Ish-Shefi i NATO-s, Ministër i Financave i Norvegjisë
Ish-Sekretari i Përgjithshëm i NATO-s, Jens Stoltenberg u bë sot ministri i ri i financave të Norvegjisë në kuadër të riorganizimit të qeverisë, duke marrë këtë post teksa vendi nordik konsideron efektet e një lufte të mundshme tregtare transatlantike.
Emërimi i Stoltenbergut popullor dhe të respektuar mund të rrisë mbështetjen e qeverisë laburiste në sondazhet përpara zgjedhjeve parlamentare në shtator.
Ishte kryeministër
Politikani me përvojë ishte kryeministër i vendit nga viti 2000 deri në vitin 2001 dhe nga viti 2005 deri në vitin 2013. Ai udhëhoqi aleancën ushtarake perëndimore për dhjetë vjet, përfshirë edhe atë gjatë mandatit të parë të Presidentit të SHBA Donald Trump, dhe dha dorëheqjen vitin e kaluar.
“Ky ekip është gati të udhëheqë Norvegjinë në kohë sfiduese,” tha kryeministri Jonas Gahr Stoere para pallatit mbretëror pasi qeveria e re u takua me mbretin Harald.
“Ne do të sjellim politika që do të bëjnë një ndryshim në jetën e përditshme të njerëzve dhe jemi të vetëdijshëm për paqëndrueshmërinë në botë nga e cila është prekur Norvegjia, si një vend i vogël.”
Në NATO, Stoltenberg është quajtur “pëshpëritësi i Trump” sepse ai e bindi presidentin amerikan që ta mbante vendin në Aleancë pasi u ankua gjatë mandatit të tij të parë se aleatët po shpenzonin shumë pak për mbrojtjen dhe kërcënuan të tërhiqeshin.
Zgjedhjet në shtator
Norvegjia, një vend i orientuar nga eksporti prej 5.5 milionë banorësh që nuk është anëtar i Bashkimit Evropian, ka frikë se mund të jetë e ndjeshme ndaj një lufte tregtare transatlantike nëse Trump zbaton kërcënimin e tij për të vendosur tarifa ndaj mallrave të BE-së.
Eksportet kryesore të Norvegjisë janë nafta, gazi dhe peshku.
Partia euroskeptike e Qendrës së Norvegjisë u largua nga qeveria të enjten për shkak një mosmarrëveshje mbi pranimin e politikave energjetike të BE, duke e lënë Partinë Laburiste të qendrës së majtë të vetme në pushtet. Aktualisht laburistët po ngecin në sondazhe përpara zgjedhjeve të shtatorit.
