Kryeministri flet për ato që askush nuk i pa: Luftojmë korrupsionin endemik! Na ka goditur fort syri i keq!

Konferenca e fundvitit e Kryeministrit Edi Rama në prag të vitit zgjedhor ishte ndryshe nga vitet e tjera gjatë skanimit që i bëri vitit që po lëmë pas, duke folur për gjëra që çdo shqiptar që bukës i thotë bukë e ujit i thotë ujë, nuk i pa me sy!

Sot tha se po lufton korrupsionin endemik por që nga krijimi i SPAK-ut nuk është proceduar asnjë zyrtarë i pushtetit të Edi Ramës për korrupsion dhe shumë më pak endemik! Madje çdo procedim ka ndodhur nga opozita!

Dhe, çuditërisht kur ishte në opozitë akuzonte mazhorancën se po i shembej tuneli në Rrugën e Kombit, dhe kur kjo ndodhë me një tunel si ai Murrizit kur Edi Rama është në pushtet, sot ai thotë se është goditur fort nga syri i keq!

“Po e nis me faktin më domethënës të vitit që po lëmë pas, sipas meje, çelja e negociatave për anëtarësim me BE, praktikisht të dy grupkapitujve të rëndësishëm duke nisur nga themelorët që janë në një mënyrë grupi i grupeve dhe marrëdhënieve me jashtë.
Është me rëndësi të theksoj diçka që e keni dëgjuar edhe më parë, që procesi i jashtëzakonshëm për nga volumi i punës intensiteti dhe cilësia, do të ishte pamundur nëse një skuadër e madhe kombëtare e Shqipërisë, qindra punonjës, nuk do të kishin bërë më parë punën e shkëlqyer me procesin screening ose diagnozën e sistemit të Republikës Shqiptërisë në të gjitha fushat.

Për hir të së vërtetës, ecuria e procesit, vlerësimet befasuese të KE dhe qeverive që ishin tipikisht përfaqësuese të vendeve më skeptike për përformancës e skuadrës sonë, janë një shtysë e motivim e fakt shumë domethënës për çfarë është bërë në gjithë këto vite,” tha Edi Rama duke shtuar se Shqipëria dhe vendet e rajonit kanë marrë dritën jeshile për t’u bashkuar me familjen e madhe europiane në disa specifike.

“Ndryshe nga sa ka ndodhur, ne vendet e rajonit kemi një instrument të ri financiar në planin e rritjes ku në periudhën nga sot në 2027 do të thithim rreth 1 mld euro plus,” tha Kryeministri Rama duke e përmend si arritje edhe daljen e Shqipërisë nga faza e monitorimit të plotë të Asamblesë Parlamentare të KiE.

“Këtë vit, nuk jam një ndjekës i rregullt i lajmeve, nuk ka bërë bujën e duhur, por Shqipëria ka dalë pas 20 vjetësh nga faza e monitorimit të plotë të Asamblesë Parlamentare të KiE. Jemi njësoj si ato vende që duam të bashkohemi në familjen europiane brenda kësaj dekade.

Së treti, Shqipëria është bërë nxitësi dhe ia dalë të shtyjë dhe të bëjë të mundur duke u futur në bashkëpunim edhe me vendet e tjera të rajonit, nga ku doli plani i rritjes së BE në mbështetje të vendeve të Ballkanit Perëndimor.

Ka qenë një proces jo i lehtë, një këmbëngulje e vazhdueshme nga të gjitha kontaktet, shkëmbimet e dokumenteve me zyrën e Presidentes së KE me disa nga kancelaritë kryesore të BE, për të arritur në procesin tradicional i integrimit të hyjë një element i ri i cili tanimë ka hyrë edhe në fjalorin e bisedimeve si anëtarësimi gradual.

Kjo do të thotë se ndryshe nga sa ka ndodhur, ne vendet e rajonit kemi një instrument të ri financiar në planin e rritjes ku në periudhën nga sot në 2027 do të thithim rreth 1 mld euro plus dhe kemi njëkohësisht edhe dritën jeshile për t’u bashkuar me familjen europiane në disa segmente të europës së bashkuar.

