Countryman: Zbatimi i Marrëveshjes së Ohrit është kyç
“Problemi kryesor në dialog dhe përparimi drejt BE-së janë ngadalësia e qeverive në Beograd dhe Prishtinë dhe mungesa e vendimeve të vështira”. Këtë e vlerësoi Ish-Nd/Sekretari amerikan i shtetit, Thomas Countryman, i cili nuk pret ndryshime të mëdha në Ballkanin Perëndimor as pas rizgjedhjes së Donald Trump si President i SHBA-ve.
Ish-Nd/Sekretari amerikan i shtetit për Evropën vlerësoi se edhe pas rizgjedhjes së Donald Trump, problemi kryesor qëndron në mungesën e reformave dhe vullnetit politik si të qeverisë në Beograd ashtu dhe Prishtinë.
“Sinqerisht, nuk mendoj se zgjedhja e Donald Trumpit do të sjellë ndryshime të mëdha në Ballkanin Perëndimor. Problemi thelbësor nuk qëndron tek BE-ja apo Washingtoni, por tek qeveritë në Beograd dhe Prishtinë, të cilat nuk ndërmarrin hapat e nevojshëm për të përmirësuar dialogun apo përparimin drejt BE-së. Për shembull, qeveria e Serbisë mirëpret zgjedhjen e zotit Trump, duke besuar në një simpati më të madhe për pozitën serbe. Por, unë nuk jam i bindur se qeveria e Serbisë është e gatshme të marrë vendime të vështira,” tha Countryman për RTK ndësa po merr pjesë në Konferencën e Sigurisë në Beograd, thekson s evendimet e vështira lidhen me reformat për anëtarësimin në Bashkimin Evropian, veçanërisht në fushat e sundimit të ligjit, një gjyqësor të pavarur, lirinë e mediave dhe luftën kundër korrupsionit.
“Unë nuk shoh që qeveria serbe të ndërmarrë hapa seriozë në këto fusha,” thekson ish-diplomati amerikan duke konstatuar se ndryshimet në Ballkanin Perëndimor nuk ndodhin shpejt.
“Edhe pse me çështjet e Ballkanit merrem herë pas here gjatë 40 viteve të fundit, mund të them se asgjë nuk ndodh shpejt. Nuk pres ndryshime radikale. Nuk ndjek detajet e politikës së brendshme të Kosovës, por është fakt se qeveria në Prishtinë është shumë e ndjeshme ndaj çështjeve të brendshme!”
Si shembull, Ish-Nd/Sekretari amerikan i shtetit përmendi çështjen e formimit të Asociacionit të Komunave me shumicë serbe, që, siç tha, ka implikime kushtetuese për Kosovën.
“E kuptoj që kjo është një çështje e vështirë dhe që ka implikime kushtetuese për Kosovën, por nuk mund të pranoj se nuk ka mundësi për të diskutuar se si të realizohet kjo në një mënyrë domethënëse, pa cenuar Kushtetutën e Kosovës.”
Për perspektivën e marrëdhënieve ndërmjet Serbisë dhe Kosovës, Countryman thekson rëndësinë e zbatimit të Marrëveshjes së Ohrit, por nuk është optimist se qëndrimi i të dyja palëve do të ndryshojnë shpejt.
“Asgjë nuk do të ndodhë shpejt. Zbatimi i Marrëveshjes së Ohrit është i rëndësishëm, dhe implementimi i saj, duke respektuar të drejtat e Kosovës të përcaktuara në marrëveshjet e deritanishme, duhet të jetë prioritet për qeverinë e Serbisë. Megjithatë, nuk jam optimist se ndonjëra palë do të ndryshojë shpejt qasjen e saj,” thekson Ish-Nd/Sekretari amerikan i shtetit për Evropian, Thomas Countryman, duk ekonkluduar se përparimi në marrëdhëniet ndërmjet Serbisë dhe Kosovës kërkon përkushtim dhe vendime të guximshme nga të dyja palët, çka aktualisht mungon.
