Pas sulmit me granatë, Kryetari i Komunës Zveçan: Akt i papranueshëm i dhunës dhe terrorit!
Kyetari i Komunës Zveçan, Ilir Peci, duke dënuar aktin e papranueshëm të dhunës dhe terrorit pak para mesnatës ndaj godinë së komunës, kujton se rast i ngjashëm ka ndodh para dy ditëve ndaj Komisiariatit të Policisë, i bindur se kjo nuk do të ndikoj për të vendosur rendin dhe për të garantuar mirëqenien për të gjithë qytetarët.
Pas sulmit terrorist kanë reaguar edhe Ministri i Administrimit të Pushtetit Lokal, Elbert Krasniqi, dhe Kryeministri Albin Kurti duke i cilësuar akte kriminale dhe terroriste me qëllim frike, por, në Kosovë nuk mund të ketë asnjë individ apo strukturë më të fuqishëm se shteti.
“Mbrëmjen e djeshme, rreth orës 23:45, disa individë të paidentifikuar kanë kryer një sulm ndaj objektit të Komunës së Zveçanit me granata dore. Ky akt i dhunshëm ka shkaktuar dëme materiale, por fatmirësisht nuk ka pasur të lënduar,”bënë të ditur Kryetari i Komunës Zveçan, Ilir Peci, përmes rrjetit social Facebook duke dënuar këtë akt të dhunës dhe terrorit.
“Si kryetar i Komunës, unë e dënoj fuqishëm këtë akt të papranueshëm të dhunës dhe terrorit ku para dy dite ka ndodhur i njëjti sulm në stacionin policor të Komunës së Zveçanit!”
Ndërkohë Ministri i Administrimit të Pushtetit Lokal, Elbert Krasniqi duke dënuar sulmin tha se sulmet e tilla nuk do të zbehin vendosmërinë e institucioneve të Kosovës për të vendosur rendin.
“Dënoj fuqishëm sulmin kriminal e qyqar ndaj objektit të Komunës së Zveçanit. Komunat e Republikës së Kosovës janë funksionale dhe të gatshme për t’i shërbyer të gjithë qytetarëve të tyre, pa dallim. Sulmet e tilla nuk do të zbehin vendosmërinë e institucioneve të Republikës së Kosovës për të vendosur rendin dhe për të garantuar mirëqenien për të gjithë qytetarët tanë. Republika nuk zmbrapset,” shprehet ministri Elbert Krasnisi përmes rrjetit social Facebook, ndërsa Kryeministri Albin Kurti ishte i prerë edhe pas aktit të dytë terroristë brenda pak ditëve:
“Keqbërës nuk është që nuk ka, mirëpo strukturat kriminale ose kanë ikur në Serbi, ose janë në burg në Kosovë. Nuk kemi burime të brendshme të destabilitet potencial, që nuk i menaxhojmë, e nuk ia dalim në ballafaqim me ta,” tha Kryeministri Albin Kurti në reagimin e tij duke përfunduar:
“Shprehje e pafuqisë së tyre, akte terrorizimi, që kanë qëllim të mbjellin frikë!”
Ndryshe, mbrëmë para mesnatës një granatë dore është hedhur në oborrin e Komunës Zveçan ku sipas Zv/Drejtorit të Policisë së Kosovës në Veri, Veton Elshani, nga sulmi nuk ka të lënduar, por është dëmtuar ndërtesa e komunës dhe katër makina që ishin të parkuara në afërsi.