Që nga 21 nëntori shqiptarët në të gjithë botën që bëjnë transferta parash nga zona të BE drejt Shqipërisë, nuk do të kenë më asnjë komision ekstra në transfertat e tyre sepse Shqipëria është zyrtarisht anëtare e zyrave të pagesave unike europiane, kursen miliona euro nga xhepat e dërguesve nga jashtë, brenda perimetrit të BE,” u shpreh Rama dhe ende pa u marrë vendimi ai proklamoi mbajtjen e Samitit të NATO-s në vitin 2027 Tiranë ku, sipas tij, do jetë prezent edhe Presidenti i zgjedhur i SHBA, Donald Trump.

“Akoma më e pamendueshem disa vite më parë është mikpritja në Tiranë e samitit të NATO-s, në 2027 ku i pranishëm do të jetë edhe presidenti i SHBA, kemi nisur punën bashkë me NATO-n. Një ekip vlerësimi për infrastrukturën ka ardhur në Tiranë dhe ka bërë vlerësim për Tiranën që do të ishin të pamundura nëse nuk do të kishim ndërtuar gjithçka që është ndërtuar këtë dekadë. Sot trajtohemi si të barabartë jo thjeshtë formalisht port me një respekt që nuk e kemi pasur kurrë më parë.”

Sot Edi Rama dhe korrupsioni endemik ka qenë tumori më gërryes për vendin ndërsa u mburrë me tranformimin e Tiranës për vlerësime ndërkombëtare për sa i përket infrastrukturës ndonëse pas akuzave të fundit që ka ngritur SPAK, Tirana tashmë është Kryeqytet i korrupsionit dhe jo i shqiptarëve.

“Nuk është luftë e një segmenti apo një tjetri, por është luftë e gjithë sistemit shtetëror. Shqipëria ka pasur problemin e vetë më të madh dhe tumorin e vetë më gërryes, korrupsionin endemik në çdo hap, për çdo gjë, për çdo dokument. Sot panorama është krejt tjetër dhe ka mbetur vetëm një gur i fundit i këtij mozaiku për ta mbyllur plotësisht epokën otomane të kulturës transaksionale të qyetatarit me shtetin.
Ky është përfundimi i projektit të futjes së kadastrës në këtë sistem të teknologjisë. Them përfundimi sepse një pjesë e rëndësishme e Kadastrës është në sistemin e teknologjisë përderisa sot aplikimet mund t’i bësh online, por ka një pjesë tjetër që duhet futur në sistem,” tha kreu i ekzekutivit duke mos i dhënë asnjë meritë opozitës për luftimin e korrupsionit ndonëse ishte një e vetme që kallëzoi këtë pushtet në Prokurorinë e Posaçme sikur edhe mos ti hiqet asnjë meritë Edi Ramës që e krijoi.

“Nga ana tjetër dua t’ju tërheq vëmendjen që në aspektin e shërbimeve publike vlerësimi është gjerësisht ndërkombëtar, nuk është thjesht një vlerësim i imi apo i yni, por është vlerësim ndërkombëtar në të gjitha klasifikimet për rritjen e kapaciteteve të shërbimeve. Në këtë drejtim do ta gjeni Shqipërinë në pjesën e sipërme të tabelave të klasifikimit.

Akoma më e pa mendueshme deri disa vite më parë, është mikpritja në Tiranë e Samitit të NATO-s në vitin 2027, gjë për të cilën ne e kemi filluar punën së bashku me NATO-n, një mision inspektimi i kushteve të infrastrukturës dhe urbanistikës ka ardhur në Tiranë dhe ka bërë vlerësime që do të ishin të pamundura në Tiranën e përpara sesa qeveria në aleancë me Bashkinë e Tiranës të ndërtonte gjithçka ka ndërtuar në këtë dekadë,” tha Rama dhe duke shmangur çdo krahasim me qeverinë e kaluar socialiste hodhi gurë dhe baltë të asaj të para 11 viteve, që sipas tij, akuzoi qeverinë e kaluar se futi në kolaps sistemin e pensioneve dhe pasojat po i vuajnë pensionistët ditët e sotme.

