ndërkohë që ke zvogëluar listën e rimbursueshme dhe prej vitesh nuk ke shtuar asnjë ilaç në fondin e ilaçeve të tyre.
Pra, buxhetin mund t’i japësh shumë etiketa, por më çnjerëzor, Shqipëria nuk ka patur kurrë të tillë.
Dhe këtë e bëjnë vetëm ata që zhgërryhen në luksin e krijuar nga vjedhja e këtyre qytetarëve.
Ja pra pse buxheti pothuaj dyfishohet, kurse varfëria dy dhe trefishohet.
Unë ju them ju se varfëria ekstreme është trefishuar gjatë këtyre tre viteve.”

Me këtë Berisha bëri të ditur se Partia Demokratika do të dorëzoj dy amendamente, ku kryeamendamenti do jetë ai i minimumit jetik, 200 euro.

“Të fajësosh biznesmenët në një kohë kur kontributet dhe sigurimet shoqërore janë rritur. Fondi nga buxheti për këto është zvogëluar. Së dyti, të fajësosh bizneset në një kohë kur buxhetit 8.2 miliardë euro është i tëri produkt i tyre, ka përdorur dikur një shprehje një politikan, që nuk më shkon, por po e rikujtoj se kësaj i thotë, të lehësh si një qen në han.
Pensionisti dhe pensionistja që merr sot bukën më shtrenjtë se pardje, që merr sot një pension që blen të paktën 20% më pak seç blinte në vitin 2013, kanë të drejtë ti thonë, në këto 8 miliardë cila është pjesa jonë. Pse në Maqedoni marrin 250 % më shumë, pse në Mal të Zi, marri 280% më shumë, pse Kosova i rriti me 20%, dhe dorëzoi nga buxheti në fondin e pensioneve 100 mln euro. Ishte 500, e bëri 600.
Çfarë të pengon ty të kalosh në fondin e pensioneve 700 mln euro suficit. Nuk ka një qëndrim më të pandërgjegjshëm. Biznesit i janë marrë 8.2 miliardë euro. Pensionistëve i janë lënë 16 mln euro. A e dini se çfarë bëri me ta këtë vit. Këtë vit ua mori pensionistëve 4% që u takonin ta merrnin nga muaji mars në tetor dhe tani do të ua japë dhuratë për vitin e ri.
Ky është një akt i shplarë, më se paku të themi, do të ju japë atë që ligji, se buxheti është ligj i votuar në parlament, nuk i ka paratë e Kristaq Ramës ai këtu. Dhe ligji i parlamentit u jepte atyre, indeksimin me 4%, kurse ky nga marsi në tetor ua mori dhe tani do të ua japë dhuratë për vit të ri.
Sjellja e tij ndaj pensionistëve është më ç’njerëzorja që mund të bëjë kush. Ne do të dërgojmë dy ligje. Minimumin jetik 200 euro, të llogaritur nga Avokati i Popullit dhe ILO. Jorida Tabaku ka bërë një amendament për minatoret. Këto janë dy amendamentet, por kryeamendamenti është ai i minimumit jetik,” tha lideri i opozitës duke e mbyllur me zotimin për qeverinë demokratike me rrogën minimale 500 euro.

“Dua ta mbyll duke dënuar me forcën më të madhe buxhetin e vitit 2025 si një buxhet që shkelmon apo ndëshkon me injorimin e tij qytetarët shqiptarë, shërbimet, nevojat dhe kërkesat e tyre.
Si një buxhet që injoron në mënyrë cinike të gjithë rrogëtarët shqiptarë, pasi nuk përcakton asnjë rritje rroge. Si një buxhet që injoron fermerët e Shqipërisë, pasi ka përcaktuar në mënyrën më tallëse 40 milionë euro gjithsej për 40 përqind të popullatës. Si një buxhet që shpërfill totalisht biznesin, dhe që jo vetëm nuk parashikon asnjë masë lehtësuese të veprimtarisë së tyre. Merrni eksportet, që janë baras prodhim, kanë një rënie 20 përqind dhe nuk kanë asnjë mbështetje nga ky buxhet.
Por në tërësi buxheti jo vetëm që nuk ka një mbështetje, një lehtësi, përkundrazi parashikohen gjysmë miliardë euro t’u merren më shumë. Dhe harroni se ua merr oligarkëve, jo, jo, ata e peshojnë atë në kandar. Ua merr biznesmenëve të vegjël dhe të mesëm,” tha Kryetari i Partisë Demokratike, Sali Berisha, duke rikujtuar se Fondi i rimbursimit të ilaçeve është ai që ishte 5 vite më parë, për rreth 800 mijë pensionistë janë lënë për vitin e ardshëm, në mënyrën më cinike 16 milionë euro, për pronarët, tre herë më pak se ç’kishin në vitin 2013, për rreth 180 mijë shqiptarë që jetojnë në varfëri ekstreme me ndihmë ekonomike nuk është lënë një qindarkë, ndërsa duke shpresuar që shqiptarët t’i dalin zot dhe bo të bashkohen me opozitën e vërtetë për të firmosur garantoj se ligji i parë që do miratohet do jetë minimumi jetik me 200 euro për çdo shqiptar.
“Nuk do ketë qytetar shqiptar nën 200 euro, pavarësisht nga çdo gjë tjetër. Dhe pastaj dyfishim i rrogave. Rroga minimale 500 euro dhe ai sharlatani i Surrelit thoshte se po deklarojmë pensionin 500 euro. Kemi deklaruar rrogën minimale 500 euro. Po rritja progresive e pensioneve, të harrojë më se do ketë rritje të rrogave të larta.”