PD në pushtet – Edi Rama azil politik, Berisha: Alex Soros non grata, Fondacioni mbyllet!

Ndërsa renditi arsyet pse rritja ekonomike e vendit nuk pasqyron përmirësimin e gjendjes ekonomike të qytetarëve, sot Kryetari i Partis Demokratike, Sali Berisha, tha se Kryeministri Edi Rama do shpenzojë 430 milionë euro për investitorët strategjikë, kurse qytetarët fitojnë vetëm 4 euro për turist!

Ndërkohë Kryetari i Partisë Demokratike zotohet për zbatimin me rreptësi të ligjeve të konkurrencës dhe garanton garë të ndershme për bizneset shqiptare, me hapje ekonomike mbi bazën e rregullave të forta, ligjeve të zbatuara për biznesin ndërkombëtar.

Me ardhjen e Partisë Demokratike në pushtet, kur Edi Rama të ketë marrë azil politik, Sali Berisha bëri dhe një zotim solemn se ndër aktet e para do jetë mbylja e Fondacionit Soros

“Sot jam para jush për të shprehur shqetësimin tim më të thellë për gjendjen aktuale të ekonomisë shqiptare.
Së pari, shpreh shqetësim dhe hidhërimin tim sepse në Shqipëri si rrallë, shumë rrallë në ndonjë vend tjetër të planetit, në vendet e diktaturave më të egra, rritja ekonomike e vendit nuk pasqyron rritjen apo përmirësimin e gjendjes ekonomike të qytetarëve. Është tejet e hidhur se dyfishimi i prodhimit të përgjithshëm të vendit në 11 vite, i të ardhurave në buxhet në 11 vite nuk ka gjetur asnjë pasqyrim në ekonominë dhe buxhetin familjar të rreth gjysmës së shqiptarëve.

Përkundrazi, në prani të kësaj rritje, e cila theksoj dhe njëherë, shënon rreth dyfishimin e prodhimit të brendshëm dhe të buxhetit në 11 vite, 800 mijë pensionistë shqiptarë nuk kanë gëzuar asnjë rritje të pensionit të tyre. Ndaj dhe sot, me pensionin aktual, çdo pensionist pas këtij indeksimi, blen 30-40 përqind më pak ushqime se sa blintenë vitin 2013 apo 2014.
Kjo rritje ekonomike dhe ky dyfishim buxheti nuk ka pasur kurrë pasqyrimin e duhur as në rritjen e rrogave minimale dhe mesatare. Rrogat minimale dhe mesatare mbeten më të ulëtat në rajon, ndërkohë që në vitin 2013 këto ishin rrogat më të larta në rajon,” shprehet Sali Berisha duke konstatuar se rritja ekonomike nuk ka një pasqyrim.
“Rritja ekonomike nuk ka asnjë pasqyrim në jetën e 66 mijë familjeve në ndihmë ekonomike.
Ajo mbetet krejtësisht e huaj, pothuaj inekzistente për 40 përqind të popullatës në fshat, e cila merr si subvencion në buxhetin më të madh në histori prej 8.2 miliardë eurosh, gjithsej 40 milionë euro.
Rritja ekonomike nuk është pasqyruar në detyrimet e shtetit ndaj qytetarëve të vet, ish-të përndjekurve politikë dhe pronarëve legjitimë të konfiskuar nga regjimi komunist.

Rëndom mund të shtrohet pyetja: çfarë ndodhi, si ka mundësi që prodhimi i brendshëm bruto dyfishohet, kurse varfëria rritet nga 13 në 43 përqind.
Si ka mundësi që buxheti dyfishohet, kurse mjerimi, varfëria ekstreme, rritet nga 1.04 në 3.4 përqind?
Si ka mundësi që të mashtrohen 800 mijë pensionistë me indeksimin dhe të mos indeksohet as gjysma e rritjes së çmimeve?”
Po çfarë ndodh me të ardhurat e krijuara nga rritja ekonomike, shtron pyetje lideri i opozitës.
“Kemi të bëjmë me një shpërndarje që shkon përmes grabitjes në masën 90 përqind në kontot bankare dhe investimet e Edi Ramës, zyrtarëve dhe qeveritarëve të tij vendorë dhe qëndrorë.
Kemi të bëjmë me dhurata që Edi Rama u bën narkotrafikantëve, investitorëve strategjikë dhe ministrave të tij investitorë strategjikë.
Rikujtoj qytetarët shqiptarë se kjo kategori e investitorëve strategjikë përfiton nga shteti rreth 430 milionë euro. Ndërkohë është 8 vite pa taksa. Ndërkohë nga çdo turist që vjen në këto resorte, qytetari shqiptar merr gjithsej 4 euro.
Të shpenzosh 430 milionë euro për resortet e investitorëve strategjikë, pasi u ke dhuruar atyre 6 milionë metër katrorë tokë në troje turistike, do të thotë të shfrytëzosh me egërsi qytetarët shqiptarë dhe të krijosh parajsën për një grup qeveritarësh dhe delinkuentësh që nuk ngopen kurrë.”