Po me këtë timbër foli dhe për Aeroportin e Rinasit, që është e qartë se nuk e njeh dhe i ka ngelur ora se ishte kotec pulash, sepse bazuar në kioskat që kanë mbirë në çdo cep sot më shumë i ngjanë Lanës kur ai nisi qeverisjen para 24 viteve se sa një Aeroporti që ai thotë se është më i madh në rajon.

“Në aeroportin e Rinasit në nëntor mbyllet bilanci me 10 mln pasagjerë. Për këdo që i vjen inat pse Shqipëria ecën kështu si po ecën për shkak se ka problem mënyrën si qeveris unë dhe si qeverisim ne, më vjen shumë keq, por sot për të dytin vit kemi aeroportin më të madh të rajonit dhe jemi mbi Beogradin që ka qenë kryeqendra e këtij rajoni dhe që e ka patur aeroportin kryesor në këtë rajon kur ne kishim një kotec pulash fluturuese në Rinas, kur pulat numëroheshin në mëngjes kur dilnin nga koteci dhe numëroheshin në darkë kur vinin në kotec.

Ju nuk e keni parë Rinasin në atë kohë, por unë e kam parë se më është dashur të fluturoj, kam qenë një nga pulat, kemi qenë në aktivitetet ndërkombëtare të basketbollit. Ishte bosh, një kamarier, një banakier. Por sot, nuk e solli koha, por e solli gjithë kjo punë kolosale që është bërë me vite.”

Për të parë atë që e pa njeri ishte dhe ajo që ndodhi me Rrugën e Arbrit dhe veprën kryesore të këtij projekti, tunelin e Murrizit dhe duke harruar atë që ndodhi në Austradën Tiranë-Elbasan ai tha se kjo nuk do ti kushtoi qytetarëve shqiptarë asgjë.

“Një pikë kyçe ku na goditur fort syri i keq, tuneli i Murrizit, gjeologjia. Aty po bëhet një punë kolosale për të përballuar një gjeologji e cila faktikisht solli një surprizë në këtë rast, e hidhur. E gjithë ajo punë kolosale po bëhet pa asnjë qindarkë shtesë nga buxheti. Pse? Sepse po bëhet me PPP. Kjo është.

Kur PPP bëhet siç duhet, barra ndahet. Atë surprizën gjeologjike e përballon kompania, jo buxheti. Shpresoj shumë që në pranverë, por s’dua të flas shumë, se aty na kanë parë sytë vërtetë vështirësi të mëdha, të hapet edhe ai,” tha Edi Rama ndërsa paralajmëroi një luftë të çuditshme kundër vrasjes së fëijëve, duke mbyllur rrjetin social TikTok ndonëse jo vetëm në Shqipëri, por shqiptarët nuk e kanë parë askund në botë.

“Kemi një situatë që ju e njihni, lidhur me TikTok-un. Ne nuk lëvizim nga vendimi që kemi marrë. Dhe siç e kam paralajmëruar, është një vendim për implementimin e të cilit do të na duhet 6-8 javë sepse teknologjikisht është shumë e rëndësishme kjo kohë.”

Në fund, falë vitit elektoral administrata shqiptare po shikon atë që nuk e pa që 11 vite pushtet të Edi Ramës, duke paralajmëruar dhe një vendim në mbledhjen e sotme të qeverisë, shpërblimet e fundvitit për administratën ku do përfshihen mësuesit, mjekët e infermierët, policët, ushtarakët, zjarrfikësit dhe. punonjësit e burgjeve.

“Sot kemi paga konkurruese në administratë me pagat e larta të sektorit privat. Jo më kot, edhe në vlerësimet e KE që nuk është gazetë gjermane, nuk është as portal por është një trup e dedikuar për të qemtuar me një lupë shumë zmadhuese se sa lupa e të gjithëve ju këtu, por pa syrin e shtrembër çdo gjë që ndodh në organizimin e një shteti, në 4, edhe ky për mua është një lajm shumë i mirë, por shqiptarët s’kishin nga ta mësonin edhe pse ne e kemi përsëritur disa herë.

