Shqipëria do të rihapë ambasadën në Bosnje dhe do të hapë tre të reja në 2025-ën

Ministri i Jashtëm, Igli Hasani, sot ka bërë të ditur se vitin e ardhshëm Shqipëria do të rihapë ambasadën në Bosnje Hercegovinë si dhe do të hapë tre përfaqësi të reja diplomatike.

Igli Hasani tregoi se përveç Bosnje Hercegovinës, Shqipëria do të vendosë ambasada në Indi, Indonezi dhe Kenia.

“Në vitin 2025 hapim ambasada të reja në Bosnje Hercegovinë, Indi, Indonezi dhe Kenia. Këto përfaqësi do të ndihmojnë në përfaqësimin e Shqipërisë në rajone strategjik e si edhe në forcimin e partneriteteve,” u shpreh Ministri i Jashtëm, Igli Hasani.

Ndryshe, në dhjetorin e vitit 2013, Qeveria e Shqipërisë me ministër të Jashtëm, Ditmir Bushati, mbylli ambasadat në Bosnje Hercegovinë, Mal të Zi, Kroaci, Danimarkë, Portugali, Malajzi, Emirate, Katar, Sllovaki, ku Hungaria mbeti çështje e hapur.