Ekonomia rritet, buxheti dyfishohet, por në spitalet tona mungojnë ilaçet më jetike për të sëmurët.

“Tragjike është se për shkak të vjedhjes së fondeve të ilaçeve, Ministria e Shëndetësisë dhe drejtoria e QSUT janë shpallur me të drejtë si Bursa e Vdekjes.
Prodhimi i brendshëm bruto dyfishohet, por cilësia e arsimit dhe investimi për arsimin bie në mënyrë katastrofale. E gjitha kjo sepse vidhet. Ndaj dhe Shqipëria rrokulliset në treguesin e cilësisë në PISA me 68 pikë. Mekanizmat e krijuara nga qeveria për të vjedhur buxhetin janë të lemerishme.
Ato konsistojnë në vjedhjen 100 përqind të fondeve të caktuara për punë publike, siç është rasti i djegësave. Janë investuar nga taksat e shqiptarëve 200 milionë euro në 3 djegësa. Asnjë prej tyre nuk punon. I Tiranës nuk është ndërtuar fare, i Fierit nuk u vu në përdorim, kurse i Elbasanit ka funksionuar gjithsej 2 javë,” vazhdoi Berisha duke fol për vjedhjen e pakufishme të fondeve publike nga qeveritarët.

“Rikujtoj se vetëm me Unazën e Tiranës, projektin e megakorrupsionit Rama-Balluku, 13 km të saj janë ndarë në 14 kontrata, në mënyrë që të gjobiten 14 kompani dhe të vidhen.
Këto janë pra shqetësimi ynë i madh për ekonominë dhe gjendjen e saj, nga e cila nuk përfitojnë qytetarët shqiptarë, por varfërohen.”

Me këtë rast, kreu i demokratëve shpalosi programin për biznesin, ku veçohet përgjysmimi i taksave, hapja e ekonomisë dhe garantimi i një gare të ndershme.

“Shqetësimi ynë i dytë shumë i madh është gjendja e biznesit në Shqipëri, në të cilën dora e zezë e qeverisë ndërhyn në mënyrë të egër.
Shqipëria është i vetmi vend në planet në të cilin gjatë 11 vite, sistemi ligjor tatimor ka pësuar 60 ndryshime, gjë që hedh në erë çdo siguri juridike për investitorët në Shqipëri.
Shtojmë këtu faktin se një çështje civile, për t’u gjykuar në gjykatat e reformës së Xhorxh Sorosit dhe Edi Ramës, kërkon 14 vite. Bëjnë që investitorët e huaj të kthejnë kokën dhe të mos pranojnë të investojnë të ardhurat e tyre në Shqipëri,” tha Berisha duke vlerësuar se goditja në zemër e konkurrencës nga klientelizmi i qeverisë është një faktor madhor që e mbyt ekonominë shqiptarë dhe e bën aët të varur kryekëput nga narkoekonomia.

“Rritja ekonomike është narkorritje. U detyrohet kullave, të cilat janë 4 miliardë gjer tani, investime të shëmtuara të drogës dhe korrupsionit. Në agjencitë shtetërore, 90 përqind e prokurimeve fitohen nga 2-3 kompani. Kampion për këtë është kryekorrupturja dixhitale AKSHI, apo siç e quajnë ndryshe kopshti prapa shtëpie i Edi Ramës, ku kunati i Lindës dhe baxhanaku i Ramës bëjnë kërdinë me tendera, vetë apo me kompani të tjera të lidhura. Në këtë agjenci ka arritur që gjer në 80 përqind të tenderave t’i marrë një kompani. 4-5 janë kompani që marrin tenderat e Lubi Ballukut,” tha kryedemokrati duke u zotuar për zbatimin me rreptësi të ligjeve të konkurrencës

