Presidentja e Kosovës në Washington, mban fjalimin kryesor në Lutjet e Mëngjesit

Presidentja e Kosovës, Vjosa Osmani, me ftesë të një grupi kongresistësh amerikanë, ka udhëtuar për në Washington, D.C., për të marrë pjesë në Lutjet e Mëngjesit ku pritet të mbaj edhe fjalim.

“Në kuadër të kësaj ngjarjeje, e cila mbledh mijëra kongresistë, politikanë, biznesmenë dhe përfaqësues të shoqërisë civile nga mbarë bota, Presidentja Osmani do të mbajë fjalimin kryesor nga përfaqësuesit ndërkombëtar në kuadër të Drekës Ndërkombëtare.

Me këtë rast, ajo do të flasë për rrugëtimin e popullit të Kosovës nga ditët më të vështira deri te sukseset e sotme, duke theksuar besimin e pashoq dhe qëndrueshmërinë e qytetarëve tanë,” bënë ditur Presidenca e Kosovës përmes një njoftimi në rrjetin social Facebook.

Ndryshe, Lutjet e Mëngjesit janë një traditë gjashtëdhjetëvjeçare, ku çdo vit mblidhen zyrtarët më të lartë amerikanë, anëtarë të Kongresit, politikanë dhe udhëheqës ushtarakë, si dhe mysafirë nga shumë vende të botës për lutje të përbashkëta.