Në 4 nga 5 fushat e vlerësimit të administratës publike, Shqipëria është në vendin e parë në rajon. Sikundër, jam i bindur jemi në vendin e parë por me diferencë për prokurimet publike në rajon, Shqipëria ka 80 pikë nga 100 të mundshme nga vlerësimi analitik me fakte. Vendi i dytë është 71-72, të tjerët janë nën 70 pikë.

Mbështetja e vazhdueshme e administratë është kyçe. Kam parasysh administratën përtej zyrave, kam parasysh mësuesit mjekët e infermjerët, policët, ushtarakët, zjarrfikësit, punonjësit e burgjeve për të cilët një vendim i ri do të dalë sot në vendimet e qeverisë e kështu me radhë. Rritja e pagës në të gjithë sistemin ka çuar në rritjen e pagës mesatare.”

Sa do të ndikojnë këto përralla të mbretit shqiptar me të gjitha pushtetet në zgjedhjet parlamentare të vitit 2025 nuk dihet, por ai sot e tha qartë se Partia Socialiste do të marrë edhe më shumë se 800 mijë vota që mori në zgjedhjet e kaluara.

Në vitin 2021 e mbajti premtimin, dhe sot siç po zbulohen komunikimet e koduara më shumë mund të thuhet se u blenë se sa u vjedhën votat, por ai sot u zotua:

“Ajo që po ndodh me drejtësinë nuk është se është shkëputur nga ajo që unë kam thënë, janë bashkë. Kur kam thënë se janë njerëzit që korruptojnë, por sistemi që korrupton njerëzit…nuk e kam shpikur unë, është dituri publike kjo, e kam mësuar dhe e besoj 100%. Pikërisht sepse e kam besuar atë që kam thënë, kam udhëhequr përpjekjen për Reformën në Drejtësi si pjesë e betejës për të ndërtuar një sistem që njerëzit nuk mund ta korruptojnë. Kur ju thoni sa shumë njerëz.

E para nuk e di me çfarë e masni këtë. Shumë apo pak është relative. Dhe varet nga çfarë pike referimi nisesh për të thënë shumë ose pak. PS ka 800 mijë mbështetës do të ketë edhe më shumë në pranverë. Gjatë 3 mandateve ka patur mbi 50 ministra, besoj, mbi 500-600 drejtues vendorë, mund të ketë patur mbi 200 deputetë. Çfarë do të thotë shumë tani?

E dyta, patjetër se ju dhe kush të dojë mund të thotë që Reforma në Drejtësi e solli Amerika me aeroplan, BE-ja me vapor nga Brindizi. Por kush njeh historinë e Reformës në Drejtësi mjafton të kthehet mbrapa kur ne ishim në opozitë, shumë më parë se 2013, se janë në dokumente. Ka një dokument të shkruar që opozita e asaj kohe ia ka çuar qeverisë së asaj kohe një dokument propozimesh që quhej “Pakti për shtetin e së drejtës”. Lexoni çfarë shkruhet aty në atë pakt. Thonë ia kapën të gjithë, çfarë më kapën mua?

Nëse kjo po ndodh në Shqipëri, të drejtën e autorit për faktin se u shemb një sistem, e kam thënë, i keni të regjistruara, që nga i ndjeri president që s’është më tek të tjerët që më sulmonin pse thoja se do ta shembim këtë sistem drejtësie. A do ta pastrojmë llumin nga sistemi i drejtësisë? Janë fjalitë e mia. U pastrua? Si ishte kjo? Kujt po ia thoni këto?

Mos vallë mendoni se unë kam thënë në mënyrë të përsëritur se duam një drejtësi që të shohë drejt, as majtas dhe as djathtas dhe kur të jetë për të goditur të godasë kë duhet goditur majtas e djathtas. Mendoni se kam bërë retorikë për qejf? Unë çdo që them e mendoj, në kuptimin që e besoj. Gjëra që nuk i besoj, nuk i them.”