“PD garanton garë të ndershme për bizneset shqiptare. Ajo zotohet të hapë ekonomike mbi bazën e rregullave të forta, ligjeve të zbatuara për biznesin ndërkombëtar.
Zotohet pra të garantojë lirinë ekonomike, vizioni ynë është gara e ndershme, është shteti ligjor.
Po vizioni ynë janë taksat e ulëta.
Edhe njëherë, ne garantojmë biznesin se përgjysmimi i taksave mbetet shtyllë kryesore e programit tonë.
Roli i qeverisë do jetë i kufizuar dhe vetëm i kufizuar në mënyrë që sipërmarrësit të gëzojnë lirinë që meritojnë për suksesin e bizneseve të tyre.
Një nxitje të veçantë do ketë inovacioni, sipërmarrja, start-upet, kreditë e buta për të rinjtë, pra qeveria do bëjë gjithçka të favorizojë dhe mbështesë biznesin. Një fond i fuqishëm do garantojë eksportet e shqiptarëve,” tha Berisha ndërsa me konkluzionin se vetëm një ekonomi që eksporton është një ekonomi që bazohet mbi prodhimin, shtonn:

“Shqipëria është një nga vendet me pasuritë më të mëdha, me një potencial të madh eksporti, por edhe prodhimi të brendshëm industrial.
Ndaj dhe ne në programin tonë, duke përcaktuar si shtyllë kryesore të këtij programi ekonominë, zotohemi që në një periudhë të shpejtë, së pari të shndërrojmë rritjen ekonomike në mirëqenie, përmirësim të buxhetit të qytetarëve shqiptarë dhe së dyti, me një klimë miqësore ndaj biznesit të nxisim gjithnjë e më shumë suksesin, të mbështesim suksesin e tij.”

Në fund, Kryetari i PD u zotua se me ardhjen e Partisë Demokratike në pushtet, kur Edi Rama mendohet se do ketë kërkuar azil politik,

“Janë informacione që duhen verifikuar dhe shqyrtuar, por të dhënat janë se ai ka parashikuar një ekzil diku sepse e di që do jetë ‘wanted’ jo vetëm nga drejtësia shqiptare, por edhe drejtësia e vendeve të tjera.
Nuk e kam specifikuar vendin. Se mund të shkojë edhe te Lukashenko, se i lidh Alabari me Lukashenkon.
Po drekonte dje a pardje me të në Baku,” tha Kryetari i Partisë Demokratike, Sali Berisha, duke garantuar Alex Sorosin se ndër aktet e para të qeverisë demokratike, Fondacioni i tij do mbyllet njëherë e përgjithmonë në Shqipëri dhe Alexi do shpallet non-grata.

“Procesi ndaj Sali Berishës është procesi më i turpshëm në historinë e këtij vendi. Është një proces politik i ndërmarrë në kuadrin e grushtit të shtetit të mafies shqiptaro-amerikane të George Soros kundër opozitës shqiptare. Është një proces që nxori në pah të gjithë shëmtinë e atyre që organizuan puçin kundër opozitës shqiptare dhe demokracisë shqiptare për t’i dhënë të gjitha pushtetet Edi Ramës.

Procesi politik, por jo vetëm, por edhe procesi ndaj Salianjit, Belerit, Metës, Malltezit, Mediut, etj, janë procese të një narkodiktatori, i cili i zhytur gjer në veshë në krime të rënda, me firmën dhe vulën e tij, përpiqet të bëjë çdo gjë për të grabitur mandatin e katërt. Nuk mund të them se çfarë qëndrimi do mbajnë, por ky është qëndrimi ynë.
Është një proces në kuadër të grushtit të shtetit që u organizua kundër opozitës konservatore në Shqipëri dhe Sali Berishës. Kjo është e vërteta dhe unë vazhdoj betejën time i palëkundur kundër kësaj diktature,” tha Kryetari i Partisë Demokratike Sali Berisha, duke garantuar qytetarët shqiptarë se kjo diktaturë të ardhme nuk ka dhe se kauza jonë e drejtë do triumfojë ndërsa përfundoi:

“Mafia ndërkombëtare më e rrezikshme e kohërave, me në krye George Soros, mori një goditje ndër më të fuqishmet në kokë me datën 5 nëntor nga qytetarët amerikanë, të cilët me votën e tyre firmosën mrekullinë amerikanë dhe jo vetëm.
Kështu që është një betejë e gjerë, është një betejë jo e lehtë, por natyrisht shqiptarët nuk do kenë më çdo dy javë mysafir të paftuar për shumicën e tyre, kryemafiozin Aleksis Soros, i cili në udhëtimet e tij enigmatike, nuk ka njeri që mund të thotë se pse vinte çdo dy javë dhe çfarë transportonte ai, por edhe këto po shkojnë drejt fundit.
E garantoj Aleksis Soros se në aktet e para, fondacioni i tij do mbyllet njëherë e përgjithmonë në Shqipëri dhe ai do shpallet non-grata. Kurse Edi Ramën, edhe njëherë e theksoj, e pret McGonigali.”