Zgjedhjet e 11 Majit, 36% e kërkesave të emigrantëve për votim janë refuzuar! Kryesojnë zgjedhësit nga Italia

Për herë të parë në zgjedhjet parlamentare që do të mbahen më 11 maj 2025 do të votojnë edhe emigrantët. Regjistrimet e tyre kanë nisur më 11 janar të këtij viti dhe përfundojnë më 4 mars.

Regjistrimi i votuesve nga jashtë po kryhet nëpërmjet Platformës Elektronike të Regjistrimit, PER, që administrohet nga Komisioni Qendror i Zgjedhjeve.

Sipas të dhënave të publikuara nga Komisioni Qendror i Zgjedhjeve, KQZ, deri më 4 Shkurt 2025 rezultojnë se janë plotësuar në total 141.435 kërkesa për regjistrime në zgjedhje. Nga totali i kërkesave të plotësuara 69 për qind e tyre janë miratuar. Numri i kërkesave të miratuara arrin në 87.596.

Kërkesat e miratuara kryesohen nga emigrantët e Italisë me 33 për qind të totalit të kërkesave të miratuara. E ndjekur nga emigrantët që jetojnë në shtetin e Greqisë me 25 për qind të kërkesave për miratim, Gjermania 13 për qind, SHBA 10 për qind, Anglia 8 për qind etj.

Ndërsa rreth 36 për qind e kërkesave janë refuzuar, ku sipas KQZ, këtu përfshihen edhe rastet kur një zgjedhësi aplikimi i është refuzuar më shumë se një herë.

46 për qind e kërkesave të refuzuara janë nga zgjedhësit emigrantë që jetojnë në Itali. 27 për qind e tyre janë në Greqi si kërkesa të refuzuara, rreth 12 për qind në Gjermani, SHBA janë 3.5 për qind dhe 3.2 për qind në Angli.

Totali i kërkesave sipas shteteve, grupmoshës dhe qarqeve

Nga totali i kërkesave të regjistruara (përfshirë edhe ato të refuzuara) sipas të dhënave në KQZ rezulton se numri më i madh i emigrantëve që kërkojnë të marrin pjesë në votime është përqendruar në Itali. Në këtë shtet janë regjistruar 53.419 kërkesa apo 38 për qind e totalit. E ndjekur nga Greqia me 27 për qind e tyre, Gjermania 12 për qind, SHBA 7 për qind, Angli 6 për qind etj.

28 për qind e totalit të kërkesave dominohen nga zgjedhës së grupmoshës nga 26 deri 35 vjeç. Grupmosha nga 36 deri 45 vjeç përbën 27 për qind të tyre, grupmosha 46 deri 55 për qind zë 19 për qind të totalit të kërkesave. Mbi 56 vjeç zë 16 për qind dhe grupmosha nga 18 deri 25 vjeç zë 10 për qind.

Shpërndarja e totalit të kërkesave për regjistrim është në qarkun e Tiranës 19 për qind, e ndjekur nga qarku i Fierit 14 për qind, Korça 11 për qind, Durrësi 8 për qind, Elbasani 8 për qind, Vlora 6 për qind, Berati 6 për qind, Shkodra 4 për qind etj./Monitor/